Buxoro viloyati hokimligi

Yubiley arafasida shaharda nafaqat obodonlashtirish va infratuzilmani yaxshilash, balki aholining iqtisodiy imkoniyatlarini kengaytirishga qaratilgan qator loyihalar amalga oshirilmoqda. Xususan, aholini kasb-hunarga oʻqitish, tadbirkorlikka jalb etish, oʻzini oʻzi band qilish va yangi ish oʻrinlarini yaratishga alohida eʼtibor qaratilmoqda.

Endilikda bu imkoniyatlar xotin-qizlar uchun ham yanada kengaytirildi. Xususan, Gazli mahallasida xotin-qizlarning bandligini taʼminlash va salomatligini mustahkamlash markazi oʻz faoliyatini boshladi.

Mazkur markazning ish boshlashi Gazlining 70 yillik taraqqiyot yoʻlida bugungi avlod uchun yaratilayotgan yangi imkoniyatlarning yana bir amaliy ifodasi boʻldi. Bu yerda xotin-qizlarni kasb-hunarga oʻqitish, ularni ish bilan taʼminlash, oʻzini oʻzi band qilish va barqaror daromad manbaiga ega boʻlishiga koʻmaklashish uchun zarur sharoitlar yaratilgan.

Bu kabi markazlarni tashkil etish ishlari Oʻzbekiston Respublikasi Prezidentining 2025-yil 3-dekabrdagi “Xotin-qizlarni qoʻllab-quvvatlashga oid qoʻshimcha chora-tadbirlar toʻgʻrisida”gi Farmonida belgilangan vazifalar hamda 2022-yil 21-sentabrdagi “Xotin-qizlar bandligini oshirish va salomatligini mustahkamlashga oid qoʻshimcha chora-tadbirlar toʻgʻrisida”gi qarori ijrosi doirasida amalga oshirilmoqda.

Bugungi kunda viloyatdagi 516 ta mahallaning 350 tasida xotin-qizlarning bandligini taʼminlash va salomatligini mustahkamlash markazlari tashkil etilgan. Gazli mahallasida ish boshlagan yangi markaz ham ana shu tizimning mantiqiy davomi boʻlib, hududda xotin-qizlar uchun kasb oʻrganish, mehnat qilish va daromad topish imkoniyatlarini yanada kengaytirmoqda.

Yangi markazda 100 nafardan ortiq xotin-qizni kasb-hunarga oʻqitish va ularning bandligini taʼminlash rejalashtirilgan.

Jumladan, 85 nafar xotin-qiz tikuvchilik, 10 nafari hunarmandchilik, 10 nafari yarim tayyor mahsulotlar tayyorlash, yana 5 nafari ayollar sartaroshligi yoʻnalishlarida kasb oʻrganadi.

Bu yoʻnalishlarning tanlangani xotin-qizlarga amaliy kasb egallash va uni keyinchalik barqaror daromad manbaiga aylantirish imkonini beradi.

Markaz faoliyati faqat kasb oʻrgatish bilan cheklanmaydi. Xotin-qizlarga egallagan kasbi boʻyicha ish topish, oʻzini oʻzi band qilish yoki tadbirkorlik faoliyatini yoʻlga qoʻyishda amaliy koʻmak koʻrsatiladi.

Ayniqsa, Gazli kabi chekka hududda bunday imkoniyatlarning mahallaning oʻzida yaratilishi muhim ahamiyatga ega. Endi xotin-qizlar uzoq masofaga borib, kasb oʻrganish yoki ish izlash zaruratisiz, oʻz mahallasida taʼlim olishi, mehnat qilishi va daromad topishi mumkin.

Markaz faoliyatida xotin-qizlarning salomatligini mustahkamlash masalasiga ham alohida eʼtibor qaratiladi.

Bu yerda xotin-qizlarning iqtisodiy faolligini oshirish bilan bir qatorda, sogʻlom turmush tarzini qoʻllab-quvvatlash, profilaktik tadbirlarga jalb etish va salomatlik bilan bogʻliq masalalarda zarur koʻmak koʻrsatish imkoniyatlari ham kengaytiriladi.

Markazning tantanali ochilish marosimida viloyat hokimi Botir Zaripov soʻzga chiqib, yigʻilganlarni yangi markazning foydalanishga topshirilishi bilan samimiy muborakbod etdi.

Viloyat rahbari oʻz soʻzida Gazlining 70 yillik taraqqiyot yoʻli davomida shahar aholisi uchun yaratilayotgan imkoniyatlar tobora kengayib borayotganini taʼkidlab, mazkur markaz ham xotin-qizlarning mehnat qilishi va daromad topishi uchun yangi imkoniyatlar ochishini qayd etdi.

Shuningdek, markaz xotin-qizlar uchun shunchaki kasb-hunar oʻrganish maskani emas, balki egallangan kasbni amaliyotga tatbiq etish, mehnat qilish va barqaror daromad manbaiga ega boʻlish imkonini beruvchi muhim maskan ekani taʼkidlandi.

Markaz faoliyatini samarali tashkil etish, xotin-qizlarning toʻliq kasb egallashini taʼminlash, oʻqishni tamomlaganidan soʻng ularni ishga joylashtirish yoki tadbirkorlik faoliyatiga yoʻnaltirish boʻyicha masʼullarga tegishli vazifalar belgilab berildi.

Zero, Gazlining 70 yillik yubileyi nafaqat oʻtgan taraqqiyot yoʻlini sarhisob qilish, balki shaharning kelgusi rivoji uchun yangi maqsad va imkoniyatlarni belgilash davridir. Xotin-qizlar uchun tashkil etilgan ushbu markaz ham ana shu ezgu maqsadlarning amaliy ifodasi sifatida aholining bandligi, oilaviy daromadlari va mahalla farovonligini oshirishga xizmat qiladi.

Gazlining 70 yillik tarixi — bu, avvalo, uning odamlari tarixi. Bugun esa ana shu insonlar uchun yangi imkoniyatlar yaratilib, shahar taraqqiyotining keyingi bosqichi uchun mustahkam poydevor barpo etilmoqda.

Viloyat hokimligi matbuot xizmati