Buxoro viloyati hokimligi

Ana shunday bunyodkorlik ishlari doirasida “Soʻfidehqon” va “Xoʻjarabot” mahallalaridagi 18- va 7-sonli umumiy oʻrta taʼlim maktablarida qurilish va mukammal taʼmirlash ishlari amalga oshirilib, taʼlim maskanlari oʻquvchilar ixtiyoriga topshirildi.

“Soʻfidehqon” mahallasidagi 18-sonli umumiy oʻrta taʼlim maktabi uchun 624 oʻrinli zamonaviy yangi oʻquv binosi barpo etildi. Oʻzbekiston Respublikasi Prezidentining 2023-yil 25-dekabrdagi PQ-404-son qarori asosida investitsiya dasturi doirasida amalga oshirilgan loyihaning umumiy qiymati 4 milliard 300 million soʻmni tashkil etdi.

Yangi maktab binosining ochilishiga bagʻishlangan tadbirda tuman hokimligi mutasaddilari, mahalla faollari, nuroniylar, pedagoglar, ota-onalar va oʻquvchilar ishtirok etdi.

Yaratilgan zamonaviy sharoitlar oʻquvchilarning puxta bilim olishi, boʻsh vaqtini mazmunli oʻtkazishi va qobiliyatlarini rivojlantirishi uchun keng imkoniyat yaratmoqda. Ayni paytda maktabda 64 nafar pedagog va xodim faoliyat yuritmoqda.

Taʼlim muassasasining natijalari ham eʼtiborga loyiq. Bitiruvchilarning oliy taʼlim muassasalariga kirish koʻrsatkichi 66 foizni tashkil etib, avvalgi oʻquv yiliga nisbatan 7 foizga oshdi.

Tadbirda ramziy lenta kesilib, maktabning ramziy kaliti taʼlim muassasasi jamoasiga topshirildi. Ishtirokchilar yangi binoda yaratilgan sharoitlar bilan tanishdilar.

“Xoʻjarabot” mahallasidagi 7-sonli umumiy oʻrta taʼlim maktabi ham zamonaviylashtirilib, foydalanishga topshirildi.

Osiyo taraqqiyot banki dasturi asosida amalga oshirilgan loyiha doirasida maktab 6 milliard 100 million soʻm mablagʻ hisobidan mukammal taʼmirlandi. Binoning ichki va tashqi qismi yangilanib, oʻquvchilar va pedagoglar uchun zarur shart-sharoitlar yaratildi.

Darhaqiqat, zamonaviy maktab — bu shunchaki yangi yoki taʼmirlangan bino emas. U yosh avlodning bilim olishi, isteʼdod va qobiliyatini namoyon etishi, kelajakda munosib oʻrin egallashi uchun zarur muhitni yaratadi.

Viloyat hokimligi matbuot xizmati