Buxoro viloyati hokimligi

Meva-sabzavot mahsulotlari yetishtirish hajmini koʻpaytirish, xalq dasturxonini toʻkin qilish maqsadida serhosil uzum navlarini mahalliylashtirish va tokzorlarni zamonaviy usullarda barpo etishga alohida eʼtibor qaratilmoqda.

“Bogʻiturkon” hududida “Fayzullo Sardor Shoʻrobod”, “Bozor Mirxon”, “Normurod-Niyoz”, “Shuhrat Ulugʻ” xoʻjaliklari hamda “BCT Cluster Agrokompleks” paxta-toʻqimachilik klasteri yerlarining bir qismida bogʻ va tokzorlar barpo etilgan. Bu loyihalar, avvalo, mehnat jamoalari ehtiyojlarini taʼminlash, yangi ish oʻrinlari yaratish va qishloq aholisi daromadini oshirishga xizmat qilmoqda.

Shuningdek, tumanning “Hoja Ubbon” choʻl massivida qariyb 1 ming gektar yer maydonini obodonlashtirish ishlari boshlangan. Bu yerda Fargʻona viloyati tajribasi asosida uzumchilikni rivojlantirish va intensiv tokzorlar barpo etishga jiddiy kirishilgan.

Choʻl hududini obod va koʻkalamzor maskanga aylantirish katta mehnat, vaqt va mablagʻ talab etadi. Massivda vodiy uslubida tokzor-uzumzorlar barpo etish maqsadida 80 milliard soʻm mablagʻ moliyalashtirilgan.

Ayni paytda ikki yildan buyon 1 ming gektar maydonda barpo etilayotgan tokzorlarda yiliga 3 ming tonnadan ortiq sara uzum hosili olishga qaratilgan agrotexnik tadbirlar amalga oshirilmoqda. Bu jarayonga bogʻdorchilik sohasida chuqur bilim va tajribaga ega mutaxassislar, shuningdek, tajribali bogʻbonlar jalb etilgan.

Yaqin yillarda mazkur hududdagi tokzorlar toʻliq hosilga kirishi natijasida 300 dan ortiq ishchi-dehqon oilasining bandligini taʼminlash koʻzda tutilmoqda.

Kuni kecha “Bogʻiturkon” mahallasida serhosil va intensiv bogʻ-tokzorlar barpo etish loyihalariga bagʻishlangan oʻquv-amaliy seminar boʻlib oʻtdi. Unda sohaning bugungi holati, mavjud imkoniyatlar va istiqbolli loyihalar muhokama qilindi.

Taʼkidlanganidek, Oʻzbekiston Respublikasi Prezidentining joriy yil 9-iyundagi “Sanoat usulidagi intensiv mevali bogʻlar barpo etish va eskirgan bogʻlarni yangilashni qoʻllab-quvvatlash chora-tadbirlari toʻgʻrisida”gi PF-108-sonli Farmoni sohani yanada rivojlantirishda muhim dasturilamal boʻlmoqda.

Seminarda qishloq xoʻjaligi sohasi masʼullari, 200 nafarga yaqin bogʻbon, fermer, agronom hamda tijorat banklari vakillari ishtirok etdi.

Tadbir davomida eskirgan va samaradorligi past bogʻ-tokzorlar oʻrnida yangi intensiv bogʻlar tashkil etish, serhosil uzum navlarini kengaytirish, hosildorlikni oshirish, zamonaviy agrotexnologiyalarni joriy etish va xoʻjaliklarni imtiyozli bank kreditlari orqali qoʻllab-quvvatlash masalalariga alohida eʼtibor qaratildi.

Seminarda mahalliy mutaxassislar bilan bir qatorda Janubiy Amerikadagi Chili davlatidan kelgan yuqori malakali mutaxassis Kristian Rodriges hamda Turkiyadan tashrif buyurgan Muhammad Yaner ishtirok etdi.

Xorijiy mutaxassislar fermerlarga intensiv bogʻlarni tashkil etish, koʻchatlarni toʻgʻri tanlash va joylashtirish, ularni parvarishlash, zamonaviy texnologiyalardan samarali foydalanish hamda yuqori hosildorlikka erishish boʻyicha amaliy tavsiya va tajribalarini bayon etdilar.

Viloyat hokimligi matbuot xizmati