Olot: Shoyimovlar oilasi yarim yilda tomorqasidan 40 million soʻm daromadni koʻzlagan
2025-05-20 20:05:00 / Yangiliklar
Shu oʻrinda baʼzi maʼlumotlarga toʻxtalsak, ayni kunda olis Olot tumanida mavjud 4 ming 471 gektar aholi tomorqasida umumiy hisobda 53 ming tonna atrofidagi ertangi sabzavot-poliz mahsuloti yetishtirilmoqda. Chunonchi, 570 gektarda 4 ming tonnadan ortiq kartoshka, shuningdek, 502 gektarda 8 ming tonna atrofida pomidor, 171 gektarda 3 ming 158 tonna sabzi, 580 gektarda 11 ming tonna atrofida piyoz, qolaversa, 700 gektardan ortiq yerda 30 ming tonnaga yaqin qovun-tarvuz va oshqovoq yetishtirish harakati jadal bormoqda. Chekka tuman mirishkorlari keyingi yillarda karam, gulkaram, qulupnay, hatto issiqxona sharoitida sitrus meva yetishtirishda ham yetarli tajribaga ega boʻlib borishmoqda.
Shunday tashabbuslardan biri "Qumkashon" mahallasida ham oʻz samarasini bermoqda. Mazkur mahallada istiqomat qiluvchi Zarnigor Shoyimova 40 sotix yerni uzoq muddatli ijaraga olib, undan unumli foydalanmoqda. Bu oila mehnatkashlari kartoshka, pomidor, bodring, bulgʻor qalampiri, sabzi, loviya, qovun, tarvuz va oshqovoq kabi sabzavot, poliz mahsulotlarini yetishtirishib, roʻzgʻoriga qut-baraka kiritmoqdalar.
Mavjud yerning 4 sotix qismida kartoshkadan 1 tonnaga yetkazib, yana pomidor va qovun-tarvuzdan shuncha hosil olishga yaqin boʻlgan Shoyimovlar oilasi yarim yilda tomorrqadan qoʻlga kiritayotgan daromadi 40 million soʻmdan kam emas. Hali yana yer tayyorlab, takror ekib yetishtiriladigan mahsulotlar salmogʻi bundanda barakaliroq. Demak, yil yakunigacha umumiy erishiladigan moddiy manfaatdorlikni chamalash mumkin. Asosiysi, shunday tashabbus va sidqidil mehnat tufayli mahalla va qishloqlarda odamlar oʻz mehnati bilan turmushi farovonligini taʼminlamoqdalar.
Umuman, olis tumanning Qumkashon mahallasida bugunga kelib 4 ming nafarga yaqin aholi istiqomat qilmoqda. Mahallada eskidan tomorqachilik, chorvachilik va parrandachilik, umuman, dala-dehqonchilik ishlari rivojlangan. Shu bois, hudud “drayveri” — dehqonchilik hisoblanadi. Bu yerda asosan sabzavot-poliz ekinlari, kartoshka, piyoz, pomidor, bodring, oshqovoq, lavlagi, shuningdek, uzum, anor va boshqa sara mahsulotlar yetishtirilmoqda. Bundan tashqari, uy xoʻjaligida daromad topish va tadbirkorlikda ham peshqadam mahallalardan biri.
Bularga qoʻshimcha xonadon mirishkorlari hovli etagidagi ogʻilxonani ham obod qilib, 3-4 bosh qoramol, sogʻin sigir, qoʻy-qoʻzi boqib, roʻzgʻor kam-koʻstini toʻldirishmoqda. Aytish joizki, halol mehnat tufayli bir oilaning tomorqadan olinayotgan sabzavot mahsulotlari bilan birga sut, qatiq, qaymoq, qolaversa, goʻshtga boʻlgan kundalik ehtiyoji qondirilmoqda. Darhaqiqat, bularning barchasi oilada tomorqa madaniyati, dasturxon toʻkinligini taʼminlash maqsadida omilkorlik bilan ish koʻrish samarasidir. Xonadon bekasi Zarnigor Shoyimovaning taʼbiri bilan aytganda, toʻqlik yoʻqlikdan yaxshi, tomorqa uning naqshidir.
Viloyat hokimligi matbuot xizmati