Turkiyalik professor Buxoroda murakkab yurak jarrohligi amaliyotlarini bajardi
2026-09-22 10:15:00 / Yangiliklar
Viloyat Sog‘liqni saqlash boshqarmasi tashabbusi bilan Turkiyaning “Avrasya Hastanesi” tibbiyot klinikasi hamda “Med Care Turkey Istanbul” tashkiloti hamkorligida Buxoroda aholi uchun bepul tibbiy ko‘rik va jarrohlik amaliyotlari tashkil etildi. Ko‘riklar davomida fuqarolar yurak-qon tomir, bosh miya va asab tizimi kasalliklari bo‘yicha xorijiy mutaxassislar ko‘rigidan o‘tkazildi.
Tashrif doirasida yurak-qon tomir kasalliklari jarrohi, professor Ali Riza Jenar respublika Shoshilinch tibbiy yordam ilmiy markazi Buxoro filialida murakkab yurak jarrohligi amaliyotlarini bajardi. Jumladan, uch nafar bemorda aorto-koronar shuntlash operatsiyasi muvaffaqiyatli o‘tkazildi. Bemorlar orasida Peshko‘ tumanida yashovchi, 63 yoshli erkak, Buxoro shahrida yashovchi 61 yoshli erkak hamda 64 yoshli bemor bor. Murakkab jarrohlik amaliyotidan so‘ng bemorlar ahvoli qoniqarli va ular salomatligini tiklash muolajalari davom ettirilmoqda.
Aorto-koronar shuntlash (AQSh) — yurakni qon bilan ta’minlovchi koronar arteriyalarda qon oqimi jiddiy buzilganda qo‘llaniladigan murakkab kardioxirurgik amaliyot bo‘lib, operatsiya davomida qon oqimi uchun yangi aylanma yo‘l — shunt yaratiladi. Bu usul yurak mushagining qon bilan ta’minlanishini yaxshilash, ko‘krakdagi og‘riqlarni kamaytirish va bemorning hayot sifatini oshirishga qaratilgan.
Mazkur amaliyotlarning viloyatimizda o‘tkazilishi nafaqat bemorlar uchun yuqori texnologiyali tibbiy yordamdan foydalanish imkoniyatini kengaytirdi, balki mahalliy mutaxassislar uchun ham xalqaro tajribani bevosita amaliyot jarayonida o‘rganish imkonini berdi. Mazkur jarrohlik amaliyotlarida mahalliy mutaxassislar ham faol ishtirok etib, zamonaviy kardioxirurgik yondashuvlar bo‘yicha tajriba almashdilar.
Xalqaro tibbiy hamkorlikning bunday shakli xorijiy mutaxassislar tajribasini mahalliy amaliyotga tatbiq etish, murakkab jarrohlik amaliyotlarini hududning o‘zida amalga oshirish imkoniyatini kengaytirish, mahalliy kadrlar malakasini oshirish hamda aholiga ko‘rsatilayotgan tibbiy xizmat sifatini yanada yuksaltirishga xizmat qilmoqda.
Viloyat hokimligi matbuot xizmati