Buxoro viloyati hokimligi

Unda viloyat hokimi Botir Zaripov, taʼlim tizimi xodimlari, ustoz va murabbiylar, soha faxriylari hamda davlat mukofotlariga sazovor boʻlganlar ishtirok etdi.

Tadbirda viloyat hokimi Botir Zaripov soʻzga chiqib, barcha ustoz va murabbiylarni yaqinlashib kelayotgan qutlugʻ ayyom bilan samimiy muborakbod etdi.

— Dunyoda shunday kasb egalari borki, ularsiz hayotimizni tasavvur qilish qiyin. Oʻqituvchilar esa hayotimiz charogʻbonlaridir. Kim boʻlmaylik, qaysi sohada ishlamaylik, barchamizga muallimlar taʼlim va tarbiya berishgan, — dedi viloyat hokimi.

Taʼkidlanganidek, bugungi kunda yoshlarning har tomonlama barkamol boʻlib voyaga yetishi, fan va texnika, madaniyat va sanʼat, sport kabi sohalarda katta marralarni zabt etayotgani zamirida fidoyi ustoz va murabbiylarning beqiyos mehnati mujassam.

Shu bois, ustozlarga bildirilayotgan har qanday minnatdorchilik ularning mashaqqatli va sharafli mehnati oldida kamlik qiladi.

Tadbirda taʼlim sohasiga qaratilayotgan eʼtibor, oʻqituvchilarning jamiyatdagi nufuzi va maqomini yuksaltirish borasida amalga oshirilayotgan ishlarga ham toʻxtalib oʻtildi.

Prezident Shavkat Mirziyoyev taʼkidlaganidek, “muallimning obroʻ-eʼtibori — bu avvalo millatning, butun xalqning obroʻ-eʼtiboridir”. Shu nuqtayi nazardan keyingi yillarda oʻqituvchi va murabbiylarning jamiyat hayotidagi oʻrni va taʼsirini kuchaytirish, taʼlim tizimini zamon talablari asosida tashkil etish borasida keng koʻlamli islohotlar amalga oshirilmoqda.

Bugungi kunda Buxoro viloyatidagi 2 791 ta taʼlim dargohida 53 158 nafardan ortiq pedagog-xodim faoliyat olib bormoqda.

Keyingi yillarda taʼlim muassasalarining moddiy-texnik bazasini mustahkamlash, zamonaviy va qulay taʼlim sharoitlarini yaratish borasida ham salmoqli ishlar amalga oshirilmoqda.

Xususan, joriy yilning oʻzida viloyat maktabgacha va maktab taʼlimi tizimidagi 236 ta taʼlim muassasasida qurilish-taʼmirlash va moddiy-texnik bazasini mustahkamlash ishlari olib borilmoqda. Bu maqsadlar uchun jami 1,4 trillion soʻm mablagʻ yoʻnaltirilmoqda.

Bunday keng koʻlamli ishlar oʻz samarasini berib, buxorolik oʻquvchi-yoshlar xalqaro va respublika miqyosidagi nufuzli bilim va sport musobaqalari, sanʼat festivallari hamda tanlovlarda munosib natijalarni qoʻlga kiritib kelmoqda.

Jumladan, joriy yilda viloyatimiz vakillari xalqaro va respublika fan olimpiadalarida 33 ta sovrinli oʻrinni qoʻlga kiritdi.

Shuningdek, ushbu oʻquv yilida oʻtkazilgan test sinovlarida ishtirok etgan viloyat bitiruvchilari oʻrtacha 110,8 ball toʻplab, respublikadagi eng yuqori koʻrsatkichlardan birini qayd etdi.

Bu natijalar, avvalo, oʻquvchilarning bilimi va intilishi bilan bir qatorda, ularni tayyorlagan ustozlarning mehnati, tajribasi va tinimsiz izlanishlarining samarasidir.

