Jondor: “Yashil makon” harakati doirasidagi chora-tadbirlar davom ettirilmoqda
2026-10-23 18:40:00 / Yangiliklar
Bu hududlarni ko‘kalamzorlashtirish maqsadida 100 ming tupdan ortiq turli xil manzarali daraxt ko‘chatlari yetkazib berilgan. Jumladan, katalpa, shumtol, qayrag‘och, tut hamda boshqa manzarali daraxt ko‘chatlari mahallalar, obodonlashtirish bo‘limlari, fermer xo‘jaliklari, tibbiyot muassasalari va ta’lim maskanlariga tarqatilgan.
"Yashil makon" harakati doirasida mahalla va qishloqlarni obodonlashtirish bo‘yicha Aleli mahallasida bo‘lib o‘tgan amaliy seminarda ham shu xususdagi chora-tadbirlar belgilandi. Bu borada har bir mahallada daraxt va gulzorlar maydonini ko‘paytirish, aholining mazmunli dam olishi uchun qulay shart-sharoit yaratish zarurligiga e’tibor qaratilmoqda.
Jondor davlat o‘rmon xo‘jaligi tasarrufidagi umumiy yer maydoni cho‘l massivlaridagi yaylov bilan qo‘shganda, 86 ming gektardan ziyod bo‘lib, shundan xo‘jalikning Og‘ar va Romitan bo‘limlaridagi 137 gektar sug‘oriladigan konturlarda mevali va manzarali daraxt ko‘chatxonalari tashkil etilgan.
Xuddi shunday, xalq tabobati uchun dorivor o‘simliklar, elimiz dasturxoni to‘kinligini ta’minlash uchun g‘alla va sabzavot-poliz mahsulotlari ekib yetishtirib kelinmoqda. Xo‘jalikning “Og‘ar” bo‘limi Manqufi aholi punktida ajratilgan 5 gektar maydonda tut ko‘chatxonasini barpo qilish harakati bormoqda.
Ko‘chatchilikka ixtisoslashgan davlat o‘rmon xo‘jaligi mutaxassislari ta’kidlashicha, ko‘chatlarni yetishtirishda zamonaviy agrotexnologiyalar qo‘llanilib, iqlim sharoitiga mos va sifatli bo‘lishiga alohida e’tibor qaratilmoqda. Bu esa ekilgan daraxtlarning tez moslashib, barqaror o‘sishini ta’minlaydi. Hashar doirasidagi bunday keng ko‘lamli ko‘kalamzorlashtirish ishlari nafaqat hududning ekologik muvozanatini mustahkamlaydi, balki aholi orasida tabiatga mehr, atrof-muhitga e’tibor va mas’uliyat hissini ham yanada oshiradi.
Seminarda tuman mutasaddilari tomonidan har bir mahallaning bo‘sh turgan yoki foydalanilmayotgan hududlarini aniqlab, ularda yashil maydon, park va gulzorlar tashkil etish, hududning tuproq va iqlim sharoitiga mos keladigan, manzarali va mevali daraxt ko‘chatlari hamda ko‘p yillik gullarni tanlab ekish hamda o‘tqazilgan daraxt va gullarni parvarishlash, sug‘orish tarmog‘ini shay qilishga e’tibor qaratildi.
Viloyat hokimligi matbuot xizmati