Buxoro viloyati hokimligi

Ekin yerlaridan samarali foydalanish, fermer, dehqon xo‘jaliklari va tomorqa yer egalarining huquqlari va qonuniy manfaatlarini himoya qilish, qishloqda fuqarolarning bandligi va farovonligini oshirish bo‘yicha viloyatimizda ham tizimli ishlar amalga oshirilmoqda. Yuqoridagi qarorga muvofiq, fermer, dehqon xo‘jaliklari va tomorqa yer egalari faoliyatini moddiy qo‘llab-quvvatlash maqsadida O‘zbekiston fermerlari kengashi huzurida Fermer xo‘jaliklarini qo‘llab-quvvatlash jamg‘armasi tashkil qilingan.

Kuni kecha Jondor tumanida tashkil qilingan ko‘rgazmali o‘quv-amaliy seminari shu mavzuda bo‘ldi. Yuqoridagi jamg‘arma viloyat vakili, tuman hokimligi qishloq xo‘jaligi hamda fermerlar kengashi tuman bo‘limlari mas’ullari, fermer va dehqon xo‘jaliklari rahbarlari qatnashgan seminarda hukumat tomonidan yaratilgan imkoniyatlardan unumli foydalanish masalalari muhokama qilindi.     

Qayd qilinganidek, fermer va dehqon xo‘jaliklari, boshqa qishloq xo‘jaligi korxonalariga chorvachilik (qoramol, qo‘y, echki), baliqchilik, quyonchilik, asalarichilik, kurkachilik va parrandachilik, biogumus ishlab chiqarish, agroturizm loyihalari, suv chiqarish uchun tejamkor nasos agregatlari xarid qilish, qishloq xo‘jaligi maqsadlarida quyosh panellarini o‘rnatish, artezian quduqlarini qazish, yomg‘irlatib sug‘orish tizimini o‘rnatish va dala do‘konlarini qurish uchun — 1 yilgacha imtiyozli davr bilan 4 yil muddatga kreditlar ajratilmoqda.  

Fermer va dehqon xo‘jaliklari, boshqa qishloq xo‘jaligi korxonalariga bog‘dorchilik (ko‘chatchilik), uzumchilik (tok so‘risi) va limonchilikni tashkil etish, issiqxona qurish, qishloq xo‘jaligi texnikasi va transporti hamda asbob-uskunalarini xarid qilish, ko‘chma muzlatkichlarni o‘rnatish, “in-vitro” va boshqa laboratoriyalar, sovutish omborxonalarini tashkil etish uchun — 3 yilgacha imtiyozli davr bilan 7 yilgacha kreditlar ajratish tartibi joriy qilingan. 

Jumladan, yuqori unumdor traktor xaridi uchun jamg‘arma ko‘magida “Xo‘jaev Sharif” fermer xo‘jaligiga 548 million so‘m, xuddi shunday “Miraziz Mirzobek” MChJga 360 million so‘m imtiyozli kredit mablag‘i ajratilgani e’tirof qilindi. Seminarda “Xo‘jaev Sharif” fermer xo‘jaligi “Lovol-1454” rusumli, “Miraziz Mirzobek” MChJ esa “Belarus-80” rusumli yuqori unumdor texnika vositalarini qabul qildilar. 

Tadbirda qishloq xo‘jaligi korxonalari vakillariga imtiyozli tartibda kredit mablag‘i olish uchun hokim yordamchisi va viloyat Fermerlar kengashi tavsiyanomasi, garov ta’minoti hamda ijobiy kredit tarixi talab etilishi tushuntirildi. Bu sa’y-harakat fermer xo‘jaliklarining texnika bilan ta’minlanish darajasini oshirish, mehnat unumdorligini oshirish,  mahsulot yetishtirish samaradorligini oshirishga xizmat qiladi.

Viloyat hokimligi matbuot xizmati