Buxoro viloyati hokimligi

Mustaqilligimizning 35 yilligi arafasida “Tezguzar” mahallasida 20-son davlat maktabgacha taʼlim tashkiloti filialining yangi binosi foydalanishga topshirildi. Yangi muassasaning ochilishi mahalla aholisi, ayniqsa, ota-onalar va bolalar uchun quvonchli voqea boʻldi.

Shu munosabat bilan tashkil etilgan tadbirda Islom taraqqiyot banki delegatsiyasi vakillari, mahalla faollari, nuroniylar, tarbiyachilar, ota-onalar hamda jamoatchilik vakillari ishtirok etdi.

90 oʻringa moʻljallangan mazkur filial “FAST QUALITY BUILDING” MCHJ tomonidan rekonstruksiya qilindi. Binoni taʼmirlash, moddiy-texnik bazasini yaxshilash va bolalar uchun zarur sharoitlarni yaratish maqsadida 3 milliard 37 million 51 ming soʻm mablagʻ yoʻnaltirildi.

Rekonstruksiya ishlari natijasida tarbiyalanuvchilar uchun zamonaviy va shinam muhit yaratildi. Bu yerda bolalarning taʼlim-tarbiya olishi, boʻsh vaqtini mazmunli oʻtkazishi va har tomonlama rivojlanishi uchun zarur imkoniyatlar mavjud.

Ayni paytda filialda 3 ta guruh — 2 ta tayyorlov va 1 ta kichik guruh faoliyat yuritmoqda. Bolalarga taʼlim-tarbiya berish jarayoniga 14 nafar malakali tarbiyachi va mutaxassis jalb etilgan.

Yangi filialning ishga tushirilishi “Tezguzar” mahallasida maktabgacha yoshdagi bolalarni taʼlim bilan qamrab olish imkoniyatlarini kengaytirdi. Shuningdek, ota-onalar uchun qoʻshimcha qulayliklar yaratilib, bolalarning maktab taʼlimiga sifatli tayyorgarlik koʻrishi uchun yanada yaxshi sharoit paydo boʻldi.

Tadbirda taʼkidlanganidek, maktabgacha taʼlim tashkilotlarining moddiy-texnik bazasini mustahkamlash, zamonaviy sharoitlar yaratish va taʼlim sifatini oshirish yosh avlodning intellektual, jismoniy va maʼnaviy kamolotiga xizmat qiladi.

Viloyat hokimligi matbuot xizmati