Buxoro viloyati hokimligi

Mahalliy tadbirkor Gulsara Karimova tomonidan o‘tgan yili 100 million so‘m imtiyozli kredit mablag‘i asosida barpo etilgan bu korxona ayni kunda buyurtma asosida faoliyatini yo‘lga qo‘ygan. Chevarlar sexida o‘ndan ortiq mahalliy ayol ish bilan ta’minlagan bo‘lib, hozirda ular qo‘lidan sifatli va eksport darajasidagi choyshab to‘plamlari tikib tayyorlanmoqda. 

Tuman Oila va xotin-qizlar bo‘limi rahbari M. Tilavova, viloyat IIB Xotin-qizlar bo‘lim boshlig‘i X.Toirova, viloyat IIBning mas’ul xodimlari N.Abzalova, M.Yakubova, tuman IIB jamoat xavfsizlik xizmati katta inspektori G.Ochilova shu kabi korxona va sexlarda bo‘lishib, mehnat jamoalariga yaratilgan shart-sharoit bilan yaqindan tanishdilar. 

"Nuriya Sulton chevarlari" kelajakda ishchilar malakasi bilan birga buyurtmalar assortimenti va eksportni oshirish, tikuvchilikka yangi texnologiyalarni tatbiq qilish orqali rivojlanishga intilmoqda. Bu nafaqat mahalliy, balki xalqaro bozorlar uchun ham raqobatbardosh mahsulotlar yaratishda muhim qadam bo‘ladi. Gulsara Karimova singari tadbirkorlar tashabbuslari mamlakatimizda ayollarni iqtisodiy qo‘llab-quvvatlash, ularning turmush farovonligini oshirishdagi muhim harakatlardan desak, mubolag‘a emas. 

Xuddi shunday, “Shibirg‘on” mahalla fuqarolar yig‘inida ham ijtimoiy muhofazaga muhtoj, og‘ir sharoitda yashayotgan oilalar va ulardagi xotin-qizlar bandligini ta’minlash maqsadida yana bir muhim tashabbusga qo‘l urildi.  

Hududda tikuv sexi tashkil qilinib, 20 nafar ishsiz ayol bandligi ta’minlangani ular oilaviy ahvoli yaxshilanishida muhim ahamiyat kasb etmoqda. Bu tashabbus natijasida oilalar bekalari har oyda 2 million so‘m atrofidagi daromadiga ega bo‘lib, ro‘zg‘or kam-ko‘stini bartaraf etishmoqda. 

Ayni kunda mazkur sexda bo‘z matosidan qo‘l sumkalari ishlab chiqarilmoqda. Mahalliy hokimlik va ichki ishlar xodimlari tikuv sexida bo‘lishib, bunda ishlayotgan chevarlar bilan muloqot qildilar. Sex faoliyatini kengaytirish, mahsuldorlikni oshirishga doir maslahatlashib olindi. Muhimi, bu tashabbus ijtimoiy masalaga yechim bo‘lib, imkon qadar ko‘proq ayollarga yordam ko‘rsatish chorasi ko‘rilmoqda.  

Ahamiyatli jihati, qishloq joyida muammoli oilalardagi ayollar uchun bu sex nafaqat moliyaviy “o‘zini o‘nglash” imkoniyati, balki, ularning jamiyatdagi ijtimoiy o‘rni va mavqeini oshirish, o‘z salohiyatini namoyon etishi uchun qulay imkoniyatdir. 

Viloyat hokimligi matbuot xizmati