Vobkent: oshxona, restoran va kafelar uchun yana bir imkoniyat — “Mildrich” korxonasi faoliyati yo‘lga qo‘yildi
2026-10-21 22:40:00 / Yangiliklar
Mazkur korxona tadbirkorlik faoliyatini yo‘lga qo‘yish va kengaytirish istagida bo‘lgan fuqarolar uchun zarur jihozlarni bir manzildan xarid qilish imkoniyatini yaratadi. Korxonada restoran, kafe, oshxona va boshqa umumiy ovqatlanish maskanlari faoliyatida foydalaniladigan turli xil uskuna va jihozlar, shuningdek, mebel mahsulotlari savdosi yo‘lga qo‘yilgani mahalliy tadbirkor va tashabbuskorlar uchun ham qulay imkoniyatdir.
Korxona rahbari Yusuf Qodirovning ta’kidlashicha, mijozlar talabini qondirish va sifatli mahsulotlar taklif etish maqsadida Xitoy va Turkiya davlatlaridan zamonaviy uskuna va dastgohlar olib kelinmoqda. Hozirda korxona savdo do‘konida katta va kichik hajmdagi jami 300 taga yaqin uskuna va jihozlar mavjud.
Shuningdek, mijozlarga qulaylik yaratish maqsadida buyurtma asosida mahsulotlarni yetkazib berish xizmati ham yo‘lga qo‘yilgani tadbirkorlarga o‘z faoliyati uchun zarur jihozlarni ortiqcha vaqt va sarf-xarajatsiz topish imkonini beradi.
“Mildrich” savdo markazi ochilish marosimida AT “Xalq banki” viloyat mintaqaviy markazi rahbari Saidmurod Isroilov, Vobkent tumani hokimining birinchi o‘rinbosari Otabek Muqimov va boshqalar ishtirok etdilar.
Ta’kidlanganidek, hududda tadbirkorlik tashabbuslarini rivojlantirish, yangi loyihalarni qo‘llab-quvvatlash, aholi bandligini ta’minlash, fuqarolarni kambag‘allikdan chiqarishda mazkur loyihaning o‘z o‘rni bor. Bu kam ta’minlangan aholi toifasi uchun ham daromad manbai bo‘lib xizmat qiladi.
Tadbirda savdo markazi ramziy alvon lentasi qirqilgach, unda yig‘ilganlar savdo maydoni va ulardagi jihozlar, zarur texnologiyalar, zamonaviy rusumdagi ishlab chiqarish uskuna va dastgohlari bilan yaqindan tanishdilar. Ayrim xaridorlar o‘zlariga zarur texnologiya va mahsulotlarni shu yerning o‘zida xarid qildilar.
“Mildrich” korxonasining ish boshlashi tumanda xizmat ko‘rsatish sohasini rivojlantirish, umumiy ovqatlanish shoxobchalari faoliyatini kengaytirish hamda yangi tadbirkorlik tashabbuslarini rag‘batlantirishga xizmat qiladi.
Viloyat hokimligi matbuot xizmati