Zero, ustozning mehnati birgina olimpiada natijasi, bitiruvchining toʻplagan bali yoki qoʻlga kiritilgan medal bilan oʻlchanmaydi. Hayotdagi har bir muvaffaqiyatli qadam, har bir yutuq va ezgu natija zamirida ustozning mashaqqatli mehnati, sabr-toqati va mehri bor.

Tadbirda oʻqituvchi va murabbiylarning jamiyatdagi maqomi soʻnggi yillarda tubdan yuksalayotgani alohida taʼkidlandi.

Xususan, bundan oʻn yillar avval oʻqituvchilar va davlat tashkilotlari xodimlarining paxta yigʻim-terimiga jalb etilgani, hatto 1-oktyabr — Oʻqituvchi va murabbiylar kunida ham ayrim hollarda bayram tadbirlaridan soʻng ularning paxta dalalariga yoʻnaltirilgani yodga olindi.

Bugun esa oʻqituvchi va murabbiyning shaʼni, qadr-qimmati va kasbiy nufuzini yuksaltirish davlat siyosati darajasiga koʻtarilgan.

Yaqinda Prezident farmoniga muvofiq taʼlim-tarbiya tizimida alohida oʻrnak koʻrsatgan bir guruh xodimlarning davlat mukofotlari bilan taqdirlangani ham buning yaqqol ifodasidir.

Faxr bilan taʼkidlash joizki, mazkur Farmonga muvofiq Buxoro viloyatining 6 nafar vakili ham davlatimizning yuksak mukofotlariga sazovor boʻldi. Shuningdek, koʻplab fidoyi ustozlar koʻkrak nishonlari bilan taqdirlandilar.

Tantanali marosimda davlat mukofotlariga sazovor boʻlgan ustoz va murabbiylarning nomlari eʼlon qilinib, ularga yuksak mukofotlar hamda koʻkrak nishonlari tantanali ravishda topshirildi. Mukofotlanganlarga gullar taqdim etildi.

Taqdirlangan ustozlar oʻzlariga koʻrsatilgan yuksak eʼtibor va ishonch uchun minnatdorlik bildirib, yosh avlodga sifatli taʼlim va munosib tarbiya berish, mamlakat taraqqiyotiga munosib hissa qoʻshish yoʻlida bundan buyon ham sidqidildan mehnat qilishlarini taʼkidladilar.

Shuningdek, tadbirda taʼlim-tarbiya sohasida koʻp yillik samarali mehnati, fidoyiligi va kasbiga sadoqati bilan alohida oʻrnak koʻrsatib kelayotgan bir guruh ustoz va murabbiylar ham munosib taqdirlandi.

Ularga “Xalq taʼlimi fidoyisi”, “Xalq taʼlimi aʼlochisi”, “Oʻrta maxsus va professional taʼlim aʼlochisi” hamda “Oliy taʼlim aʼlochisi” koʻkrak nishonlari tantanali ravishda topshirildi.

Mazkur eʼtirof ustoz va murabbiylarning taʼlim-tarbiya sohasi rivojiga qoʻshayotgan munosib hissasi, yosh avlodga sifatli bilim va tarbiya berish yoʻlidagi fidokorona mehnatining munosib bahosi boʻldi.

Tadbirda soʻz olgan ustozlar davlat tomonidan oʻqituvchi va murabbiylarga qaratilayotgan eʼtibor ularni yanada katta masʼuliyat bilan ishlashga undayotganini qayd etdilar.

Tantanali marosim soʻngida viloyat hokimi Botir Zaripov barcha ustoz va murabbiylarni 1-oktyabr — Oʻqituvchi va murabbiylar kuni bilan yana bir bor samimiy muborakbod etdi.

Ularga mustahkam sihat-salomatlik, oilaviy baxt, kasbiy faoliyatlarida ulkan muvaffaqiyatlar, xonadonlariga tinchlik-xotirjamlik, fayzu baraka tiladi.

Zero, ustoz bor ekan — ilm bor, maʼrifat bor, taraqqiyot bor. Ustozga ehtirom esa millat kelajagiga ehtiromdir.

Viloyat hokimligi matbuot xizmati