Tataristonning “Tatlift” kompaniyasi bosh direktori Buxoroga keldi. Botir Zaripov bilan muloqotda amaliy hamkorlikning dolzarb masalalari muhokama qilindi
2025-06-07 14:30:00 / Yangiliklar
Kompaniya bosh direktori Gulshat Zagudulina bilan muloqot chogʻida Botir Zaripov ayni kunda Buxoroda boshlangan va jadal davom etayotgan koʻp qavatli uy-joylar, savdo va ishlab chiqarish obyektlari qurilishi jarayonida zamonaviy, har jihatdan qulay va sifatli liftlarga ehtiyoj ortib borayotganini taʼkidlab, oʻzaro teng manfaatli hamkorlikda Buxoroda lift ishlab chiqarish loyihasini amalga oshirish yuzasidan fikr almashgandi. Buning uchun hududda zarur infratuzilma ham mavjudligini alohida qayd etib, kompaniya rahbariyatini Buxoroga taklif qilgandi.
Mazkur taklifga binoan Gulshat Zagudulina boshchiligidagi delegatsiya bugun Buxoroga keldi.
Viloyat hokimi Botir Zaripov bilan uchrashuvda amaliy hamkorlikning dolzarb masalalari keng muhokama qilindi.
Uchrashuvda “Tatlift” kompaniyasi faoliyati, Buxoroda amalga oshirilishi yangi koʻzda tutilgan loyiha boʻyicha rejalari haqida taqdimot qilindi.
Tomonlar loyihani amalga oshirishning navbatdagi bosqichlarini aniqlab, bu boʻyicha hamkorlikni izchil davom ettirishga kelishdilar.
Tashrif doirasida “Tatlift” kompaniyasi vakillari “Buxoro sanoatni rivojlantirish parki” maxsus sanoat zonasida investorlarga yaratilgan shart-sharoit, imkoniyat va imtiyozlar bilan tanishtirildi. Xorijlik hamkorlar tomonidan bu yerda amalga oshirilayotgan loyihalar haqida taqdimot qilindi.
Viloyat hokimligi matbuot xizmati