Buxoro viloyati hokimligi

Oʻrganishlar davomida tumanda mazkur yoʻnalishda joriy etilgan yangi tizim, mahallalar kesimida olib borilayotgan manzilli ishlar, ehtiyojmand oilalarni kambagʻallikdan chiqarish boʻyicha belgilangan vazifalar va ularning ijrosi atroflicha tahlil qilindi.

Qorakoʻl tumanidagi 45 ta mahallaning har biriga alohida masʼul rahbarlar biriktirilib, mahalla yettiligi bilan hamkorlikda xonadonbay ishlash tizimi yoʻlga qoʻyilgan. Bunda har bir oilaning ijtimoiy-iqtisodiy holatini oʻrganish, mavjud muammolarni aniqlash va ularni bartaraf etishning aniq mexanizmlarini belgilashga alohida eʼtibor qaratilmoqda.

Tuman miqyosida oʻtkazilgan xatlov va soʻrovnomalar natijasida 3 ming 871 nafar fuqaroning bandligini taʼminlash imkoniyati aniqlangan. Ularning 2 ming 853 nafari oʻzini oʻzi band qilish istagini bildirgan. Bu aholi orasida mustaqil mehnat faoliyatini yoʻlga qoʻyish va oʻz daromad manbaini shakllantirishga qiziqish yuqori ekanini koʻrsatadi.

Viloyat hokimiga tumanda aholi bandligini taʼminlash boʻyicha amalga oshirilgan ishlar va erishilgan natijalar yuzasidan ham maʼlumot berildi.

Xususan, 2026-yil yanvar–avgust oylarida 22 ming 856 nafar fuqaroni band qilish rejasi belgilangan boʻlsa, amalda 26 ming 499 nafar fuqaroning bandligi taʼminlangan. Shuningdek, 19 ming 713 nafar fuqaro uchun daromad manbai yaratilgan.

Tadbirkorlikni rivojlantirish va yangi loyihalarni ishga tushirish borasida ham muayyan natijalarga erishilgan. Hisobot davrida 260 ta mikroloyiha amalga oshirilib, ular doirasida 4 ming 297 ta yangi ish oʻrni yaratilgan. Aholini tadbirkorlikka jalb qilish boʻyicha esa 5 ming 822 nafar fuqaro qamrab olingan.

Moliyaviy qoʻllab-quvvatlash yoʻnalishida ham ishlar izchil davom ettirilmoqda. Joriy yilning yanvar–avgust oylarida Qorakoʻl tumanidagi mikro, kichik va oʻrta biznes subyektlariga 322 milliard soʻm kredit ajratilgan. Natijada belgilangan reja 107 foizga bajarilgan.

Oʻrganish jarayonida tumanda mavjud iqtisodiy imkoniyatlardan samarali foydalanish, yangi va yuqori daromad keltiradigan loyihalarni shakllantirish, tadbirkorlik tashabbuslarini moliyaviy qoʻllab-quvvatlash hamda qoʻshimcha ish oʻrinlari yaratish masalalariga alohida eʼtibor qaratildi.

Shu bilan birga, faoliyatini vaqtincha toʻxtatgan tadbirkorlik subyektlarini qayta ishga tushirish, muammoli loyihalarni manzilli oʻrganib, ularning faoliyatini tiklashga koʻmaklashish, mavjud ishlab chiqarish quvvatlaridan samarali foydalanish hamda yangi mikroloyihalarni ishlab chiqish boʻyicha tegishli vazifalar belgilab berildi.

Viloyat hokimi masʼullarga har bir mahalla va har bir xonadon kesimida ishlashni yanada kuchaytirish zarurligini taʼkidladi. Bunda asosiy eʼtiborni faqat statistik koʻrsatkichlarga emas, balki aholining real daromadini oshirish, barqaror bandligini taʼminlash va oilalarni kambagʻallikdan chiqarishga xizmat qiladigan aniq loyihalarni amalga oshirishga qaratish lozimligi qayd etildi.

Ayniqsa, har bir mahallaning mavjud salohiyati, aholining kasb va koʻnikmalari, hududdagi resurslar hamda bozor talabidan kelib chiqib, daromadli faoliyat turlarini yoʻlga qoʻyish muhimligi belgilandi.

Oʻrganish yakunida aniqlangan kamchiliklarni bartaraf etish, mavjud imkoniyatlardan toʻliq va samarali foydalanish, yangi loyihalarni ishga tushirish hamda Qorakoʻl tumanini kambagʻallik va ishsizlikdan xoli hududga aylantirish borasidagi ishlarni yangi bosqichga olib chiqish yuzasidan masʼullarga tegishli topshiriqlar berildi.

Asosiy maqsad — har bir xonadonning daromad manbaini koʻpaytirish, aholiga munosib mehnat sharoitlarini yaratish va kambagʻallikni qisqartirishni raqamlar emas, real natijalar bilan taʼminlashdir.

Viloyat hokimligi  matbuot xizmati