Olot: “Eski Olot” mahallasida yana 8 nafar xotin-qizning bandligi taʼminlandi
2026-08-07 16:50:00 / Yangiliklar
Ayni paytda mahallada 3 800 nafar aholi istiqomat qiladi. Ularning salmoqli qismini xotin-qizlar tashkil etgani bois, ularning bandligini taʼminlash va iqtisodiy faolligini oshirish ustuvor vazifalardan biri hisoblanadi.
Hududda tashabbuskor tadbirkor Nigora Navroʻzova rahbarligidagi “Dilbar momo liboslari” MCHJ samarali faoliyat yuritmoqda. Korxonada oʻnga yaqin chevar mehnat qilib, atlas, adras va shoyi kabi milliy matolardan zamonaviy hamda milliy uslubdagi liboslar tayyorlanmoqda. Buyurtmalar sonining ortib borayotgani milliy liboslarga boʻlgan talab tobora yuksalayotganini koʻrsatmoqda.
Shuningdek, mahalladagi “Zahro kelajak yulduzi” MCHJda yana 8 nafar xotin-qiz doimiy ish bilan taʼminlandi. Korxonada zamonaviy tikuvchilik yoʻlga qoʻyilgan boʻlib, erkaklar va ayollar uchun futbolkalar hamda turli xil ayollar kiyimlari ishlab chiqarilmoqda.
Ayni kunda korxonada kuniga 400 tadan ortiq tayyor mahsulot ishlab chiqarilib, ular ichki bozorga, jumladan, vodiy viloyatlaridagi savdo tarmoqlariga yetkazib berilmoqda.
Korxonada faoliyat yuritayotgan chevarlar mehnatiga yarasha oʻrtacha 3–4 million soʻm miqdorida oylik daromad olmoqda. Bu esa xotin-qizlarning iqtisodiy mustaqilligini mustahkamlash, oilalar farovonligini oshirish va barqaror bandlikni taʼminlashga xizmat qilmoqda.
Mahallada xotin-qizlarni kasb-hunarga oʻqitish, tadbirkorlik tashabbuslarini qoʻllab-quvvatlash va yangi ish oʻrinlari yaratishga qaratilgan loyihalarni kengaytirish boʻyicha ishlar izchil davom ettirilmoqda.
Viloyat hokimligi matbuot xizmati