Buxoro viloyati hokimligi

Buxoroning noyob tarixiy obidalari jamlangan Poyi Kalon maydonida oʻtkazilgan mazkur musiqiy kecha nafaqat sanʼat ixlosmandlari, balki ikki mamlakat oʻrtasidagi madaniy-gumanitar hamkorlikka qiziquvchi keng jamoatchilik uchun ham muhim tadbir boʻldi.

Tadbirda viloyat hokimi Botir Zaripov, Fransiyaning Oʻzbekistondagi Favqulodda va Muxtor Elchisi Ualid Fuk, madaniyat va sanʼat sohasi vakillari, xorijiy mehmonlar, ijodkorlar hamda Buxoro ahli ishtirok etdi.

Tadbir avvalida viloyat hokimi Botir Zaripov soʻzga chiqib, yigʻilganlarni qutladi. Oʻz nutqida u Poyi Kalon maydonida yangraydigan har bir kuy nafaqat sanʼat asari, balki turli davrlar va madaniyatlarni bogʻlovchi oʻziga xos muloqot vositasi ekanini taʼkidladi.

Fransiyaning Oʻzbekistondagi Favqulodda va Muxtor Elchisi Ualid Fuk esa madaniy almashinuvlar xalqlar oʻrtasidagi oʻzaro anglashuv va doʻstlikni mustahkamlashda muhim ahamiyat kasb etishini qayd etdi.

Taʼkidlanganidek, Oʻzbekiston va Fransiya oʻrtasidagi munosabatlarda madaniy-gumanitar hamkorlik alohida oʻrin tutadi. Keyingi yillarda ikki mamlakat oʻrtasida sanʼat, madaniyat, taʼlim va boshqa sohalardagi aloqalar izchil rivojlanib bormoqda. Fransiya madaniyati kunlari doirasida Buxoroda oʻtkazilayotgan tadbirlar ham ana shu hamkorlikning amaliy ifodasidir.

Konsert dasturidan mumtoz musiqaning turli davrlarini namoyon etuvchi kompozitorlar asarlari oʻrin oldi. Kristin Fonluptning yuqori ijro mahorati va oʻziga xos talqini tomoshabinlarga mumtoz fortepiano musiqasining betakror olamini his etish imkonini berdi.

Ayniqsa, konsertning Poyi Kalon ansambli bagʻrida, Buxoroning asrlar silsilasini oʻzida mujassam etgan tarixiy muhitida oʻtkazilgani tadbirga alohida mazmun bagʻishladi. Qadimiy meʼmorlik va mumtoz musiqa uygʻunligi ishtirokchilar uchun oʻziga xos estetik muhit yaratdi.

Musiqa kechasi davomida sanʼatning til, chegara va masofani bilmaydigan, inson qalbiga bevosita taʼsir koʻrsatuvchi universal vosita ekani yana bir bor namoyon boʻldi. Turli madaniyat va anʼanalarni bir makonda birlashtirgan mazkur tadbir xalqlar oʻrtasidagi doʻstlik va oʻzaro hurmatni yanada mustahkamlashga xizmat qildi.

Shu maʼnoda, Buxoroda oʻtkazilgan fortepiano konserti Fransiya madaniyati oyligining muhim tadbirlaridan biri sifatida tarixiy shaharning boy madaniy hayotiga yana bir mazmunli sahifa qoʻshdi.

Tadbir yakunida ishtirokchilarga yuksak badiiy saviyadagi musiqiy dastur va betakror tarixiy muhit uygʻunligi yuqori taassurot qoldirdi.

Viloyat hokimligi matbuot xizmati