Buxoro viloyati hokimligi

Taʼlim sohasiga qaratilayotgan eʼtibor, avvalo, farzandlarimizning sifatli bilim olishi, ularning boʻsh vaqtini mazmunli oʻtkazishi, sport bilan shugʻullanishi va zamonaviy sharoitlarda taʼlim-tarbiya olishi uchun keng imkoniyatlar yaratishda namoyon boʻlmoqda.

Ayniqsa, yangi oʻquv yili arafasida tumandagi taʼlim muassasalarini taʼmirlash, ularning infratuzilmasini yaxshilash, isitish tizimlarini yangilash, sport inshootlarini barpo etish kabi ishlarga alohida eʼtibor qaratilmoqda.

“Mirvoshi” mahallasidagi 35-son umumtaʼlim maktabi kapital taʼmirdan chiqarilib, bugun tantanali ravishda foydalanishga topshirildi.

Mazkur taʼlim maskanini mukammal taʼmirlash ishlariga 3 milliard 878 million soʻm mablagʻ yoʻnaltirildi.

Amalga oshirilgan keng koʻlamli ishlar natijasida maktab binosi zamonaviy, shinam va oʻquv jarayonini samarali tashkil etish uchun barcha zarur sharoitlarga ega taʼlim maskaniga aylantirildi.

Endi bu yerda oʻquvchilar uchun sifatli taʼlim olish, pedagoglar uchun esa oʻz kasbiy faoliyatini samarali tashkil etishga munosib muhit yaratildi. Taʼlim muassasasining yangilanishi oʻquvchilarda maktabga boʻlgan qiziqish va ishtiyoqni yanada oshirishi, oʻqituvchilar uchun esa darslarni zamonaviy yondashuvlar asosida tashkil etish imkoniyatlarini kengaytirishi shubhasiz.

Yangi oʻquv yili arafasida maktab jamoasi uchun yana bir quvonarli jihat — taʼlim muassasasi 2026–2027-oʻquv yiliga toʻliq tayyor holga keltirildi.

Maktabga ilk bor qadam qoʻyadigan birinchi sinf oʻquvchilari uchun Prezident sovgʻalari, barcha oʻquvchilar uchun esa yangi oʻquv yilida foydalanish uchun zarur darsliklar toʻliq yetkazib berilgan.

Bu esa oʻquv yilining dastlabki kunidanoq bolalar uchun barcha sharoitlar muhayyo boʻlishini taʼminlaydi.

Shu kuni “Koʻlxatib” mahallasidagi 39-son umumtaʼlim maktabi binosi ham tantanali ravishda foydalanishga topshirildi.

Ushbu taʼlim muassasasida ham keng koʻlamli bunyodkorlik va obodonlashtirish ishlari amalga oshirildi.

Maktab oʻquv binosini mukammal taʼmirlash, zamonaviy yopiq sport zali barpo etish hamda taʼlim muassasasining isitish tizimini toʻliq yangilash maqsadida 4 milliard soʻmdan ortiq mablagʻ yoʻnaltirildi.

Bajarilgan ishlar natijasida maktabning nafaqat tashqi qiyofasi, balki oʻquv jarayoni uchun zarur ichki infratuzilmasi ham tubdan yaxshilandi.

Yangi yopiq sport zali esa oʻquvchilarning jismoniy tarbiya va sport bilan muntazam shugʻullanishi uchun katta imkoniyat yaratadi. Ayniqsa, yilning sovuq va noqulay ob-havo sharoitlarida ham bolalarning sport mashgʻulotlarini sifatli davom ettirishi uchun zarur sharoit yaratilgani ahamiyatlidir.

Zamonaviy sport zalida turli sport toʻgaraklarini tashkil etish, musobaqalar oʻtkazish va iqtidorli yoshlarni sportga keng jalb qilish uchun ham imkoniyatlar kengaydi.

Yangilangan isitish tizimi esa qish mavsumida oʻquvchilar va pedagoglar uchun yanada qulay, iliq va xavfsiz muhitni taʼminlashga xizmat qiladi.

Tantanali tadbirda mahalla faollari, nuroniylar, ota-onalar, oʻqituvchilar, oʻquvchilar va keng jamoatchilik vakillari ishtirok etdi.

Yangilangan maktab va barpo etilgan yangi sport zali mahalla ahlining quvonchiga sabab boʻldi. Zero, har qanday bunyodkorlik ishining zamirida inson qadri, ayniqsa, yosh avlod uchun munosib sharoit yaratishdek ezgu maqsad mujassam.

Tadbir davomida taʼlim muassasalarini taʼmirlash va zamonaviy qiyofaga keltirishda oʻz hissasini qoʻshgan barcha insonlarga nuroniylar tomonidan samimiy minnatdorlik bildirildi. Yaxshi niyatlar bildirilib, amalga oshirilayotgan ezgu ishlar davomli boʻlishi, farzandlarimiz kamoloti va yurt farovonligi yoʻlidagi bunyodkorlik ishlari yanada koʻpayishi uchun duolar qilindi.

Darhaqiqat, maktab — nafaqat taʼlim beriladigan maskan, balki yosh avlodning orzu va maqsadlari shakllanadigan, uning dunyoqarashi va kelajakka intilishi qaror topadigan muhitdir.

Shu bois taʼlim muassasalarining zamonaviylashtirilishi, ularda munosib sharoitlar yaratilishi ertangi kunga qoʻyilayotgan eng muhim va ustuvor qadamlardan biridir.

Viloyat hokimligi matbuot xizmati