Buxoro viloyati hokimligi

Ana shunday yosh iqtidor egalaridan biri —Gʻijduvon tumanidagi Taxtaxon qishlogʻida tugʻilib, voyaga yetgan Yoʻldoshbek Saidovdir.

Bugungi kunda u Fransiyaning davlat boshqaruvi sohasidagi eng nufuzli taʼlim muassasalaridan biri — Davlat xizmati milliy institutining (INSP) Xalqaro malaka oshirish dasturida tahsil olmoqda.

Mazkur dastur davlat va hududiy boshqaruv sohasida faoliyat yuritayotgan mutaxassislar uchun ilgʻor xalqaro tajribani oʻrganish, zamonaviy boshqaruv usullari boʻyicha bilim va amaliy koʻnikmalarni oshirish, turli mamlakatlar vakillari bilan tajriba almashish imkonini beradi.

Yoʻldoshbek Saidov mazkur nufuzli dasturga qabul qilinishi bilan birga, institut direktori tomonidan ajratilgan maxsus stipendiyaga ham sazovor boʻldi. Bu uning taʼlim va kasbiy faoliyatda erishgan natijalari xalqaro darajada munosib baholanganidan dalolat beradi.
Yoʻldoshbekning xalqaro taʼlim yoʻli bundan avval ham Fransiya bilan bogʻliq. U “El-yurt umidi” jamgʻarmasi stipendiyasi asosida 2022–2024-yillarda Fransiyaning Strasburg universitetida magistratura bosqichida tahsil olib, uni muvaffaqiyatli tamomlagan.

Strasburgda olgan bilim va tajribasini amaliyot bilan uygʻunlashtirib kelayotgan yosh mutaxassis uchun INSPdagi malaka oshirish dasturi yangi bosqich vazifasini oʻtamoqda.

Bu yerda u davlat va hududiy boshqaruv, strategik rejalashtirish, davlat siyosati va boshqaruv qarorlarini ishlab chiqish kabi yoʻnalishlardagi ilgʻor yondashuvlarni oʻrganib, professional salohiyatini yanada oshirish imkoniga ega boʻlmoqda.

Eng muhimi, mazkur dastur Strasburg universitetida davlat boshqaruvi yoʻnalishida olgan nazariy bilimlarini amaliy tajriba bilan boyitish, turli davlatlarning boshqaruv modellarini oʻrganish va kelgusida mamlakatimiz davlat xizmati tizimida samarali qoʻllash uchun muhim tajriba maktabi boʻlib xizmat qiladi.

Fransiyaning davlat boshqaruvi sohasidagi nufuzli taʼlim muassasalaridan biri boʻlgan INSP 2022-yilda sobiq ENA (École nationale dʻadministration) negizida tashkil etilgan.

Institut Fransiya davlat xizmati uchun yuqori malakali rahbar kadrlarni tayyorlash va davlat boshqaruvi sohasida zamonaviy yondashuvlarni rivojlantirishga ixtisoslashgan.

INSP va uning avvalgi shakli — ENA bitiruvchilari orasida Fransiyaning yuqori lavozimlarida faoliyat yuritgan koʻplab davlat arboblari, diplomatlar va xalqaro tashkilotlar vakillari bor.

Shu jihatdan, mazkur institutning xalqaro dasturida tahsil olish Yoʻldoshbek Saidov uchun nafaqat navbatdagi taʼlim bosqichi, balki davlat boshqaruvi sohasidagi xalqaro professional muhitda tajriba orttirish imkoniyati hamdir.

INSPning xalqaro dasturlariga qabul jarayoni nomzodlarning akademik tayyorgarligi, kasbiy tajribasi, til bilimi va davlat boshqaruvi sohasidagi salohiyatini inobatga olgan holda amalga oshiriladi.

Yoʻldoshbek Saidov xalqaro taʼlim va malaka oshirish bilan bir qatorda, Oʻzbekistondagi kasbiy faoliyatini ham davom ettirmoqda.

U ayni vaqtda Maktabgacha va maktab taʼlimi vazirligida yetakchi mutaxassis sifatida faoliyat olib bormoqda.

Yosh mutaxassisning davlat xizmatidagi faoliyati sport sohasidagi natijalari bilan ham uygʻunlashib kelmoqda. U respublika Sport vazirligining I darajali koʻkrak nishoni bilan taqdirlangan.

Mazkur mukofotga u davlat xizmatchilari oʻrtasida xodimlarning jismoniy tayyorgarligini baholash jarayonida yuqori natijalar koʻrsatgani uchun munosib koʻrilgan.

Bu esa Yoʻldoshbekning bilim va kasbiy salohiyat bilan bir qatorda, jismoniy tayyorgarlik, intilish va oʻz ustida ishlashga boʻlgan eʼtiborini ham namoyon etadi.
Yoʻldoshbek Saidovning taʼlim va kasbiy faoliyatdagi natijalari nafaqat uning shaxsiy yutugʻi, balki Buxoro yoshlarining bilim va salohiyati xalqaro miqyosda ham eʼtirof etilayotganining yana bir amaliy namunasidir.

Ayniqsa, viloyatning chekka hududlaridan birida tugʻilib, nufuzli xalqaro taʼlim dasturlarida ishtirok etayotgan yoshlarning safida Gʻijduvonlik yigitning ham borligi alohida ahamiyatga ega.

Bugun dunyoning nufuzli taʼlim muassasalarida tahsil olayotgan, xalqaro dastur va loyihalarda ishtirok etayotgan buxorolik yoshlar soni ortib bormoqda. Ularning har bir yutugʻi yurtimizda yoshlarga yaratilayotgan imkoniyatlarning amaliy samarasi sifatida namoyon boʻlmoqda.

Yoʻldoshbek Saidovning INSPdagi taʼlimi ham ana shu ezgu intilishlarning mantiqiy davomi. Eng muhimi, u egallayotgan zamonaviy bilim va xalqaro tajribani kelgusida mamlakatimiz taraqqiyoti, davlat boshqaruvi samaradorligini oshirish va jamiyat manfaatlariga xizmat qilish yoʻlida qoʻllash maqsadida oʻz kasbiy salohiyatini izchil rivojlantirmoqda.

Bugungi bilimli va tashabbuskor yoshlar — ertangi taraqqiyotning muhim tayanchi. Yoʻldoshbek Saidovning taʼlim va mehnat yoʻli esa izlanish, intilish va imkoniyatlardan unumli foydalanish orqali yuksak natijalarga erishish mumkinligining ibratli namunasidir.

Viloyat hokimligi matbuot xizmati