Buxoro viloyati hokimligi

Oʻzbekiston Respublikasi Prezidentining joriy yil 13-avgustda qabul qilingan “Tadbirkorlar kuni munosabati bilan soha vakillaridan bir guruhini mukofotlash toʻgʻrisida”gi Farmoni hamda “Faol tadbirkor” koʻkrak nishoni bilan taqdirlash toʻgʻrisida”gi farmoyishiga asosan  Yangi Oʻzbekistonda tadbirkorlikni har tomonlama rivojlantirish, ishbilarmonlik muhitini yaxshilash borasida yaratilgan imkoniyatlardan unumli foydalanib, mamlakatimiz taraqqiyoti va eksport salohiyatini yuksaltirish, milliy iqtisodiyotimizning barqaror oʻsishini taʼminlash boʻyicha salmoqli natijalarga erishib kelayotgani, oʻzining tashabbuskorligi, bilim va tajribasini namoyon etib, investitsiyalarni jalb qilish, import oʻrnini bosadigan mahsulotlar ishlab chiqarish, zamonaviy xizmatlar koʻlamini yanada kengaytirish, yangi ish oʻrinlari va daromad manbalarini yaratish orqali aholi farovonligini oshirish yoʻlida alohida jonbozlik koʻrsatayotgani, shuningdek, ijtimoiy hayotdagi faol ishtiroki uchun fidoyi ishbilarmonlar davlatimizning yuksak orden, medal va nishonlariga munosib koʻrildi.

Quvonarlisi shundaki, ushbu sharafli eʼtirofga sazovor boʻlgan baxtli insonlari safida viloyatimizning 10 nafar nafar vakillari, jumladan, 4 nafar davlat mukofoti hamda 6 nafar koʻkrak nishoni sohiblari ham bor.

Viloyat hokimligida boʻlib oʻtgan bayram tadbirida Buxoro viloyatidan davlat mukofotlariga munosib koʻrilgan 3 nafar hamyurtimizga orden va medallar, 5 nafar ishbilarmonga “Faol tadbirkor” koʻkrak nishoni tantanali tarzda topshirildi. 

Tadbirda qatnashgan Buxoro viloyat hokimi, Oliy Majlis Senati aʼzosi Botir Zaripov soha jonkuyarlarini yaqinlashib kelayotgan Vatanimiz mustaqilligining 35 yilligi va “20-avgust – Tadbirkorlar kuni” bilan tabriklab, viloyatimiz ijtimoiy-iqtisodiy hayotida xususiy tadbirkorlikning oʻrni va ahamiyati beqiyos ekanligini taʼkidladi.

Eʼtirof etilganidek, keyingi oʻn yillikda viloyatimiz makroiqtisodiy koʻrsatkichlarida tub burilish yasalib, barqaror oʻsish surʼatlari taʼminlandi.

Joriy yilning 1-iyul holatiga koʻra, viloyatimizda 26 ming 905 ta kichik biznes korxonalari faoliyat koʻrsatayotgan boʻlib, ularning viloyatimiz yalpi hududiy mahsulotidagi ulushi 70,6 foizni tashkil etmoqda. Qolaversa yaratilgan imkoniyatlardan unumli foydalangan 3900 nafarga yaqin tadbirkorlarimiz oʻrta va yirik biznesda ham muvaffaqiyatli faoliyat yuritishmoqda. 

Oʻtgan yillarga nazar tashlaydigan boʻlsak, tadbirkorlarimizning faoliyat yoʻnalishlari, ishlab chiqarayotgan mahsulot turlari ham kengayib borayotganligini kuzatishimiz mumkin. Xususan, mustaqilligimizning dastlabki yillarida aksariyat tadbirkorlarimiz faqatgina savdo-sotiq bilan shugʻullangan boʻlishsa, bugungi kunda ishlab chiqarishning toʻqimachilik, qurilish ashyolari, goʻsht, sut, mevani qayta ishlash, xizmat koʻrsatishda turizm, aloqa, qurilish, oshxona, tibbiyot, taʼlim servisi kabi 90 dan ortiq turlar faol yoʻlga qoʻyildi. Albatta, bu 100 minglab yaratilgan yangi ish oʻrni, shuncha oila hayotiga olib kirilgan farovonlikdir.

— Eng quvonarlisi, bir paytlar soliq va boshqa imtiyozlar evaziga oʻz faoliyatini boshlagan tadbirkorlarimiz endilikda ehtiyojmand aholi qatlamlarini qoʻllab-quvvatlash, muhim ijtimoiy obyektlarni barpo etish va boshqa dolzarb yoʻnalishlarda saxovatpesha yordamlarini ham koʻrsatishmoqda. Fursatdan foydalanib, hurmatli Prezidentimiz tomonlaridan olib borilayotgan xalqchil islohotlarga oʻz daxldorlik pozitsiyasini koʻrsatib, saxovatpesha yordamlarini ayamayotgan tadbirkorlarimizga oʻz minnatdorligimizni bildiraman, - dedi Botir Zaripov.

Marosimda soʻzga chiqqan tadbirkorlar koʻrsatilgan eʼtibor, gʻamxoʻrlik va ragʻbat uchun minnatdorliklarini bildirishdi.

Viloyat hokimligi matbuot xizmati