Buxoro viloyati hokimligi

Shofirkon tumanining “Mirzoqul” mahallasida amalga oshirilayotgan keng koʻlamli bunyodkorlik ishlari ana shu maqsadlarga qaratilgani bilan ahamiyatli.

Islom taraqqiyot banki guruhi ishtirokidagi “Qishloq joylarni barqaror rivojlantirish” loyihasi doirasida mahallada taʼlim, tibbiyot, ichimlik suvi, yoʻl, elektr taʼminoti, irrigatsiya va maishiy xizmat koʻrsatish sohalarini qamrab olgan qator loyihalar amalga oshirilmoqda.

Yaqinda Islom taraqqiyot bankining Olmaota filialidan loyihalar boʻyicha mintaqaviy menejer boshchiligidagi delegatsiya aʼzolari “Mirzoqul” mahallasida boʻlib, amalga oshirilgan qurilish, taʼmirlash va obodonlashtirish ishlari bilan tanishdilar.

“Mirzoqul” mahallasida loyiha doirasida amalga oshirilgan ishlar uchun jami 31 milliard 950 million soʻm mablagʻ yoʻnaltirilgan. Bu mablagʻlar birgina bitta obyektni qurishga emas, balki mahallaning ijtimoiy va muhandislik infratuzilmasini kompleks ravishda yaxshilashga xizmat qilmoqda. Yangi obyektlar, taʼmirlangan taʼlim muassasalari, yaxshilangan yoʻllar, ichimlik suvi va elektr tarmoqlari — bularning barchasi aholining kundalik hayotida oʻz ifodasini topayotgan oʻzgarishlardir.

Mahalladagi eng yirik loyihalardan biri — uch qavatli maishiy-xizmat koʻrsatish markazi. Uning qurilishi uchun 11 milliard 264 million soʻm mablagʻ ajratildi. Bugun mazkur markaz foydalanishga topshirilib, oʻz faoliyatini olib bormoqda. Markazning ishga tushirilishi mahalla aholisi uchun maishiy va xizmat koʻrsatish imkoniyatlarini kengaytirdi. Endi aholi koʻplab xizmatlardan oʻz mahallasida, yaqin va qulay sharoitda foydalanish imkoniyatiga ega. Bu esa nafaqat aholiga qulaylik, balki mahallada xizmat koʻrsatish sohasini rivojlantirish va yangi ish oʻrinlari yaratish uchun ham muhim zamin yaratadi.

Mahallada taʼlim sohasini rivojlantirishga ham salmoqli mablagʻ yoʻnaltirildi. Jumladan, 9-son maktabgacha taʼlim tashkilotini rekonstruksiya qilish uchun 3 milliard 168 million soʻm mablagʻ sarflandi. Amalga oshirilgan rekonstruksiya ishlari natijasida 90 oʻrinli zamonaviy maktabgacha taʼlim maskani barpo etildi. Bu yerda bolalar uchun qulay, zamonaviy va xavfsiz taʼlim-tarbiya muhiti yaratilgan. Shuningdek, 28-son umumtaʼlim maktabini taʼmirlash uchun 4 milliard 664 million soʻm mablagʻ ajratildi. 540 oʻrinli mazkur taʼlim muassasasida amalga oshirilgan taʼmirlash ishlari oʻquvchilar va pedagoglar uchun yanada qulay sharoitlar yaratishga xizmat qilmoqda. Ayni paytda ushbu maktab hamda 9-son maktabgacha taʼlim tashkiloti filialini Oʻzbekiston Respublikasi davlat mustaqilligining 35 yilligi munosabati bilan foydalanishga topshirish rejalashtirilgan.

Mahalla aholisiga tibbiy xizmat koʻrsatish sifatini oshirish maqsadida Mirzoqul oilaviy shifokorlik punkti binosi ham rekonstruksiya qilinmoqda. 50 qatnovga moʻljallangan mazkur tibbiyot muassasasini rekonstruksiya qilish uchun 1 milliard 759 million soʻm mablagʻ ajratilgan. Yangilangan tibbiyot muassasasi mahalla aholisi uchun tibbiy xizmatlarni yanada yaqinlashtirish, profilaktika va davolash ishlarini samarali tashkil etish imkonini beradi.

Infratuzilma haqida gap ketganda, ichimlik suvi taʼminoti alohida ahamiyatga ega. “Mirzoqul”da aholini sifatli ichimlik suvi bilan taʼminlash maqsadida 5,610 kilometr uzunlikdagi ichimlik suvi tarmogʻi tortildi. Bu ishlar uchun 1 milliard 760 million soʻm mablagʻ yoʻnaltirildi.

