Buxoro viloyati hokimligi

Ayollar ijtimoiy yotoqxonasi bu turli sabablarga koʻra oilasidan ajrashgan yoki boquvchisini yoʻqotib, norasida farzandlari bilan koʻchada qolgan, oylab, hatto yillab ijarama-ijara sarson-sargardonlikda, och va yupun yashab kelgan, madadga muhtoj oilalar uchun boʻlib, bugun ularga davlatimiz siyosati darajasida koʻrsatilayotgan mehr-saxovat va moddiy-maʼnaviy madadni shunchaki, soʻz bilan ifodalash mushkul.

Bugun viloyat hokimining oʻrinbosari Hafiza Artikova boshchiligidagi ishchi guruhi viloyat markazining Ahmad Donish, Olim Xoʻjayev va boshqa mahallalaridagi ijtimoiy yotoqxonalarda boʻlib, xotin-qizlar tashvish-muammolarini tinglab, tegishli masʼullar ishtirokida bu murojaatlarni hal qilish choralarini koʻrdi.

Ishchi guruhi tarkibida viloyat oila va xotin-qizlar boshqarmasi, IIB, ijtimoiy agentlik viloyat boʻlimi, adliya boshqarmasi, sogʻliqni saqlash, kambagʻallikni qisqartirish va bandlik boshqarmalari, shahar hokimligi, mahalla “yettiligi” masʼullari, xalq deputatlari viloyat va shahar Kengashlari deputatlari hozir boʻldilar.

Viloyat markazining Ahmad Donish, Olim Xoʻjayev va boshqa mahallalarida ayni kunda 4 ta ayollar ijtimoiy yotoqxonasi boʻlib, ulardagi jami 420 ta xonada 1260 nafar fuqaro istiqomat qilmoqda. Ular risoladagidek yashab turmush kechirishlari uchun zarur muhandislik-kommunikatsiya tarmoqlaridan tortib, voyaga yetmagan farzandlari uchun maktabgacha taʼlim tashkiloti faoliyati yoʻlga qoʻyilgan. Yotoqxonalar zarur inventarlar bilan jihozlangan. Ularda maʼrifat va maʼnaviyat xonalari, shinam jihozlangan oshxonalar, shuningdek, sanitariya-gigiyena tarmogʻi mavjud. Binolari tabiiy gaz, elektr energiyasi, toza ichimlik suvi bilan taʼminlangan. Shunga qaramasdan, ijtimoiy yotoqxonalarda yashayotganlarning baʼzi oilaviy ahamiyatga ega tashvish-muammolari yigʻilib qolgani bois, tegishli masʼul mutasaddilar ishtirokida bu murojaatlar yechimiga eʼtibor qaratilmoqda.    

Xususan, Alpomish koʻchasidagi ijtimoiy yotoqxonada boʻlgan viloyat hokimining oʻrinbosari H. Artikova 20 tadan oshiq xonada yashovchi ayol va ularning 36 nafar bolasi ijtimoiy ahvoli koʻzdan kechirildi. Xuddi shunday, Qayum Murtazoyev koʻchasidagi ijtimoiy yotoqxona 90 ta yashash xonasiga ega boʻlib, ayni paytda unda 87 ta oila istiqomat qilmoqda. Bunda yashovchi jami 228 nafar fuqaroning baʼzilari chet ellarga mehnat migranti sifatida qatnab ishlaydi. 

Viloyat hokimining oʻrinbosari bilan uchrashuvda shu yotoqxonada yashovchi Dilbar Toirova yotoqxona yertoʻlasidagi suvni bartaraf qilish, serfarzand oila bekasi Mohigul Xudoyberdiyeva ayni vaqtda jazoni ijro etish muassasasida boʻlgan toʻngʻich oʻgʻliga yengillik berilishini soʻrab, shuningdek, Rushana Hamroqulova bogʻcha puli masalasida, Nigora Murodova esa salomatligini tiklashda amaliy-moddiy koʻmak berilishini soʻrab murojaat qilishdi. 

Muloqotda har bir murojaat yuzasidan masʼullar biriktirilgani holda ularni tezkor hal etish chora-tadbiri belgilandi. 

Viloyat hokimligi matbuot xizmati