Buxoro shahri: “Havzi nav” mahallasida Gulrux Komilova ham shirinliklar tayyorlamoqda
2025-04-11 16:50:00 / Yangiliklar
Jumladan, viloyat markazidagi "Havzi-nav" mahalla fuqarolar yigʻinida ham bu borada qator sezilarli ishlarga guvoh boʻlish mumkin. Bu mahallaning asosiy rivojlanish “drayveri”—hunarmandchilik, ishlab chiqarish va savdo-tijorat ishi yoʻnalishlari. Hududda faoliyat yuritayotgan mohir hunarmandlar talaygina.
Berilayotgan imkoniyatlardan unumli foydalanayotganlardan biri Ahmad Borband koʻchasida yashovchi Gulrux Komilovadir. Matonati kuchli bu ayol imkoniyati cheklangan boʻlishiga qaramasdan, intilish va harakatdan toʻxtamaydi. U oʻziga shahar hokimining mahalladagi yordamchisi tavsiyasi asosida berilgan 25 million soʻm miqdoridagi imtiyozli kredit mablagʻi evaziga zarur uskunalarni olib, oʻz xonadonida pishiriqchilik faoliliyatini yoʻlga qoʻydi. Hozirda bu tashabbus tufayli oila aʼzolari bilan birgalikda qoʻni-qoʻshnilardan 3 nafar ishsiz ayolning ham bandligi taʼminlanmoqda.
Gulrux Komilovaga shogird tushgan ayollar kunlik mehnati uchun 150 ming soʻm ish haqiga ega boʻlib, oilasiga qoʻshimcha daromad kiritishmoqda. Buyurtma asosida oʻnga yaqin xildagi turli shirinlik va pishiqlar tayyorlanib, toʻy-maʼrakalar dasturxoniga, savdo doʻkonlariga yetkazib berilmoqda. Xalqimizda "Hunarli kishi xor boʻlmas" degan purmaʼno gapning dalolati bu.
Viloyat hokimligi matbuot xizmati