Buxoro viloyati hokimligi

Churuqning o‘ziga xos tarixiga nazar tashlasak, mavjud manbalarga ko‘ra, Buxoro amirligi davrida, xususan, Amir Olimxon hukmronligi yillarida bu hudud muhim strategik va savdo yo‘llaridan birida joylashgan.

Hozirgi Zarafshon va Tomdi hududlari, shuningdek, Qozog‘iston tomonidan Buxoro amirligi sari yo‘l olgan savdo karvonlari Churuq hududi orqali harakatlangan. Karvonlar Qozog‘iston hududidan “Qozoq-asuv” deb ataluvchi tog‘lar orasidagi yirik dovon orqali Buxoro tomon yo‘l olgan. Ana shu yo‘nalish Churuq hududining iqtisodiy va strategik ahamiyatini yanada oshirgan. Uzoq masofalarni bosib o‘tgan savdogarlar, chorvadorlar va karvon ahli uchun bu maskan muhim bekatlardan biri vazifasini bajargan.

Yubiley munosabati bilan yurtimizning turli hududlaridan, shuningdek, qo‘shni Qozog‘iston Respublikasidan ham mehmonlar tashrif buyurdi. Ota-bobolari, qarindosh-urug‘lari va yaqinlari bilan diydorlashish maqsadida qariyb 300 nafar qardosh Churuq ovulida jam bo‘ldi. Ularning tashrifi bayramga o‘zgacha fayz-tarovat va ko‘tarinki kayfiyat bag‘ishladi.

Tantanalarning dastlabki kunida ovulda mehmonlar uchun keng dasturxon yozilib, milliy taomlar, xususan, beshbarmoq tortildi. Dasturxon atrofida jam bo‘lgan yurtdoshlar va mehmonlar o‘zaro diydorlashib, samimiy suhbatlar qurdilar.

Davrada Qur’oni karim tilovat qilinib, o‘tgan ajdodlar ruhi yodga olindi. Yurtimiz tinchligi va osoyishtaligi, bugungi farovon hayot uchun shukronalar bildirilib, duoga qo‘l ochildi. Bu ezgu amallar Churuq ovulining bir asrlik tarixini yaratgan avlodlar xotirasiga hurmat va ehtiromning yorqin ifodasi bo‘ldi.

Shundan so‘ng ovuldagi umumta’lim maktabi o‘quvchilari tomonidan tayyorlangan badiiy chiqishlar, milliy kuy-qo‘shiqlar va turli sahna ko‘rinishlari namoyish etildi. Navqiron avlod vakillarining chiqishlari tadbir ishtirokchilariga ko‘tarinki kayfiyat va bayram shukuhini ulashdi.

Tantanali tadbirda tuman hokimligi, jamoatchilik vakillari, cho‘lquvarlar yurtida yashayotgan aholi va mehmonlar ishtirok etdi. Churuqliklar va tashrif buyurgan qardoshlar mamlakatimiz mustaqilligining 35 yilligi hamda ovulning 100 yillik tarixiy sanasini katta shodiyona bilan nishonladilar.

Yig‘ilganlar ovul ahliga tinchlik-xotirjamlik, oilaviy farovonlik, salomatlik va kelgusi taraqqiyot yo‘lida ulkan muvaffaqiyatlar tiladilar.

Yubiley tantanalarining ikkinchi kuni ham ko‘tarinki ruhda davom etdi. Ovulga tashrif buyurgan mehmonlar uchun an’anaga ko‘ra, beshbarmoq va osh tortildi. Bir dasturxon atrofida jam bo‘lgan yurtdoshlar yana bir bor diydorlashib, samimiy suhbatlar qurdilar.

Cho‘lquvarlar qirida milliy o‘yinlarimizdan biri — ko‘pkari tashkil etildi. Unda uzoq va yaqin hududlardan tashrif buyurgan chavandozlar ishtirok etib, o‘z mahoratlarini namoyish etdilar. Qizg‘in va murosasiz kechgan uloq-ko‘pkari bahslari tomoshabinlarga o‘zgacha zavq va hayajon bag‘ishladi.

Davlatimiz mustaqilligining qutlug‘ 35 yilligi, hurriyat bayramiga uyg‘un tarzda o‘tkazilgan Churuq ovulining 100 yillik yubiley tantanalari xalqimizga xos mehmondo‘stlik, hamjihatlik, o‘zaro mehr-oqibat, milliy qadriyat va an’analarimizning yorqin namoyishiga aylandi.

Bir asrlik tarixga ega Churuq ovulining yubiley tantanalari nafaqat o‘tmishni yod etish, balki bugungi tinch va farovon hayotni qadrlash, avlodlar o‘rtasidagi rishtalarni mustahkamlash hamda kelajakka ishonch bilan qadam qo‘yishga chorlovchi ezgu an’ana sifatida tarix zarvaraqlaridan munosib o‘rin oldi.

Viloyat hokimligi matbuot xizmati