Buxoro viloyati hokimligi

Mamlakatimizda davlat va jamiyat boshqaruvining turli sohalarida korrupsiyaning oldini olish hamda unga qarshi kurashish borasida keskin va murosasiz kurash olib borishga jiddiy kirishildi.

Shunga qaramay mazkur illat jamiyatimizda uchrayotganligi mamlakatimizning siyosiy, iqtisodiy, ijtimoiy, madaniy jabhalarida amalga oshirilayotgan islohotlarga o‘zining salbiy ta’sirini ko‘rsatib kelmoqda.

Korrupsiya nafaqat mamlakatga moddiy yo‘qotish olib keladi, balki tadbirkorlik rivojiga, qonun ustuvorligini ta’minlashga to‘sqinlik qiladi, jamiyatda ijtimoiy keskinlikni, hokimiyatga ishonchsizlikni, halokatli og‘ir oqibatlarni keltirib chiqaradi.

Hurmatli Prezidentimiz Shavkat Mirziyoyevning joriy yilning 5-mart kuni o‘tkazilgan Milliy Kengashning yig‘ilishida “Korrupsiyaning oldini olish - davlat xizmatiga professional va fidoyi kadrlarni tanlash hamda ularni “halollik vaksinasi” bilan emlashdan boshlanadi”, “korrupsiyaga “jamiyat tanasidagi saraton” sifatida qarash kerak”, - deya alohida ta’kidlaganlari ham uning naqadar xavfli illat ekanligini ko‘rsatadi.

Shu bois mamlakatimiz mustahkamligi, xalqimiz farovonligi, yurtning rivoji va gullab yashnashini, obod bo‘lishini istagan har bir fuqaro pora olish va berish, pora olish va berishda vositachilik qilish illatidan xalos bo‘lishi, bir so‘z bilan aytganda, “halollik vaksinasi” bilan emlanishi kerak.

Bugungi kunda ayrim davlat xizmatchilari o‘z manfaatlarini ko‘zlab, jumladan kredit olishda, qurilish sohasida, budjet mablag‘larini taqsimlashda ming afsuski, noqonuniy ishlarga aralashib qolayotganliklarini guvohi bo‘layapmiz. Xalqimiz “Qing‘ir ishning qiyig‘i qirq yilda ham chiqadi” deb bejiz aytmagan. Sodir etilgan har qanday korrupsiyaviy jinoyat sirligicha qolmaydi, albatta oshkor bo‘ladi va qonuniy jazosini oladi. 

Shuning uchun men sizlarni ogohlantirib o‘tmoqchiman, har qanday jinoyat uchun jazo muqarrardir, buni har bir davlat xizmatchisi vujudi bilan his qilishi, ko‘z oldiga ota-onasi, farzandlari va aka-singillarini keltirishlari kerak.

Davlat xizmatchisi – bu oddiy xodim emas, u davlat topshirig‘i va manfaatlari bo‘yicha uning nomidan harakat qiluvchi insondir. Shuning uchun davlat xizmatchisi degan yuksak hamda sharafli nomga dog‘ tushirmaslik uchun eng avvalo halol bo‘lishimiz, oldimizga qo‘yilgan vazifalarni vijdonan, vatanparvarlik tuyg‘usini to‘liq his etgan holda mehnat qilishimiz lozim bo‘ladi.

Bu esa 2022-yil 8-avgustda qabul qilingan “Davlat fuqarolik xizmati to‘g‘risida”gi O‘zbekiston Respublikasi Qonunining 15, 16-moddalarida ham mustahkamlanib qo‘yilganligini yana bir bor eslatib o‘tmoqchiman.

Ish faoliyatimizda korrupsiyaning har qanday ko‘rinishiga murosasiz munosabatda bo‘lish, xalqimizga halol va sadoqat bilan xizmat qilishni asosiy burchimiz va vazifamiz,  deb bilaylik!

Faoliyatimizni qaytadan xolis tahlil qilib, mahalliy ijro hokimiyati oldiga qo‘yilgan ustuvor vazifalarni shaxsiy manfaatimizdan ustun qo‘ygan holda sidqidildan bajarishga barcha kuch va salohiyatimizni safarbar etaylik!

Yurtimizning bugungi va ertangi kuni, yorug‘ kelajagi uchun avvalambor o‘zimiz mas’ul ekanligimizni unutmaylik!

Davlatimiz rahbari tomonidan “Taraqqiyot strategiyasi”da hamda 2025-yil 5-martdagi Milliy Kengashning kengaytirilgan yig‘ilishida belgilab berilgan maqsad va vazifalar, shuningdek, mahalliy hokimliklar oldiga qo‘yilgan vazifa va topshiriqlar ijrosini so‘zsiz va og‘ishmay bajarilishini ta’minlaylik!

Barchangizni birgalikda korrupsiyaga qarshi murosasiz kurash olib borishga da’vat qilaman!