Buxoro viloyati hokimligi

Kelgusi 2025-yilda qishloq xoʻjaligi sohasida paxta va gʻallachilikda hosil salmogʻini oshirish orqali 17,8 ming tonna gʻalla hamda 40 ming tonna paxta xom-ashyosini yetishtirish, shu bilan birga, paxtachilik sohasida yangi avlod navlarini keng qoʻllash maqsadida 2 ming gektar ekin yer maydonlariga yuqori hosildor xorijiy navlardan ekib yetishtirish choralari koʻrilmoqda. 

Hududda umumiy sugʻoriladigan ekin yer maydonlariga qishloq xoʻjaligi, sabzavot-poliz mahsulotlari oziq-ovqat ekinlari hamda mevali bogʻ-tokzorlarni 30 foizga, qishloq xoʻjaligida foydalaniladigan maydonlarda suv tejovchi texnologiyalar orqali sugʻoriladigan maydonlarni esa 2131 gektarga yetkazish ishlari allaqachon boshlangan. Yangidan ochib obod qilinayotgan yerlarda chorvachilik va pillachilikni tashkil etishga urgʻu berish, qishloq xoʻjaligi mahsulotlarini 2 ming  tonnasini qayta ishlash orqali 1,2 million AQSH dollariga teng tayyor mahsulotni xorijga eksport qilish koʻzda tutilmoqda. 

Yuqoridagi maqsadlarga erishish uchun ayni kunda tumanda kelgusi yil hosiliga puxta zamin tayyorlanmoqda. Hududda jami  9 ming gektardan oshiq yer maydonida kuzgi shudgorlash ishlari jadal surʼatda olib borilmoqda. Buning uchun mavsumoldi texnik koʻrikdan oʻtkazilgan jami 47 ta yuqori unumli haydov traktori jalb qilingan. Bugunga kelib shudgorlanadigan maydonning 7130 gektari yoki belgilangan konturlarning 79 foizi talab darajasida chuqur haydalib, “shoʻr yuvish” ishlariga tayyorlab qoʻyildi. Agrotexnik tadbirlarni ilgʻorlar safida ado etayotgan ayrim  peshqadam xoʻjaliklarda sugʻorish ishlari allaqachon boshlangan. 

Bu jarayonda agroinspeksiya maʼsul xodimlari daladagi  haydov traktorlari sozligi, barqaror ishlashi va mexanizatorlarga zarur yoqilgʻi, ehtiyot qism va ish haqlarining vaqtida yetkazib berilishi hamda ularga yaratilgan sharoitlarni nazoratga olib, yaqindan koʻmaklashib, shudgorlash ishlarini muddatida yakunlash choralarini koʻrmoqdalar. Har yilgi kabi tumanda shudgorlash oldidan har gektar hisobida 5 tonnadan mahalliy oʻgʻit kiritishga alohida eʼtibor qaratilmoqda.

Bu kabi agrotexnik tadbirlari Pirmast, Kumushkent, Xalach, Shakarkent, Kosari, Xayrxush kabi 14 ta hududda talab darajasida tashkillashtirilgan boʻlib,  yer haydash barobarida hududdagi suv yoʻllari, ariq-zovurlarni tozalash, fermer hamda tomorqa yer egalarini bu ishlarga jalb qilish, hashar yoʻli bilan xoʻjaliklar ekin yerlarini obodonlashtirish ishlari bormoqda.  

Mutaxassislar fikricha, “shoʻr yuvish” oldidan ekin yeri 35-40 santimetr chuqurlikda shudgor qilinib, molalanmoqda. Uzun yelkanli tekislagich bilan ikki yoʻnalishda, qiyalik farqi 5 santimetrda tekislash ishlari olib borilmoqda. Shoʻrlangan konturlarni chuqur shudgorlashdan chiqarib, qish mavsumida imkon qadar bostirib sugʻorish taqozo etiladi. Bu borada hududlarda oʻrganishlarini olib borayotgan ishchi guruhlari tomonidan fermer xoʻjaliklariga kerakli yoʻl-yoʻriq va tavsiyalar berilmoqda.

Viloyat hokimligi matbuot xizmati