Buxoro viloyati hokimligi

Buxoro viloyati tabiati va atrof-muhitini muhofaza qilish, hududlarni koʻkalamzorlashtirish, “Yashil belbogʻ” barpo etish, suv va boshqa resurslardan oqilona foydalanish hamda iqtisodiy barqarorlikni taʼminlash masalalari doirasida Xitoy Xalq Respublikasi Fanlar akademiyasi tizimidagi ilmiy muassasalar olimlari viloyatda boʻldilar.

Xususan, Shinjon ekologiya va geografiya instituti professori Chan Sun hamda Xitoy Fanlar akademiyasining Shimoli-sharqiy geografiya va agroekologiya instituti professori Ren Chunʼin rahbarligidagi olimlar delegatsiyasi Buxoro viloyati hokimining qishloq xoʻjaligi masalalari boʻyicha maslahatchisi, professor Shavkat Imomov va Irrigatsiya va suv muammolari ilmiy-tadqiqot instituti Buxoro mintaqaviy markazi direktori, professor Shuhrat Shodiyev hamrohligida viloyatning bir qator hududlarida boʻlib, amalga oshirilayotgan ishlar bilan tanishdilar.

Jumladan, Qorovulbozor tumani hududidan oʻtuvchi “Amu-Buxoro” irrigatsiya tarmogʻi boʻyidagi keng choʻl massivida olib borilayotgan ishlar oʻrganildi. Bu yerda saksovul, isiriq, yulgʻun singari tabiiy choʻl oʻsimliklari bilan bir qatorda mahalliy iqlim sharoitiga mos manzarali oʻsimliklarni ekib, koʻpaytirish, hududni shamol va qum koʻchishidan muhofaza qilish maqsadida “Yashil belbogʻ” barpo etish masalalariga alohida eʼtibor qaratildi.

Maʼlumki, viloyatning choʻl massivlarida, xususan, Qizilqum va Qoraqum hududlarida “Yashil bufer zona” tashkil etish loyihasi ishlab chiqilgan. Loyiha doirasida 250 ming gektar maydonda yashil hududlar barpo etib, sugʻoriladigan yerlar va aholi punktlarini qum koʻchishlaridan himoya qilish koʻzda tutilgan.

Dastlabki bosqichda 109 ming gektar maydonda “Yashil bufer zona” yaratish, kelgusi 15 yil davomida choʻl iqlimiga mos saksovul, yulgʻun, yantoq, kavrak kabi oʻsimliklar, shuningdek, dorivor giyoh va oʻsimliklarni koʻpaytirish, pista plantatsiyalari hamda uzumzorlarni kengaytirish rejalashtirilgan.

Bu jarayonda eng maqbul urugʻ va koʻchatlarni tanlash, ularni choʻl sharoitida parvarishlash, tomchilatib sugʻorish tizimlarini joriy etish kabi masalalar muhim ilmiy yondashuvni talab etadi.

Tashrif davomida choʻl hududlarida oʻsadigan shoʻr va qurgʻoqchilikka chidamli oʻsimliklarni parvarishlash, ularni samarali sugʻorish tizimlarini yoʻlga qoʻyish, shuningdek, hududning geografik xususiyatlari va tuproqning suv saqlash qobiliyatini oshirish boʻyicha ilmiy yondashuvlar muhokama qilindi.

Xitoyning choʻl zonalarida amalga oshirilayotgan loyihalar va oʻsimliklarni ekish hamda parvarishlash boʻyicha toʻplangan tajribani Oʻzbekistonning choʻl hududlariga moslashtirish imkoniyatlari yuzasidan ham fikr almashildi.

Shuningdek, xitoylik olimlar Qorovulbozor tumanidagi “Choʻlquvar” mahalla fuqarolar yigʻini hududida 300 gektar maydonda paxta, gʻalla va boshqa sabzavot-poliz mahsulotlari yetishtirilayotgan “Oltin boshoq choʻlquvar” MCHJ dalalarida ham boʻldilar.

Abdurasul Bozorov rahbarlik qilayotgan agrokorxona dalalarida paxtachilikda “Shinjon” usulidan foydalanilishi, jumladan, “Xin Lu Zao-87” va boshqa serhosil navlarni parvarishlash jarayoni hamda hozirgi kunda olib borilayotgan agrotexnik tadbirlar mehmonlarda katta qiziqish uygʻotdi.

Tashrif yakunida Buxoro viloyatining choʻl hududlarida ekologik barqarorlikni taʼminlash, yer va suv resurslaridan samarali foydalanish, choʻllanishning oldini olish hamda qishloq xoʻjaligi samaradorligini oshirishda ilmiy hamkorlikni yanada kengaytirish muhimligi taʼkidlandi.

Viloyat hokimligi matbuot xizmati