Buxoro viloyati hokimligi

Mazkur voqea Oʻzbekiston va Yaponiya oʻrtasidagi koʻp qirrali va uzoq muddatli hamkorlikni Buxoro viloyatida yanada rivojlantirish, ayniqsa, taʼlim, inson kapitali, tadbirkorlik va madaniy-gumanitar aloqalarni yangi bosqichga olib chiqish yoʻlidagi muhim qadam boʻldi.

Tantanali ochilish marosimida taʼkidlanganidek, bugungi kunda Oʻzbekiston va Yaponiya oʻrtasidagi doʻstona va ishonchli munosabatlar izchil rivojlanib, amaliy mazmun bilan boyib bormoqda. Ushbu hamkorlikning samarali natijalarini Buxoro viloyati misolida ham koʻrish mumkin.

Oʻzbekiston–Yaponiya markazi Buxoro shahar vakolatxonasi 2007-yil 28-martda oʻz faoliyatini boshlagan. Oʻtgan yillar davomida Markaz Buxoro yoshlari, tadbirkorlari, mutaxassislari va keng jamoatchilik uchun bilim, tajriba va xalqaro muloqot maydoniga aylandi. Shu davr mobaynida Markaz xizmatlari, taʼlim dasturlari va turli tadbirlaridan foydalanganlar soni 300 ming nafardan oshdi. Bu raqamlar Markazning Buxoro ijtimoiy-maʼrifiy hayotidagi oʻrni tobora ortib borayotganini koʻrsatadi. Ayniqsa, soʻnggi bir yilda Markazga 25 ming nafardan ortiq kishi tashrif buyurdi. 300 nafardan ziyod yoshlar va mutaxassislar yapon tilini oʻrganish imkoniyatiga ega boʻldi. Qariyb 200 ta madaniy-maʼrifiy tadbir tashkil etilib, ularda 4 mingdan ortiq kishi ishtirok etdi.

Ushbu natijalar zamirida esa, avvalo, yangi bilim va kasbiy koʻnikmalarni egallashga intilayotgan yoshlar, Yaponiya tajribasini oʻrganishga qiziqish bildirayotgan tadbirkorlar, mutaxassislar hamda ikki mamlakat oʻrtasidagi madaniy aloqalarni rivojlantirishga hissa qoʻshayotgan faollar turibdi.

Foydalanishga topshirilgan yangi bino Markaz faoliyatini yanada kengaytirish va zamonaviy talablar asosida yangi xizmatlarni yoʻlga qoʻyish uchun zarur sharoitlarni yaratadi.

Endilikda bu yerda biznes-taʼlim, biznes-konsalting, korporativ taʼlim, yapon tilini oʻqitish hamda xalqaro taʼlim hamkorligi yoʻnalishlaridagi loyiha va dasturlarni yanada kengaytirish imkoniyati paydo boʻladi. Ayniqsa, tadbirkorlar va mutaxassislar uchun Yaponiyaning ilgʻor boshqaruv usullari, ishlab chiqarish madaniyati va samaradorlikni oshirish tajribasini oʻrganish muhim ahamiyat kasb etadi.

Buxoroda “PMP-50” dasturining oʻzbek tilida yoʻlga qoʻyilgani ham ana shu maqsadga xizmat qilmoqda. Shuningdek, Yaponiyaning mashhur “Kaydzen” yondashuvini joriy etish boʻyicha ishlar ham mahalliy korxona va tashkilotlarda samaradorlik, sifat va boshqaruv madaniyatini oshirish uchun yangi imkoniyatlar yaratmoqda.

Bundan tashqari, oʻtkazilishi rejalashtirilayotgan “Japan Education Fair” koʻrgazmasi yoshlar va mutaxassislarning Yaponiya taʼlim tizimi, universitetlar va xalqaro taʼlim imkoniyatlari haqida bevosita maʼlumot olishiga xizmat qiladi.

Bugungi kunda Oʻzbekiston–Yaponiya munosabatlarida taʼlim va inson kapitali masalalari alohida oʻrin tutadi.

Shu nuqtayi nazardan, yangi binoning ochilishi nafaqat infratuzilmaviy yangilanish, balki Buxoroda yoshlarni zamonaviy bilim va koʻnikmalar bilan taʼminlash, ularning xorijiy tillarni oʻrganishi, xalqaro taʼlim dasturlarida ishtirok etishi hamda kasbiy salohiyatini oshirishi uchun yangi imkoniyatlar yaratilishini anglatadi.

Yangi maskanda yoshlar, tadbirkorlar va mutaxassislar uchun bilim va tajriba almashish, yangi gʻoyalarni muhokama qilish, hamkorlik loyihalarini ishlab chiqish va amalga oshirish uchun yanada qulay muhit shakllanadi.

Shu maʼnoda, yangi bino kelgusida nafaqat taʼlim olish, balki yangi tashabbuslar tugʻiladigan, yangi hamkorliklar yoʻlga qoʻyiladigan va innovatsion gʻoyalar qoʻllab-quvvatlanadigan muhim maydonga aylanishi kutilmoqda.

Tadbirda soʻzga chiqqan viloyat hokimi Botir Zaripov Yaponiya Hukumati, Yaponiyaning Oʻzbekistondagi Elchixonasi, JICA hamda Oʻzbekiston–Yaponiya markazining barcha hamkorlariga Buxoro viloyatida inson kapitali, taʼlim va tadbirkorlikni rivojlantirishga qoʻshayotgan hissasi uchun samimiy minnatdorlik bildirdi.

Qayd etilganidek, bugun ochilayotgan yangi bino ikki davlat oʻrtasidagi hamkorlikning amaliy natijalarini yanada koʻpaytirishga xizmat qiladi.

Bu yerda yangi bilimlar egallanadi, ilgʻor tajribalar oʻrganiladi, yangi loyihalar shakllanadi va eng muhimi, Oʻzbekiston hamda Yaponiya xalqlari oʻrtasidagi doʻstlik va oʻzaro anglashuv yanada mustahkamlanadi.

Ishonch bilan aytish mumkinki, Oʻzbekiston–Yaponiya markazi Buxoro shahar vakolatxonasining yangi binosi viloyatda taʼlim, tadbirkorlik, madaniyat va inson kapitali sohalaridagi hamkorlikni yangi bosqichga olib chiqadigan zamonaviy maskanlardan biriga aylanadi.

Ramziy lenta qirqilib, yigʻilgan markazda yaratilgan shart-sharoitlar bilan yaqindan tanishdilar. 

Viloyat hokimligi matbuot xizmati