Gazli shahrining 70 yilligi munosabati bilan 12 nafar bolajonning sunnat toʻyi oʻtkazildi
2026-09-27 13:05:00 / Yangiliklar
Tantanali marosimda bolajonlar, ularning ota-onalari, yaqinlari, mahalla faollari hamda keng jamoatchilik vakillari ishtirok etdi. Quvonch va shodlikka boy kechgan tadbir bolajonlar va ularning ota-onalari uchun unutilmas xotiralarga aylandi.
Tantanali marosimda viloyat hokimi Botir Zaripov soʻzga chiqib, toʻybolalar va ularning ota-onalarini qutlugʻ ayyom bilan samimiy muborakbod etdi.
Viloyat rahbari bolajonlarga mustahkam sogʻlik, baxtli va mazmunli bolalik, kelgusida ezgu niyatlar bilan kamol topib, el-yurtga naf keltiradigan insonlar boʻlib voyaga yetishlarini tiladi. Ota-onalarga esa farzandlarining kamolini koʻrib, ularning yutuqlaridan doimo faxrlanib yurishlarini tilak bildirdi.
Toʻy munosabati bilan 12 nafar bolajonga milliy anʼanalarimizga xos ravishda sarpolar kiydirildi. Shuningdek, ularga esdalik sovgʻalari va velosipedlar topshirildi. Bolajonlarning quvonchi, samimiy tabassumlari va toʻyona sovgʻalardan mamnunligi tantanaga yanada fayz bagʻishladi.
Tadbir davomida Gazli shahrining 70 yillik tarixida uning obodligi va ravnaqiga oʻz hissasini qoʻshib kelayotgan faol fuqarolar ham eʼtirof etildi. Shaharni obodonlashtirish, koʻrkamligini oshirish va jamoat ishlarida faol ishtirok etayotgan bir guruh gazliliklarga tashakkurnomalar hamda qimmatbaho sovgʻalar topshirildi.
Bu eʼtirof Gazlining bugungi qiyofasini yaratishga oʻz mehnati va tashabbusi bilan hissa qoʻshayotgan insonlarga hurmat va ehtiromning ifodasi boʻldi.
Tantanada Gazlining 70 yillik tarixiga xos qadriyatlar — mehr-oqibat, inson qadri, mahalla ahlining hamjihatligi va ezgu anʼanalar yana bir bor namoyon boʻldi. Bolajonlarning quvonchiga kattalarning samimiy duolari va ezgu tilaklari hamroh boʻldi.
Tadbir yakunida sanʼatkorlar ishtirokida konsert dasturi namoyish etildi. Kuy-qoʻshiqlar va diltortar chiqishlar bayramona kayfiyatni yanada koʻtarib, Gazlining 70 yillik yubileyi munosabati bilan oʻtkazilayotgan tantanalarga fayz bagʻishladi.
Gazlining 70 yillik yubileyi munosabati bilan oʻtkazilayotgan bu kabi ezgu tadbirlar shahar tarixiga hurmat, bugungi taraqqiyotga shukronalik va kelajak avlodga boʻlgan eʼtiborni oʻzida mujassam etmoqda. Zero, shaharning haqiqiy bayrami — uning ahli quvonchi, farzandlar kulgusi va ezgu niyatlar bilan yanada fayzli boʻlgan kunlaridir.
Viloyat hokimligi matbuot xizmati