Sifatli ichimlik suvining xonadonga kirib kelishi — oddiy raqam yoki infratuzilma koʻrsatkichi emas. Bu, eng avvalo, inson salomatligi, turmush qulayligi va kundalik hayot sifatidagi muhim oʻzgarishdir.

Mahallada yoʻl infratuzilmasini yaxshilashga ham katta eʼtibor qaratildi. Uzunligi 6,167 kilometr boʻlgan magistral va ichki yoʻllar joriy taʼmirdan chiqarildi. Bu ishlar uchun 4 milliard 95 million soʻm mablagʻ ajratildi. Bundan tashqari, aholining xavfsiz va qulay harakatlanishini taʼminlash maqsadida 5 kilometr uzunlikda piyodalar yoʻlaklari qurish uchun 1 milliard 230 million soʻm mablagʻ yoʻnaltirildi. Yoʻllar va piyodalar yoʻlaklarining yaxshilanishi mahallada harakatlanish xavfsizligini oshirib, aholi uchun yanada qulay muhit yaratmoqda. Mahallada elektr taʼminotini yaxshilash boʻyicha ham salmoqli ishlar bajarildi. Jumladan, 10 ta transformator podstansiyasi oʻrnatilib, 9,2 kilometr uzunlikdagi elektr tarmoqlari tortildi. Ushbu ishlar uchun 2 milliard 250 million soʻm mablagʻ sarflandi. Yangi elektr tarmoqlari va transformator podstansiyalari aholi xonadonlari hamda ijtimoiy obyektlarni barqaror elektr energiyasi bilan taʼminlash imkoniyatini oshirmoqda.

“Mirzoqul”da irrigatsiya tizimini yaxshilashga ham eʼtibor qaratilgan. Mahalla hududidagi 3 kilometr irrigatsiya tizimini yaxshilash uchun 1 milliard 760 million soʻm mablagʻ yoʻnaltirildi. Ayni paytda mazkur qurilish ishlari yakuniga yetkazilmoqda. Irrigatsiya tarmoqlarining yaxshilanishi qishloq xoʻjaligi yerlaridan samarali foydalanish, suv taʼminotini yaxshilash va hududning agrar salohiyatini oshirishda muhim ahamiyat kasb etadi.

Delegatsiya tashrifi davomida loyihalarning faqat qurilish jarayoni emas, balki aholi hayotiga taʼsiriga ham alohida eʼtibor qaratildi. Ichimlik suvi tarmogʻi yetkazilgan xonadonlarda boʻlib, aholi va nuroniylar bilan muloqot qilindi. Suhbatlar davomida mahallada yaratilgan yangi sharoitlar, infratuzilma loyihalarining kundalik hayotdagi ahamiyati va soʻnggi yillarda yuz berayotgan ijobiy oʻzgarishlar haqida fikr almashildi. Bu muloqotlarda bir jihat yaqqol namoyon boʻldi: amalga oshirilayotgan har bir loyihaning markazida inson manfaati turibdi. Chunki yangi maktab — bolaning sifatli taʼlim olishi uchun, rekonstruksiya qilingan tibbiyot punkti — aholi salomatligi uchun, ichimlik suvi tarmogʻi — munosib turmush uchun, taʼmirlangan yoʻl — xavfsiz harakat uchun, yangi xizmat koʻrsatish markazi esa aholiga qulaylik va yangi imkoniyatlar uchun xizmat qiladi.

“Mirzoqul” mahallasida amalga oshirilayotgan ishlar bir-biri bilan uzviy bogʻliq. Taʼlim, tibbiyot, ichimlik suvi, yoʻl, elektr, irrigatsiya va xizmat koʻrsatish sohalaridagi yangilanishlar mahallaning umumiy qiyofasini oʻzgartirib, aholi uchun yanada munosib yashash sharoitlarini yaratmoqda. Islom taraqqiyot banki guruhi ishtirokidagi “Qishloq joylarni barqaror rivojlantirish” loyihasi doirasida “Mirzoqul”ga yoʻnaltirilgan 31 milliard 950 million soʻmlik mablagʻ aynan shu maqsadga — inson qadrini ulugʻlash, infratuzilmani yangilash va mahalla aholisining turmush farovonligini oshirishga xizmat qilmoqda.

Zero, barqaror taraqqiyotning eng muhim mezoni — qurilgan inshootlar soni emas, balki ular orqali inson hayotining qay darajada yaxshilanganidir. Mirzoquldagi bugungi yangilanishlar ana shu maqsadning amaliy natijasi sifatida namoyon boʻlmoqda.

Viloyat hokimligi matbuot xizmati