Buxoro viloyati hokimligi

Mustaqilligimizning 35 yilligi arafasida Shofirkon tumanida ham bu boradagi ishlar yangi bosqichga koʻtarildi. Tumandagi qator taʼlim muassasalari kapital taʼmirlanib, zamonaviy jihozlar bilan taʼminlandi, yangi oʻquv binolari va sport inshootlari barpo etildi.

Yangi oʻquv yili arafasida mazkur taʼlim maskanlarining foydalanishga topshirilishi oʻquvchilar, ustozlar va ota-onalar uchun munosib bayram tuhfasi boʻldi.

Jumladan, Jilvon qishlogʻida joylashgan 26-sonli umumtaʼlim maktabida keng koʻlamli yangilanishlar amalga oshirilib, taʼlim dargohi zamonaviy qiyofada foydalanishga topshirildi.

Tantanali tadbirda tuman hokimligi mutasaddilari, nuroniylar, maktab jamoasi va ota-onalar ishtirok etib, oʻquvchilar hamda ustozlarni yangilangan sharoitlar bilan muborakbod etdilar.

Mazkur taʼlim maskani Osiyo taraqqiyot banki mablagʻlari hisobidan “Qishloq hududlarini barqaror rivojlantirish” dasturi doirasida qariyb 5,5 milliard soʻm mablagʻ evaziga kapital taʼmirlandi.

Amalga oshirilgan qurilish-taʼmirlash ishlari natijasida 330 oʻrinli yangi oʻquv binosi barpo etildi. Natijada maktabning umumiy oʻquvchi sigʻimi 476 nafarga yetkazildi.

Barcha sinf xonalari zamonaviy oʻquv jihozlari, yangi parta va stullar, elektron doskalar hamda xavfsizlikni taʼminlovchi kuzatuv vositalari bilan taʼminlandi.

Eng muhimi, yaratilgan yangi sharoitlar maktabda bir smenali taʼlim tizimiga oʻtish imkonini bermoqda.

Bu oʻzgarishlar davlatimiz tomonidan qishloq maktablarini har tomonlama qoʻllab-quvvatlashga qaratilayotgan eʼtiborning amaliy ifodasidir.
“Doʻrman” mahallasida ham yangi oʻquv yilining boshlanishi munosabati bilan tantanali tadbir oʻtkazildi. Mustaqilligimizning 35 yilligi arafasida taʼlim muassasasining kapital taʼmirdan chiqarilib, zamonaviy qiyofada foydalanishga topshirilishi mahalla aholisi, ustozlar, oʻquvchilar va ota-onalar uchun unutilmas voqeaga aylandi.

1965 yilda bunyod etilgan maktab koʻp yillar davomida minglab yoshlarning taʼlim va tarbiya olishida muhim maskan boʻlib xizmat qildi.

Bugun esa u zamonaviy taʼlim dargohi sifatida yangi qiyofa kasb etdi.

Islom taraqqiyot banki va OPEK dasturi doirasida qariyb 6 milliard 386 million soʻm mablagʻ yoʻnaltirilib, “Saidov Building” MCHJ tomonidan kapital taʼmirlash ishlari amalga oshirildi.

720 oʻringa moʻljallangan maktabda oʻquvchilar uchun barcha zarur sharoitlar yaratildi. Sinf xonalari zamonaviy oʻquv jihozlari bilan taʼminlanib, yoshlarning sifatli bilim olishi, oʻz iqtidor va salohiyatini namoyon etishi uchun qulay muhit shakllantirildi.

Ayni paytda maktabda 513 nafar oʻquvchi tahsil olmoqda. Ularga 56 nafar pedagog taʼlim-tarbiya bermoqda. Ularning 17 nafari milliy va xalqaro darajadagi sertifikatlarga ega.

Taʼlim sifatiga qaratilayotgan eʼtibor oʻz natijasini bermoqda. 9–11-sinf oʻquvchilari orasida milliy va xalqaro sertifikat sohiblari soni 18 nafarga yetgan.

Oʻtgan oʻquv yilida maktabni 32 nafar 11-sinf bitiruvchisi tamomlagan boʻlib, ularning 13 nafari davlat oliy taʼlim muassasalariga talaba boʻldi.

Mustaqillikning 35 yilligi arafasida 42-sonli umumtaʼlim maktabi ham yangilangan qiyofada foydalanishga topshirildi.

1989-yilda bunyod etilgan, 180 oʻringa moʻljallangan mazkur maktab yillar davomida foydalanish natijasida taʼmirtalab holatga kelgan edi.

Joriy yilda OPEK dasturi doirasida ajratilgan qariyb 5,2 milliard soʻm mablagʻ hisobidan maktab binosida kapital taʼmirlash ishlari amalga oshirildi. Taʼlim olish uchun zarur shart-sharoitlar yaxshilanib, oʻquvchilar va pedagoglar uchun zamonaviy muhit yaratildi.

Maktab hududida oʻquvchilarning jismoniy tarbiya va sport bilan muntazam shugʻullanishlari uchun 12x24 metr oʻlchamdagi yangi sport zali ham barpo etilib, foydalanishga topshirildi.

Bugungi kunda maktabda 308 nafar oʻquvchi tahsil olmoqda. Ularga 33 nafar pedagog taʼlim-tarbiya bermoqda. Oʻqituvchilarning 13 nafari milliy va xalqaro darajadagi nufuzli sertifikatlarga ega.

Maktab oʻquvchilarining taʼlimdagi natijalari ham tahsinga loyiq. Xususan, 2025–2026-oʻquv yilida maktabni tamomlagan 11 nafar bitiruvchining 8 nafari davlat va xususiy oliy taʼlim muassasalariga oʻqishga qabul qilindi.

Tantanali tadbir davomida taʼlim maskanini yangilashda faol ishtirok etgan quruvchi va mutaxassislarning mehnati ham alohida eʼtirof etildi.

Shofirkondagi mazkur taʼlim maskanlarida amalga oshirilgan bunyodkorlik ishlari bir jihat bilan mushtarak — ularning barchasida oʻquvchilar uchun munosib, zamonaviy va xavfsiz taʼlim muhitini yaratish maqsadi mujassam.

Zamonaviy sinf xonalari, elektron doskalar, yangi jihozlar, sport inshootlari va boshqa qulayliklar oʻquvchilarning sifatli bilim olishi bilan birga, ularning iqtidori va qobiliyatini roʻyobga chiqarishi uchun ham keng imkoniyat yaratadi.

Viloyat hokimligi matbuot xizmati