Buxoro viloyati hokimligi

Mazkur markazning tashkil etilishi O‘zbekiston va Ozarbayjon xalqlari o‘rtasidagi tarixiy-madaniy aloqalarni yanada mustahkamlash, ikki qardosh xalqning boy ilmiy-ma’naviy merosini chuqur o‘rganish hamda yosh avlodning tarixiy bilimlarini kengaytirish yo‘lidagi muhim tashabbuslardan biri hisoblanadi.
 
Tantanali ochilish marosimida Buxoro davlat universiteti rahbariyati, Haydar Aliyev nomidagi Ozarbayjon madaniyat markazi vakillari, Tarix fakulteti professor-o‘qituvchilari, tadqiqotchilar hamda talaba-yoshlar ishtirok etdi.
 
Tadbir davomida O‘zbekiston va Ozarbayjon xalqlarini birlashtirib turuvchi ko‘p asrlik do‘stlik rishtalari, mushtarak tarixiy ildizlar, umumiy ma’naviy qadriyatlar va boy madaniy meros xususida so‘z yuritildi. Shuningdek, ikki mamlakat o‘rtasida ta’lim, ilm-fan va madaniyat sohalaridagi hamkorlikni yanada rivojlantirish, ilmiy aloqalarni mustahkamlash hamda madaniy merosni kelajak avlodlarga yetkazish masalalariga alohida e’tibor qaratildi.
 
Ta’kidlanganidek, xalqlar o‘rtasidagi do‘stlik va hamjihatlikni mustahkamlashda ilm-fan, ta’lim va madaniyat sohalaridagi hamkorlik muhim o‘rin tutadi. Ayniqsa, tarixiy shaxslar hayoti va ijodini o‘rganish, ularning ilmiy-falsafiy qarashlarini tadqiq etish orqali xalqlar o‘rtasidagi ma’naviy yaqinlikni yanada chuqurroq anglash mumkin.
 
Tantanali marosimdan so‘ng ishtirokchilar markazda yaratilgan sharoitlar, mavjud ilmiy-ma’rifiy imkoniyatlar va kelgusida amalga oshirilishi rejalashtirilgan ishlar bilan yaqindan tanishdilar.
 
Yangi markaz faoliyatida Ozarbayjon tarixi, milliy madaniyati, adabiyoti, san’ati va ilmiy merosini o‘rganishga alohida e’tibor qaratilishi ko‘zda tutilgan. Shu bilan birga, mazkur maskan talabalar, yosh tadqiqotchilar va professor-o‘qituvchilar uchun ilmiy izlanishlar olib borish, tarixiy manbalar bilan ishlash hamda turkiy xalqlarning mushtarak merosini tadqiq etishda muhim maydon bo‘lib xizmat qilishi kutilmoqda.
 
Shu kuni universitet va Haydar Aliyev nomidagi Ozarbayjon madaniyat markazi vakillari ishtirokida davra suhbati tashkil etildi. Samimiy muloqot davomida O‘zbekiston va Ozarbayjon xalqlarining tarixiy-madaniy aloqalari, turkiy xalqlarning mushtarak ilmiy va adabiy merosi, shuningdek, ikki mamlakat o‘rtasidagi ta’lim va ilm-fan sohalaridagi hamkorlikni yangi bosqichga olib chiqish istiqbollari yuzasidan fikr almashildi.
 
Davra suhbatida buyuk mutafakkir Yusuf Qorabog‘iyning hayoti va ilmiy-falsafiy merosini har tomonlama o‘rganish masalasiga ham alohida e’tibor qaratildi. Uning ilmiy qarashlarini tadqiq etish, hayoti va ijodiga oid manbalarni o‘rganish, shuningdek, ushbu merosni zamonaviy ilmiy yondashuvlar asosida yosh avlodga yetkazish muhim vazifalardan biri sifatida qayd etildi.
 
Shuningdek, markaz faoliyati doirasida ilmiy seminarlar, davra suhbatlari, ma’naviy-ma’rifiy uchrashuvlar va ilmiy konferensiyalar tashkil etish, qo‘shma tadqiqotlarni amalga oshirish hamda ikki mamlakat oliy ta’lim muassasalari o‘rtasidagi akademik aloqalarni kengaytirish imkoniyatlari muhokama qilindi. Bu kabi tashabbuslar talabalarning ilmiy salohiyatini oshirish, yosh tadqiqotchilarni qo‘llab-quvvatlash va xalqaro ilmiy tajriba almashinuvini rivojlantirishga xizmat qilishi ta’kidlandi.
 
Tadbir doirasida Ozarbayjonshunoslik markaziga kitoblar taqdim etildi. Mazkur adabiyotlar markazning ilmiy-ma’rifiy fondini boyitish, talabalar va tadqiqotchilarning Ozarbayjon tarixi, madaniyati, adabiyoti hamda ilmiy-ma’naviy merosiga oid bilimlarini kengaytirishda muhim ahamiyat kasb etadi. Kitoblardan ta’lim jarayonida, ilmiy izlanishlarda va turli ma’rifiy tadbirlarni tashkil etishda foydalanish imkoniyati yaratiladi.
 
Mazkur markazning ochilishi Buxoro davlat universiteti va Ozarbayjonning tegishli ilmiy-madaniy muassasalari o‘rtasidagi hamkorlikni mustahkamlash, o‘zaro tajriba almashish va yangi qo‘shma loyihalarni amalga oshirish uchun keng imkoniyatlar yaratadi. Eng muhimi, u ikki xalqning mushtarak tarixini, milliy qadriyatlarini va boy ma’naviy merosini chuqur o‘rganishga, ularni yosh avlod ongiga singdirishga xizmat qiladi.
 
Yusuf Qorabog‘iy nomidagi ozarbayjonshunoslik markazining faoliyat boshlashi Buxoro davlat universitetida xalqaro ilmiy-madaniy hamkorlikni rivojlantirish yo‘lidagi muhim voqea bo‘ldi. Ushbu tashabbus O‘zbekiston va Ozarbayjon o‘rtasidagi do‘stlik va birodarlik munosabatlarini yanada mustahkamlash, ilm-fan va ta’lim sohalaridagi aloqalarni kengaytirish hamda ikki qardosh xalqning boy merosini kelgusi avlodlarga yetkazishga munosib hissa qo‘shadi.
 
Viloyat hokimligi matbuot xizmati