Buxoro viloyati hokimligi

Loyiha doirasida 2 ming gektar yangi ekin maydonlarini oʻzlashtirish rejalashtirilgan. Buning uchun, avvalo, yerlarni suv bilan taʼminlash, elektr energiyasi yetkazib berish va sugʻorish tizimini yoʻlga qoʻyishga qaratilgan zarur infratuzilma yaratilmoqda.

Xususan, Buxoro magistral kollektoridan 10 kilometr uzunlikdagi yangi kanal qurish ishlari boshlandi. Yangi kanalning barpo etilishi oʻzlashtiriladigan maydonlarni suv bilan taʼminlash imkonini beradi. Bu esa hududda qishloq xoʻjaligi ishlab chiqarishini yoʻlga qoʻyish, yer resurslaridan samarali foydalanish va yangi ekin maydonlarini qishloq xoʻjaligi oborotiga kiritish uchun muhim ahamiyatga ega.

Loyiha doirasida yangi ekin maydonlarini zarur infratuzilma bilan taʼminlashga ham alohida eʼtibor qaratilmoqda. Sugʻorish tizimlarining barqaror ishlashini taʼminlash maqsadida 6 kilometr elektr tarmogʻini tortish ishlari boshlandi. Hozirga qadar 400 kVt quvvatga ega 2 ta transformator oʻrnatildi. Ayni paytda ekin maydonlarini suv bilan taʼminlash uchun 3 ta nasos agregatini oʻrnatish ishlari davom etmoqda.

Viloyat hokimi Botir Zaripov mazkur obyektda boʻlib, loyiha doirasida amalga oshirilayotgan ishlar, yaratilayotgan infratuzilma va belgilangan rejalar bilan yaqindan tanishdi.

Obyektdagi qurilish-montaj ishlarining borishi, yangi ekin maydonlarini suv va elektr energiyasi bilan taʼminlash masalalari muhokama qilindi. Masʼullarga kanal qurilishi, elektr tarmoqlarini tortish hamda nasos agregatlarini oʻrnatish ishlarini sifatli va belgilangan muddatlarda yakunlash, shuningdek, oʻzlashtirilayotgan maydonlarni qishloq xoʻjaligi oborotiga tezroq kiritish boʻyicha tegishli topshiriqlar berildi.

Yangi ekin maydonlarining oʻzlashtirilishi, eng avvalo, Gazli aholisi uchun yangi iqtisodiy imkoniyatlar yaratadi. Oʻzlashtirilgan yerlarda turli qishloq xoʻjaligi ekinlarini yetishtirish orqali aholi qoʻshimcha daromad olish imkoniyatiga ega boʻladi.

Shu bilan birga, qishloq xoʻjaligining rivojlanishi bilan yerga ishlov berish, urugʻlik va koʻchat yetishtirish, mahsulotni yigʻish, saqlash, tashish va sotish kabi yoʻnalishlarda ham qoʻshimcha ish oʻrinlari va daromad manbalari shakllanishi kutilmoqda.

Bu esa aholi bandligini taʼminlash, oilaviy daromadlarni oshirish hamda hududda qishloq xoʻjaligi bilan shugʻullanish imkoniyatlarini kengaytirishga xizmat qiladi.

Loyiha doirasida nafaqat yangi ekin maydonlarini oʻzlashtirish, balki hududda yangi daraxtzorlar barpo etish ham rejalashtirilgan.

Daraxtzorlarning tashkil etilishi Gazlini koʻkalamzorlashtirish, yashil hududlar maydonini kengaytirish va atrof-muhitni obodonlashtirishga xizmat qiladi. Choʻl hududi sharoitida yashil maydonlarni koʻpaytirish hududning ekologik barqarorligini taʼminlashda ham muhim ahamiyat kasb etadi.

Shu tariqa, Gazlida amalga oshirilayotgan mazkur tashabbus nafaqat yangi yerlarni qishloq xoʻjaligi oborotiga kiritish, balki suv va elektr infratuzilmasini rivojlantirish, aholi uchun yangi daromad manbalarini yaratish hamda hududni koʻkalamzorlashtirishni qamrab olgan keng qamrovli loyihaga aylanmoqda.

Viloyat hokimligi matbuot xizmati