Buxoro viloyati hokimligi

Yig‘ilishda mavsum davomida aholi xonadonlari, ijtimoiy soha ob’yektlari, ko‘p kvartirali uylar, bozorlar va savdo majmualarida yong‘in xavfsizligi qoidalariga qat’iy rioya etish, elektr energiyasi, tabiiy gaz, ichimlik suvi va issiqlik ta’minotining barqarorligini ta’minlash yuzasidan amalga oshirilishi lozim bo‘lgan vazifalar muhokama qilindi.

Ta’kidlanganidek, viloyatda joriy yilning o‘tgan davrida 626 ta yong‘in holati qayd etilgan. Bu ko‘rsatkich o‘tgan yilning mos davriga nisbatan 23 taga kamaygan bo‘lsa-da, ayrim hududlarda yong‘inlar sonining ortishi tashvishli holat sifatida qayd etildi. Xususan, Olot, Buxoro, Qorako‘l, Gʻijduvon va Romitan tumanlari, shuningdek, Kogon shahrida yong‘in holatlari ko‘paygan.

Yong‘inlarning asosiy sabablari elektr uskunalaridan noto‘g‘ri foydalanish, ochiq alanga bilan bog‘liq ehtiyotsizlik, isitish pechlarini qurish va ishlatish qoidalarining buzilishi hamda boshqa omillar bilan izohlandi. Qayd etilgan yong‘inlarning 518 tasi, ya’ni 83 foizi aholi xonadonlarida sodir bo‘lgan. 

Ushbu holat gaz va elektr jihozlaridan foydalanishda xavfsizlik talablariga rioya etish, mo‘ri va shamollatish kanallarini muntazam tozalash, nosoz uskunalardan foydalanmaslik hamda profilaktika ishlarini yanada kuchaytirish zarurligini ko‘rsatmoqda.

Yig‘ilishda mas’ul idora va tashkilotlar, shahar va tuman hokimliklari rahbarlariga kuz-qish mavsumiga tayyorgarlik ishlarini rasmiyatchilik uchun emas, balki har bir xonadon va ijtimoiy ob’yekt xavfsizligini ta’minlash nuqtai nazaridan tashkil etish zarurligi alohida ta’kidlandi.

Jumladan, barcha aholi xonadonlarini birma-bir xatlovdan o‘tkazish, mo‘ri va shamollatish tizimlarining texnik holatini tekshirish, aniqlangan kamchiliklarni joyida bartaraf etish, qo‘lbola va nostandart elektr hamda gaz isitish moslamalaridan foydalanishga chek qo‘yish bo‘yicha aniq vazifalar belgilandi.

Shu bilan birga, ta’lim va tibbiyot muassasalarining mavsumga tayyorgarligini qisqa muddatlarda o‘rganish, isitish tizimlari va qozonxonalarning sozligini ta’minlash, zarur yoqilg‘i hamda ehtiyot qismlar zaxirasini yaratish, elektr energiyasi yoki gaz ta’minotida uzilishlar yuzaga kelgan taqdirda faoliyatni davom ettirish uchun muqobil manbalarning shayligini ta’minlash topshirildi.

Bozorlar va savdo majmualarida yong‘inga qarshi yo‘laklar, evakuatsiya chiqish joylari, suv ta’minoti hamda elektr va gaz tarmoqlarining holatini tekshirish, elektr tarmoqlaridagi ortiqcha yuklamalarni bartaraf etish, aholi va ijtimoiy soha ob’yektlarini tabiiy gaz, elektr energiyasi, ichimlik suvi va issiqlik bilan uzluksiz ta’minlash choralarini ko‘rish vazifalari ham belgilab berildi.

Ko‘p kvartirali uy-joy fondi, issiqlik manbalari, nasos stansiyalari va kommunal infratuzilma ob’yektlarini mavsumga to‘liq tayyorlash, favqulodda vaziyatlarda tezkor harakat qilish uchun avariyaviy-qutqaruv texnikalari va maxsus xizmatlar brigadalarining doimiy shayligini ta’minlashga alohida e’tibor qaratildi.

Mahallalarda aholi o‘rtasida is gazidan zaharlanish, yong‘in va havo-gaz aralashmasi chaqnashining oldini olishga qaratilgan tushuntirish ishlarini kuchaytirish, xavfsizlik qoidalarini keng targ‘ib qilish, shuningdek, televideniye orqali mazkur hodisalarning ayanchli oqibatlari aks etgan videoroliklarni muntazam namoyish etib borish tavsiya etildi.

Shahar va tuman hokimliklariga kommunal xizmatlar bilan bog‘liq murojaatlarni tezkor qabul qilish va hal etish maqsadida 24 soatlik navbatchilik hamda dispetcherlik tizimini tashkil etish vazifasi yuklatildi.

Yig‘ilish yakunida belgilangan vazifalar ijrosini qat’iy nazoratga olish, mas’ul rahbarlarning shaxsiy javobgarligini oshirish, mavsum davomida yuzaga kelishi mumkin bo‘lgan xavf-xatarlarni oldindan aniqlash va bartaraf etish zarurligi ta’kidlandi.

Asosiy maqsad — kuz-qish mavsumini aholi uchun xavfsiz va qulay sharoitda o‘tkazish, yong‘in, is gazidan zaharlanish va boshqa favqulodda hodisalarning oldini olish, eng muhimi, inson hayoti va salomatligini asrashdan iborat.

Viloyat hokimligi matbuot xizmati