Buxoro viloyati hokimligi

Ma’lumotlarga ko‘ra, hozirda butun dunyo aholisining 1 milliarddan ortig‘ida, ya’ni yettita kishidan kamida bittasida muayan bir turdagi nogironlik mavjud. Barcha nogironlarning 100 milliondan ortig‘ini bolalar tashkil etadi. Nogironligi bo‘lgan shaxslar kunining nishonlanishidan asosiy maqsad–butun dunyoda amalga oshiriladigan dastur va loyihalarda nogironlar boshqa nogiron bo‘lmagan kishilar bilan teng huquqlilik asosida ishtirok etishini, nogironlarning manfaatlari, huquqlari inobatga olinishini, barcha mamlakatlarda nogironlarning qadr-qimmatini himoyalovchi qonunlar va tartib-taomillarning joriy etilishini ta’minlab, barcha uchun ochiq va do‘stona bo‘lgan jamiyat qurishdan iboratdir.

Ayni kunda viloyatimizda 44 ming 300 nafar atrofida nogironligi bo‘lgan fuqarolar istiqomat qilayotgan bo‘lishsa, shundan 4 ming nafardan oshig‘i birinchi guruhga mansubdir. Tizimda olib borilayotgan xalqchil islohot, ijtimoiy muhofaza chora-tadbirlari natijasida viloyatimizdagi 212 ming nafardan ortiq keksa avlod vakillari, jumladan, 16 mingga yaqin nogironligi mavjud keksalar, Ikkinchi jahon urushi qatnashchisi, mehnat fronti faxriylari bugun davlatimizning kafolatli ijtimoiy himoyasi ostida umrguzaronlik qilishmoqda. 

Xususan, har yili o‘zgalar parvarishiga muhtoj bo‘lgan 400 nafarga yaqin yakka-yolg‘iz keksalar sanatoriylarga sog‘lomlashtirishga yuborilayotgan bo‘lib, 900 ga yaqin  nogironligi bo‘lgan keksalar zarur nogironlik aravachalari, yana shuncha fuqaro  eshitish moslamalari, jami 500 nafardan oshiq jismoniy imkoniyati cheklangan fuqaro qo‘ltiqtayoq va hassa bilan ta’minlab kelinmoqda. 

Mazkur sana har yili yurtimizda keng ko‘lamda nishonlanib, bu boradagi ezgu ishlar yana bir bor saralanadi. Ayniqsa, shu kuni xasta va bemorlar, boquvchisini yo‘qotgan, yolg‘iz kishilar kabi mehrga muhtojlar holidan xabar olinadi. Kuni kecha shunday mehr-saxovat tadbiri Buxoro tumanida ham “Oqshom” to‘yxonasida tashkil etildi. 

3-dekabr — Xalqaro nogironlar kuni munosabati bilan tashkil qilingan bayram tadbirida tuman mutasaddilari, jamoatchilik vakillari, nogironligi bo‘lgan fuqarolar va ular oila a’zolari hozir bo‘ldilar. 

Tadbirda bu sana alohida nishonlanishidan maqsad butun dunyoda amalga oshiriladigan dastur va loyihalarda nogironlar boshqa nogiron bo‘lmagan kishilar bilan teng huquqlilik asosida ishtirok etishini, nogironlarning manfaatlari, huquqlari inobatga olinishini, barcha mamlakatlarda nogironlarning qadr-qimmatini himoyalovchi qonunlar va tartib-taomillarning joriy etilishini ta’minlab, barcha uchun ochiq va do‘stona bo‘lgan jamiyat qurishdan iborat ekani e’tirof etildi. 

— Har kim ham baholiqudrat, imkoniyati yetguncha nogironlarga yordam qo‘lini cho‘zishi bag‘rikeng xalqimiz azaliy qadriyatlaridan desak, mubolag‘a emas, —  deydi Nogironlar jamiyatining Buxoro tumani Kengashi raisi Hamid Gʻaniyev. — Inson borki, mehrga, e’tiborga ehtiyoj sezadi. Kimningdir ko‘nglini ko‘tarish, holidan xabar olish asl insoniylikdan. Yurtimizda jismoniy imkoniyati cheklangan yurtdoshlarimizning hech kimdan kam bo‘lmasdan, o‘zlarini shu yurtning to‘laqonli a’zosi sifatida his etishlari, hatto, xalq xo‘jaligining turli tarmoqlarida ishlab, turmush kechirishlari uchun bugun barcha imkoniyat ishga solinmoqda. 

Shu kuni tadbirda yig‘ilganlarga homiy tashkilotlarining esdalik sovg‘alari topshirildi hamda tuman madaniyat bo‘limi tomonidan tashkil etilgan konsert dasturi barchaga bayramona kayfiyat ulashdi. 

Viloyat hokimligi matbuot xizmati