Buxoro viloyati hokimligi

Tadbirni Buxoro viloyati hokimi Botir Zaripov ochib, universitet jamoasi va talaba-yoshlarni yangi oʻquv yili hamda yangi oʻquv binosining foydalanishga topshirilishi bilan muborakbod etdi.

Viloyat rahbari oʻz nutqida mamlakatimizda taʼlim va ilm-fan sohasiga qaratilayotgan yuksak eʼtibor, yoshlar uchun yaratilayotgan imkoniyatlar va Buxoro davlat universitetida amalga oshirilayotgan bunyodkorlik ishlarining ahamiyatiga toʻxtaldi.

“Bugungi tadbir faqat yangi oʻquv yilining boshlanishi emas. Bu — yoshlarimiz uchun yangi imkoniyatlar eshigi ochilayotgani, taʼlim va ilm-fanga qaratilayotgan ulkan eʼtiborning yana bir amaliy ifodasi, Buxoro taʼlim tizimi taraqqiyotidagi muhim qadamdir”, — dedi Botir Zaripov.

Viloyat rahbari taʼkidlaganidek, bugun foydalanishga topshirilayotgan yangi majmua ham universitet taraqqiyotining muhim bosqichlaridan biridir. Universitetning oʻz mablagʻlari hisobidan 86,5 milliard soʻm mablagʻ yoʻnaltirilib, 2 700 oʻrinli oʻquv binosi, Quyosh fizikasi ilmiy-tadqiqot laboratoriyasi, Axborot-resurs markazi va 400 oʻrinli talabalar turar joyidan iborat zamonaviy kampus barpo etildi.

Mazkur majmuada minglab talabalar uchun zamonaviy auditoriyalar, raqamli va innovatsion taʼlim muhiti yaratildi. Bu esa yoshlarning sifatli taʼlim olishi, ilmiy-tadqiqot va ijodiy izlanishlar olib borishi uchun yangi imkoniyatlarni ochmoqda.

Shu bilan birga, Prezidentimiz tashabbusi bilan universitetning kelgusi taraqqiyoti uchun yanada katta va strategik qadamlar tashlanmoqda. Xususan, 30,2 gektar maydonda Buxoro davlat universitetining yangi zamonaviy kampusi barpo etilmoqda. Mazkur kampus tarkibida 20 ming oʻrinli oʻquv binolari hamda 5 400 oʻrinli talabalar turar joylari qurilishi rejalashtirilgan.

Ushbu ulkan loyiha universitetning taʼlim va ilm-fan salohiyatini yanada kengaytirish, talabalar uchun zamonaviy va qulay muhit yaratish bilan birga, Buxoroning mamlakatimizdagi zamonaviy taʼlim va ilm-fan markazlaridan biri sifatidagi nufuzini yanada yuksaltirishga xizmat qiladi.

Tadbirda Buxoro davlat universiteti rektori, professor Obidjon Xamidov soʻzga chiqib, universitet jamoasi, professor-oʻqituvchilar va talaba-yoshlarni yangi oʻquv yili bilan samimiy tabrikladi.

Rektor, ayniqsa, universitet safiga yangi qoʻshilgan birinchi bosqich talabalarini “BuxDU talabasi” degan sharafli nomga sazovor boʻlgani bilan qutlab, ularni yaratilgan imkoniyatlardan unumli foydalanish, puxta bilim egallash, ilmiy va ijodiy izlanishlarda faol boʻlishga chaqirdi.

Tadbirda Oʻzbekiston Milliy axborot agentligi direktori, senator Abdusaid Koʻchimov ham soʻzga chiqib, talaba-yoshlarni yangi oʻquv yili bilan tabrikladi. Yoshlarni bilim olish, ilm-fan va maʼrifat yoʻlida izlanish, zamonaviy axborot va media muhitida faol boʻlishga chaqirdi.

Shuningdek, “Yangi Oʻzbekiston” va “Pravda Vostoka” gazetalari bosh muharriri, Oʻzbekistonda xizmat koʻrsatgan jurnalist Salim Doniyorov soʻzga chiqib, talaba-yoshlarga ezgu tilaklarini bildirdi. U yoshlarning jamiyat hayotidagi faolligini oshirish, yuksak bilim va dunyoqarashga ega, Vatan taqdiriga daxldorlik hissi bilan yashaydigan yetuk mutaxassislar boʻlib kamol topishining muhim ahamiyatini taʼkidladi.

Tadbirda universitetda taʼlim sifati va ilmiy faoliyatni yanada rivojlantirish, talabalarning zamonaviy bilim va kasbiy koʻnikmalarni egallashi uchun zarur sharoitlarni kengaytirish yangi oʻquv yilidagi ustuvor vazifalardan biri ekani qayd etildi.

Tantanali tadbir doirasida 2700 oʻringa moʻljallangan yangi zamonaviy oʻquv binosining ochilish marosimi ham oʻtkazildi.

Marosimda faxriy mehmonlar tomonidan ramziy qizil lenta kesilib, yangi oʻquv binosi rasman foydalanishga topshirildi. Universitet jamoasiga yangi binoning ramziy kaliti tantanali ravishda taqdim etildi.

Yangi oʻquv binosida zamonaviy auditoriyalar, taʼlim va ilmiy faoliyat uchun moʻljallangan xonalar, talabalar uchun zarur shart-sharoitlar yaratilgan.

Tadbir ishtirokchilari yangi oʻquv binosi va universitetda barpo etilgan zamonaviy infratuzilma obyektlari bilan tanishib, talabalarning sifatli taʼlim olishi, ilmiy izlanishlar olib borishi va zamonaviy kasbiy koʻnikmalarni egallashi uchun yaratilgan imkoniyatlar haqida maʼlumot oldilar.

Qayd etilganidek, yangi oʻquv binosi universitetning moddiy-texnik bazasini yanada mustahkamlash, taʼlim sifatini oshirish va talaba-yoshlar uchun zamonaviy taʼlim muhitini shakllantirishga xizmat qiladi.

Yangi oʻquv yilining ilk kunida foydalanishga topshirilgan mazkur zamonaviy majmua Buxoro davlat universiteti hayotida yangi imkoniyatlar va yuksak marralar sari tashlangan muhim qadam boʻldi.

Viloyat hokimligi matbuot xizmati