Buxoro viloyati hokimligi

Xoʻjayli tumanida aholi uchun munosib turmush sharoitlarini yaratish, ijtimoiy infratuzilmani yaxshilash, aholi bandligi va daromadlarini oshirish, ehtiyojmand oilalarni manzilli qoʻllab-quvvatlash boʻyicha Buxoro viloyati tomonidan aniq chora-tadbirlar belgilanib, zarur moliyaviy va moddiy resurslar safarbar etildi.

Jumladan, joriy yilning oʻtgan davri mobaynida Oybek koʻchasida joylashgan 860 oʻrinli Markaziy stadionda rekonstruksiya ishlari amalga oshirildi. Stadion maydoni tayyorlanib, sunʼiy chim qoplamasi va tomoshabinlar uchun oʻrindiqlar oʻrnatildi. Shuningdek, tribuna, ayvon hamda ichki qismlarda qurilish-taʼmirlash va pardozlash ishlari bajarildi. Obyektda amalga oshirilgan qurilish-montaj ishlari uchun bugungi kunga qadar 3 milliard 710 million soʻm mablagʻ moliyalashtirildi.

Ogʻir turmush sharoitida yashayotgan oilalarning uy-joylarini taʼmirlash hamda avariya holatidagi uylarni yangidan qurish uchun Buxoro viloyati tomonidan 18 milliard soʻm mablagʻ, 1 450 kub metrdan ziyod yogʻoch-taxta va qariyb 130 ming kvadrat metr profnastil yoʻnaltirildi.

Natijada 645 ta uy-joyning tom qismi toʻliq taʼmirlandi, yashash uchun yaroqsiz va avariya holatidagi uylar oʻrnida esa 27 ta yangi uy-joy qurib bitkazildi.

Yoshlarni qoʻllab-quvvatlashga ham alohida eʼtibor qaratilmoqda. Xoʻjayli tumanidan ijtimoiy himoyaga muhtoj 20 nafar yosh Buxoro shahridagi “Buxoro” sogʻlomlashtirish oromgohida dam oldirildi. Ular uchun Buxoroning tarixiy-madaniy maskanlariga maʼnaviy-maʼrifiy sayohatlar ham tashkil etildi.

Shuningdek, 100 nafar ishsiz yosh Buxoro viloyatiga olib kelinib, ularga tengdosh tadbirkor va hunarmandlar faoliyati, mahsulot ishlab chiqarish jarayonlari hamda tadbirkorlik tajribasi tanishtirildi.

Aholi salomatligini muhofaza qilish yoʻnalishida ham qator ishlar amalga oshirildi. Buxoro viloyatining 30 nafar malakali shifokor va patronaj hamshiralaridan iborat tibbiy brigadalari tomonidan Xoʻjayli tumani aholisi oʻrtasida chuqurlashtirilgan tibbiy koʻriklar tashkil etildi.

Koʻriklar davomida 3 191 nafar fuqaro tibbiy koʻrikdan oʻtkazilib, 1 828 nafarida turli kasalliklar aniqlandi. Shundan 1 442 nafariga ambulator, 386 nafariga statsionar davolanish tavsiya etildi. 208 nafar bemorga jarrohlik amaliyoti uchun yoʻllanmalar berildi.

Bundan tashqari, tuman tibbiyot birlashmasining tugʻruq boʻlimiga Buxoro viloyatining “Buxoroi sharif” jamgʻarmasi va mahalliy byudjet mablagʻlari hisobidan umumiy qiymati 629 million soʻm boʻlgan 8 turdagi tibbiy asbob-uskuna yetkazib berildi.

Ular orasida jarrohlik stoli va lampasi, chaqaloqlar uchun isitish stoli, portativ UZI skaneri, elektrokoagulyator, chaqaloqlar inkubatori, sunʼiy nafas berish va SIPAP apparatlari bor.

Operatsiya va ixtisoslashtirilgan davolanishga muhtoj boʻlgan 31 nafar bemor markazlashgan tartibda Buxoro shahriga olib kelindi. Ularning 26 nafarida operatsiya oʻtkazilib, shundan 22 tasi yuqori texnologik amaliyotni tashkil etdi. Davolash va operatsiya xarajatlari uchun mahalliy byudjetdan 259,8 million soʻm mablagʻ yoʻnaltirildi.

Tumanda investitsiya loyihalarini amalga oshirish orqali yangi ish oʻrinlari yaratishga ham katta eʼtibor berilmoqda. Buxoro viloyati hokimligi tashabbusi bilan Xoʻjayli tumanida umumiy qiymati 12 million dollar boʻlgan 9 ta investitsiya loyihasi amalga oshirilmoqda. Loyihalarni ishga tushirish natijasida qariyb 250 ta yangi ish oʻrni yaratilishi belgilangan.

Xususan, “Brilliant Broller Buxara” MCHJ tomonidan 1 million dollar investitsiya hisobiga parrandachilik kompleksini tashkil etish loyihasi doirasida 40 ta yangi ish oʻrni yaratiladi. Shuningdek, “Nukus Progress trans” MCHJning 400 ming dollarlik investitsiya loyihasi doirasida 20 ta avtobus xarid qilinib, yoʻlovchi tashish xizmatini yoʻlga qoʻyish boʻyicha amaliy ishlar boshlandi. Mazkur loyiha natijasida ham 40 ta yangi ish oʻrni yaratilishi koʻzda tutilgan.

Xotin-qizlarni kasb-hunarga oʻrgatish va ularning bandligini taʼminlash maqsadida ham amaliy ishlar olib borilmoqda. Xoʻjayli tumanida jundan gilam toʻqish tajribasiga ega 15 nafar xotin-qiz Buxoroga taklif qilinib, “Buxoro ipak gilam markazi”da 10 kun davomida ipak gilamdoʻzlik boʻyicha oʻqitildi.

Oʻquv kursini muvaffaqiyatli yakunlagan xotin-qizlarga sertifikatlar topshirilib, Xoʻjayli tumanida ipak gilamdoʻzlikni yoʻlga qoʻyish uchun mahalliy ustalar tayyorlandi.

Ayni paytda Buxoro viloyati hokimi Botir Zaripov boshchiligidagi masʼullar, shuningdek, qator tashkilot va idoralar rahbarlaridan iborat ishchi guruh Xoʻjayli tumanida boʻlib turibdi.

Tuman hokimligi mutasaddilari, korxona va tashkilotlar rahbarlari ishtirokidagi muloqotda hududning mavjud imkoniyat va salohiyatidan samarali foydalanish, aholi bandligini taʼminlash va daromadlarini oshirish, ijtimoiy hamda muhandislik infratuzilmasini yaxshilash, shuningdek, Buxoro viloyati bilan oʻzaro hamkorlikni yanada mustahkamlash masalalari muhokama qilindi.

Shuningdek, yil yakuniga qadar amalga oshirilishi lozim boʻlgan ustuvor vazifalar va belgilangan rejalar ijrosi yuzasidan aniq chora-tadbirlar belgilab olindi.

Muloqot davomida mahallalardagi mavjud muammolar ham oʻrganilib, ularni bartaraf etish boʻyicha masʼullarga tegishli vazifalar yuklatildi.

Shu tariqa, Buxoro viloyatining Xoʻjayli tumani bilan hamkorligi doirasida ijtimoiy himoya, tibbiyot, uy-joy, bandlik, investitsiya va kasb-hunarga oʻqitish kabi muhim yoʻnalishlarda amaliy ishlar izchil davom ettirilmoqda.

Viloyat hokimligi matbuot xizmati