Buxoro viloyati hokimligi

Romitan tumanida yashab o‘tgan usta hunarmand sulolalardan biri Qurbon Safarov ham 40 yildan ko‘proq umrini qorako‘l teridan tayyorlangan mahsulotlarni dunyoga taratishga bag‘ishlagan. Hunarmandning garchi chekka bir hududda yetishtirilgan qorako‘l terilari va ulardan tayyorlagan betakror liboslari dunyo bo‘ylab o‘z xaridorlarlariga ega bo‘lgan. Qo‘li gul hunarmand Qurbon Safarovdan yirik qo‘l mehnati namunalari kolleksiyasi, o‘nlab xos shogird va xalq amaliy san’ati namunalaridan iborat meros qoldi. O‘lmas hunar  davom ettirilmoqda. 
 

Aytish joimzki, bugun ham yetuk hunarmandning tashabbusi bilan tashkil qilingan "Bukhara Karakul Islam" mas’uliyati cheklangan jamiyatida tayyorlanayotgan mahsulotlarga xaridor bisyor. Ayni kunda 30 nafar ishchi, chevar  mehnat qilayotgan korxona gavjum, anjomlari Xitoy davlatidan keltirilgan. Bejirim kiyim boshlar Xitoy, Mangoliya, Rossiya, Qozog‘iston davlatlariga  epsport qilinayotgani barobarida ichki bozorlarimizda sotilmoqda. 
 

Otasining duosini olgan Islom Safarov ham doimiy harakat va izlanishda. Yangi dizayn, uslub, liboslar haqida bosh qotiradi. Dunyo bozorlari talablarini o‘rganadi. Onajonisi Nilufar Murodova, singlisi Sabrina Safarovalar maslahatlariga tayanadi. Shu bois, chevarlar korxonasi kundan kunga rivojlanib, o‘z brendiga—yorlig‘iga ega bo‘lib bormoqda. Xom ashyo, qorako‘l terining asosiy qismi o‘zimizda bo‘lsa, qo‘shimcha Afg‘oniston davlatidan ham xarid qilinmoqda. 
 

Tabiiy, toza, bejirim qorako‘li teridan tayyorlangan kiyim-boshlar go‘zalligi, bejirim, yarashiqliligi ila buyurtmachilarini lol etib, yaratuvchilariga olqishlar olib kelaveradi. “Bukhara Karakul Islam” MChJ rahbari tomonidan teridan turli xildagi mahsulot ishlab chiqarish faoliyatini kengaytirish maqsadida 270 ming AQSh dollari miqdorida bank kredit mablag‘i ajratilishida amaliy yordam so‘rab murojaat ham qilgan. 
 

Mehnat jamoasi qorako‘l teri mahsulotlariga sayqal berish, yangicha andozalar tashabbusini qo‘lga olgan. Bugunga kelib oilaviy ustaxonada 30 dan ortiq turdagi mahsulot, liboslar ishlab chiqarilmoqda. Bular orasida bosh kiyimlar, joynamoz, so‘zana, palto, kamzul, oyoq kiyimlari va boshqa ko‘plab qo‘y terisidan tayyorlanadigan milliy mahsulotlar bor. Ularning ishlov jarayoni esa o‘ziga xos: teri avval cho‘ponlardan olinadi, keyin esa oilaning o‘zi tomonidan oshlab, to tayyor mahsulotgacha yetkaziladi.
 

Ushbu faoliyat nafaqat hunarmandchilik, balki ijtimoiy ahamiyatga ham ega. Har yili, ayniqsa, kuz mavsumida bu ustaxonada ishchilar “qo‘li-qo‘liga tegmaydi”. Har bir ishchi mavsum davomida o‘rtacha 6-7 million so‘m atrofida daromad ishlab topish imkoniga ega. 
 

Muhimi, tumanda bu kabi namunali oilaviy tadbirkorlar o‘z mehnati, sabr-toqati va hunarga bo‘lgan yondashuvi orqali xalq amaliy qo‘l mehnati merosini nafaqat saqlab qolmoqda, balki uni yanada rivojlantirmoqda.