Buxoro viloyati hokimligi

Xususan, “Ijro.gov.uz” ijro intizomi idoralararo yagona elektron tizimi orqali Oʻzbekiston Respublikasi Prezidentining Farmon, qaror va farmoyishlari, Prezident topshiriqlari hamda majlis bayonlarida belgilangan vazifalar oʻz vaqtida ijroga qaratilib, ularning sifatli va toʻliq bajarilishi qatʼiy nazoratga olingan.

Haftaning har dushanba kuni Buxoro viloyati hokimi rahbarligida, chorshanba va juma kunlari esa viloyat hokimining birinchi oʻrinbosari huzurida ijro intizomining holati tanqidiy-tahliliy muhokama qilib borilmoqda. Oʻzbekiston Respublikasi Prezidenti, Prezident Administratsiyasi hamda Vazirlar Mahkamasining hujjatlari va topshiriqlari ijrosi kunbay va soatbay nazorat qilinmoqda.

“Ijro.gov.uz” tizimiga kiritilgan qonunchilik hujjatlari va topshiriqlari Adliya vazirligi, Vazirlar Mahkamasi hamda Hisob palatasi tomonidan tegishli tartibda ekspertizadan oʻtkazilgandan soʻng nazoratdan yechilishini inobatga olib, ularning belgilangan muddatlarda va puxta bajarilishini taʼminlash maqsadida viloyat hokimligi apparatida oldindan ogohlantirish tizimi yoʻlga qoʻyilgan.

Mazkur tizim doirasida har hafta ikki marotaba kelgusi oyning yakuniga qadar ijro muddati yetib keladigan topshiriqlar roʻyxati eslatma tarzida hokim oʻrinbosarlari, maslahatchilari, boʻlinma rahbarlari hamda tuman va shahar hokimliklariga yetkazib borilmoqda.

Shuningdek, viloyat hokimligi apparatida qonunchilik hujjatlari va topshiriqlari ijrosi haqidagi maʼlumotlarni ijro muddati yakunlanishini kutmasdan, elektron tizimga oldindan kiritib borish masalasiga alohida eʼtibor qaratilmoqda.

Qonunchilik hujjatlari va topshiriqlari ijrosini joylarda oʻrganish, aniqlangan kamchiliklarni bartaraf etish hamda masʼullarga amaliy yordam koʻrsatish maqsadida viloyat hokimligi apparatining masʼul xodimlari tomonidan har oyda kamida bitta tuman yoki shahar hokimligida hamda viloyat boshqarma, korxona va tashkilotlarida maqsadli oʻrganishlar oʻtkazilmoqda.

Jumladan, 2026-yilning fevral oyida Jondor tumani hokimligida, mart oyida Buxoro avtomobil yoʻllari hududiy boshqarmasida, aprel oyida Qorakoʻl tumani hokimligida, may oyida viloyat ekologiya, atrof-muhitni muhofaza qilish va iqlim oʻzgarishi boshqarmasida, iyun oyida Peshku tumani hokimligida, avgust oyida Shofirkon tumani hokimligida hamda sentabr oyida Sanitariya-epidemiologik osoyishtalik va jamoat salomatligi xizmati viloyat boshqarmasida qonunchilik hujjatlari va topshiriqlari ijrosi holati oʻrganilib, topshiriqlar ijrosini tashkil etish yuzasidan amaliy yordam koʻrsatildi.

2026-yilning yanvar–sentabr oylari davomida viloyat hokimligi apparatida ijro intizomining holati 67 marotaba muhokama qilindi.

Viloyat hokimligi boshqaruv apparatida ijro intizomini mustahkamlash boʻyicha belgilangan vazifalardan kelib chiqib, har bir topshiriqqa “temir intizom” tamoyili asosida jiddiy yondashilmoqda. Oʻzbekiston Respublikasi Prezidenti va Hukumat topshiriqlarini oʻz vaqtida, samarali hamda toʻliq bajarishda viloyat hokimi oʻrinbosarlari, viloyat korxona va tashkilotlari rahbarlari, tuman va shahar hokimlarining roli hamda shaxsiy javobgarligini oshirishga alohida eʼtibor qaratilmoqda.

Topshiriqlar ijrosida sustkashlikka yoʻl qoʻygan masʼul rahbarlarga nisbatan belgilangan tartibda intizomiy taʼsir choralari koʻrib borilmoqda.

“Ijro.gov.uz” ijro intizomi idoralararo yagona elektron tizimi orqali 2026-yil yanvar–sentabr oylari davomida viloyatga daxldor jami 3 636 ta topshiriq kelib tushgan.

Shundan, 2 217 tasi — viloyat hokimligi asosiy ijrochi sifatida, 1 419 tasi — viloyat hokimligi hamijrochi sifatida belgilangan.

Mazkur topshiriqlarning 3 618 tasi, yaʼni 99,5 foizi ijrosi taʼminlanib, nazoratdan yechilgan.

Qolgan 18 ta topshiriqda viloyat hokimligi hamijrochi sifatida belgilangan boʻlib, ayni vaqtda ularning ijrosini taʼminlash boʻyicha tegishli choralar koʻrilmoqda.

Shuningdek, “Ijro.gov.uz” ijro intizomi idoralararo yagona elektron tizimining Prezident Administratsiyasi modulida viloyat hokimligiga daxldor 440 ta, Vazirlar Mahkamasi topshiriqlari modulida esa 1 163 ta topshiriq kelib tushgan boʻlib, ularning barchasi boʻyicha ijro taʼminlangan.

2026-yil oktabr oyida kelib tushgan topshiriqlar ijrosini taʼminlash maqsadida kunbay kalendar grafik ishlab chiqildi.

Shuningdek, har bir hokim oʻrinbosari kesimida “Yoʻl xarita”lari ishlab chiqilib, tasdiqlandi va ijroga qaratildi.

Oktabr oyida Oʻzbekiston Respublikasi Prezidentining 277 ta topshirigʻi nazoratga olingan boʻlib, shundan 74 tasining ijrosi muddatidan oldin taʼminlandi.

Qolgan topshiriqlar ijrosini belgilangan muddatlarda, sifatli va toʻliq taʼminlash yuzasidan barcha zarur choralar koʻrilmoqda.

Umuman, viloyatda Oʻzbekiston Respublikasi Prezidentining, Prezident Administratsiyasining hamda Vazirlar Mahkamasining oktabr oyida belgilangan topshiriqlari ijrosini oʻz vaqtida va sifatli taʼminlash, ijro intizomini yanada mustahkamlash hamda masʼul rahbarlarning shaxsiy javobgarligini oshirish boʻyicha tizimli ishlar davom ettirilmoqda.

Umid Qoʻshshayev,
Viloyat hokimligi boshqaruv apparati ijro intizomi nazorati boʻlimi boshligʻi