Buxoro viloyati hokimligi

Joriy yilda esa yana 70 dan ortiq barcha taʼlim maskanlarida dasturlarda belgilangan qurilish-taʼmirlash, jihozlash ishlaridan tashqari, ijtimoiy sohani rivojlantirish uchun 150 mlrd. soʻm mablagʻ ajratildi va maqsadli yoʻnaltirilmoqda. 

Bundan tashqari, taʼlim sifatiga qaratilayotgan eʼtibor, undagi islohotlar bugun oʻz samarasini bermoqda. Jumladan, soʻnggi uch yilda viloyatimizdagi umumiy oʻrta taʼlim maktablarining kasbiy salohiyatga ega boʻlgan oliy va birinchi toifali oʻqituvchilar ulushi 23 foizdan 51 foizga, yaʼni 28 foizga oshdi. 

Bugungi kunda oʻz kasbiy salohiyatini oshirib borgan har qanday soha xodimi davlatimiz tomonidan har tomonlama qoʻllab-quvvatlanib kelinmoqda. Jumladan, viloyatimizdagi 118 nafar pedagogning har biriga 5 mln. 700 ming soʻmdan ustama belgilanib, ushbu koʻrsatkich kvotaga nisbatan 113,5 foiz bilan respublikada yuqori koʻrsatkichni tashkil qilmoqda. Ayni paytda ming dollardan ortiq maosh olayotgan oʻqituvchilar soni 250 nafarga yaqinlashdi. 

Ayni jihatlar bugun viloyat hokimligida Xalqaro Nordik universiteti va IDC (Intelligence Development  Center) markazi hamkorligida matematika va fizika fani oʻqituvchilari oʻrtasida tashkil etilgan musobaqa gʻoliblarini tantanali taqdirlash marosimida alohida tilga olindi.
Qayd etish lozimki, joriy yilning yanvar-fevral oylarida Xalqaro Nordik universiteti (XNU) Toshkent shahridagi “Qorakoʻl ziyo” oʻquv markazi (Intelligence development center-IDC) bilan hamkorlikda viloyatdagi umumiy oʻrta taʼlim maktablarining matematika va fizika fani oʻqituvchilari oʻrtasida ikki bosqichli musobaqa tashkil etilgan edi.

Yakuniy natijalarga koʻra, matematika fanidan 4 nafar (1-oʻrin 1 nafar, 2-oʻrin 1 nafar, 3-oʻrin 2 nafar), fizika fanidan 3 nafar (1-2-3-oʻrinlar 1 nafardan) oʻqituvchi gʻolib boʻldi.

Taqdirlash marosimida viloyat hokimi Botir Zaripov gʻolib va sovrindorlarni samimiy qutlab, oʻzining ezgu tilaklarini bildirdi. 
-Sizlarning gʻalabangiz, umuman, yosh avlodga bilim berishdek murakkab, ammo sharafli mehnatingiz uchun samimiy minnatdorlik bildirishni oʻzimizning muqaddas burchimiz deb bilamiz. Bundan keyin ham farzandlarimizga zamonaviy ilm-fan va kasb-hunar asoslarini oʻrgatish, yuksak insoniy tuygʻu va fazilatlarni singdirish, maʼnaviy-axloqiy qadriyatlarimizni asrab-avaylash borasida bor kuch-gʻayratingiz, bilim va mahoratingizni ayamasdan astoydil xizmat qilishingizga ishonamiz,-dedi viloyat rahbari. 

Tadbirda gʻolib va sovrindor pedagoglarga qimmatbaho sovgʻalar bilan birga Finlyandiya va Shvetsiyaga taʼlim sayohati uchun yoʻllanmalar topshirildi.

Viloyat hokimligi matbuot xizmati