Shofirkon: ehtiyojmand oilalar oʻz tanloviga koʻra chorva mollariga ega boʻlmoqda
2026-09-09 15:15:00 / Yangiliklar
Ayniqsa, aholiga oʻz imkoniyati va qiziqishidan kelib chiqqan holda kasb-hunar, tadbirkorlik, chorvachilik kabi yoʻnalishlarni tanlash imkoniyati berilayotgani mazkur saʼy-harakatlarning muhim jihatlaridan biri boʻlmoqda. Bu esa ehtiyojmand oilalarning faqat bir martalik yordam olishi emas, balki oʻz mehnati orqali barqaror daromad manbaiga ega boʻlishiga zamin yaratmoqda.
Jumladan, kuni kecha hududdagi “Greenford chorva” MCHJ tomonidan 300 bosh mayda shoxli chorva moli olib kelinib, imtiyozli kredit mablagʻlari hisobidan 200 dan ortiq ehtiyojmand oilaga tarqatildi.
Bunda mahallalardagi hokim yordamchilarining tavsiyalari asosida talabgor oilalarga ajratilgan imtiyozli kredit mablagʻlari muhim ahamiyat kasb etmoqda. Yaʼni, fuqarolarning xohish-istagi va mavjud imkoniyatlari inobatga olinib, ular uchun chorvachilik bilan shugʻullanishga sharoit yaratilmoqda.
Xuddi shunday, “Zafarsher-25” MCHJ tomonidan naslli qoramollar olib kelinib, mahallalarda kambagʻallik va ishsizlik reestrida turgan yuzga yaqin oilaga tarqatildi.
Mazkur tashabbuslar natijasida qariyb 300 ta ehtiyojmand oila chorvachilik bilan shugʻullanish, oʻzini oʻzi band qilish va kelgusida barqaror daromad manbaiga ega boʻlish imkoniyatiga ega boʻldi. Eng muhimi, oilalarga tayyor daromad emas, balki oʻz mehnati bilan daromad topish imkoni berilayotir.
Bu esa davlatimiz rahbari tomonidan ilgari surilgan “kambagʻallikni qisqartirish — oilaga shunchaki yordam berish emas, balki uni barqaror daromadga olib chiqish” tamoyilining amaldagi ifodasidir.
Tahlillarga koʻra, ayni paytga kelib tumanda barcha toifadagi xoʻjaliklarda parvarish qilinayotgan yirik shoxli chorva mollari soni 152 715 boshga yetkazilgan. Shundan 7 900 boshdan ziyodi fermer xoʻjaliklarida, 148 900 boshdan ortiq chorva mollari esa dehqon xoʻjaliklari hissasiga toʻgʻri keladi.
Chorvachilikda parvarishlanayotgan sigirlar soni ham salmoqli boʻlib, bugungi kunda ularning umumiy soni 44 431 boshni tashkil etmoqda. Jumladan, fermer xoʻjaliklarida 2 390 bosh, dehqon xoʻjaliklarida esa 41 700 boshdan ziyod sigir parvarishlanmoqda.
Aholi xonadonlarida chorva mollari tuyoq sonining izchil ortib borayotgani oilalarning qoʻshimcha daromad manbalari kengayib, ularning iqtisodiy imkoniyatlari mustahkamlanayotganidan dalolat beradi.
Chorvachilikni rivojlantirishda chorva mollarining salomatligi va parvarishiga ham alohida eʼtibor qaratilmoqda.
Ayni kunlarda hududda veterinariya-sanitariya talablariga muvofiq, chorvachilik tarmogʻi hamda aholi xonadonlarida parvarishlanayotgan qoramol va qoʻy-echkilarni nazoratga olish, sanatsiya qilish, molxona va qoʻralarni tozalash, mahalliy nurilarni chiqarish, obodonlashtirish, zararkunanda va hasharotlarga qarshi kurashish kabi profilaktik tadbirlar izchil amalga oshirilmoqda.
Bunday chora-tadbirlar chorva mollarini turli kasalliklardan asrash, mahsuldorlikni oshirish va xonadonlarda chorvachilikni samarali yoʻlga qoʻyishda muhim ahamiyat kasb etadi.
Muhimi, tumanda mahallalar “yettiligi” koʻmagida kambagʻallik va ishsizlikni qisqartirish, aholi daromadlarini oshirish, oilalarni tadbirkorlikka jalb etish va ehtiyojmand xonadonlarni qoʻllab-quvvatlashga qaratilgan bunday amaliy loyihalar izchil davom ettiriladi.
Zero, har bir oilaning oʻz mehnati bilan daromad topishi, oʻzini oʻzi band qilishi va iqtisodiy jihatdan mustaqil boʻlishi — kambagʻallikni qisqartirishning eng samarali yoʻllaridan biridir.
Viloyat hokimligi matbuot xizmati