Romitan: “Romitan” mahallasida zamonaviy ixtisoslashtirilgan maktab foydalanishga topshirildi
2026-09-07 09:50:00 / Yangiliklar
Ayni kunda tumanda barkamol avlod ta’lim-tarbiyasiga qaratilayotgan e’tiborning amaliy natijasi sifatida "Romitan" mahalla fuqarolar yig‘inida ham zamonaviy andozadagi ixtisoslashtirilgan maktab foydalanishga topshirildi. Mazkur inshoot O‘zbekiston Respublikasi Prezidentining 2024-yil 24-dekabrdagi “2025–2027-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi PQ-454-sonli qarori asosida amalga oshirildi.
Respublika Maktabgacha va maktab ta’limi vazirligi huzuridagi ixtisoslashgan ta’lim muassasalari agentligining Romitan tuman ixtisoslashtirilgan maktabi 336 o‘ringa mo‘ljallangan bo‘lib, o‘quvchi yoshlarning jismoniy tarbiya va sport bilan shug‘ullanishi uchun zarur imkoniyatlarni yaratishga yo‘naltirilgan zamonaviy sport binosini o‘z ichiga oladi.
Loyihani amalga oshirish uchun Investitsiya dasturi doirasida 20,8 milliard so‘m mablag‘ yo‘naltirildi. O‘tgan oylarda olib borilgan qurilish ishlari natijasida zamonaviy talablarga javob beradigan, o‘quvchilar uchun qulay va shinam ta’lim muhitiga ega bo‘lgan yangi majmua qad rostladi.
Yangi maktabning foydalanishga topshirilishi, avvalo, hududda ta’lim olayotgan bolalar uchun munosib sharoit yaratilgani bilan ahamiyatlidir. Shinam o‘quv xonalari, zarur infratuzilma va sport bilan shug‘ullanish imkoniyatlari yoshlarning bilim va ko‘nikmalarini rivojlantirish, ularning bo‘sh vaqtini mazmunli tashkil etishga xizmat qiladi.
Yangi maktabni foydalanishga topshirish tadbirida tuman hokimligi, jamoatchilik vakillari, faxriy o‘qituvchilar hozir bo‘lishib, yangi ta’lim muassasasi jamoasi va yoshlarni samimiy muborakbod etdilar. Yangi o‘quv yilining boshlanishi, ixtisoslashtirilgan maktabning foydalanishga topshirilishi hamda O‘zbekiston respublikasi davlat mustaqilligining 35 yilligi munosabati bilan ezgu tilaklar bildirildi.
Yangi maktab — nafaqat yangi bino, balki yangi imkoniyatlar, yangi orzular va kelajak sari qo‘yilgan muhim qadam ekanligi ta’kidlandi. Tumanda bunyodkorlik ishlari izchil davom ettirilmoqda. Yangi ta’lim maskanlari esa hudud taraqqiyoti va aholi farovonligining muhim omilidir.
Viloyat hokimligi matbuot xizmati