Buxoro viloyati hokimligi

Mukarram Azimova hamda Zulfiqor Hayotov oilasi 20 yildan oshibdiki, tomorqachilik bilan shug‘ullanib, ro‘zg‘or ehtiyoji uchun mo‘l hosil yetishtirish barobarida issiqxona xo‘jaligini yuritib, unda 20 turdan ortiq anvoyi gullar yetishtirish bilan ham shug‘ullanib kelishadi.

Xonadon bekasining gulchilikka bo‘lgan qiziqishi shunchaki xobbi, qiziqish bo‘lib qolmay, tadbirkorlik faoliyatiga aylangan desak, mubolag‘a emas. Ko‘p yil oldin oddiy havas, qiziqishdan boshlangan ish nafis kasb-korga, gulchilikka aylandi. “Mehr bilan gul parvarishlash nafaqat moddiy manfaat, balki ruhiy osoyishtalik, hayotga, yashashga bo‘lgan oshuftalikni ham oshiradi.

O‘stirilayotgan har bir gul—tabiatga va mehnatga bo‘lgan cheksiz mehrning yorqin ifodasidir”, deydi xonadon sohibasi.   

Hozirda bu mo‘jaz issiqxonada parvarishlanayotgan turfa gullar orasida kishi ko‘ngli va ruhiga xush yoquvchi, yashillik va nafosat timsoli bo‘lmish geran, pelargoniya, fikus, spatifillum (“Ayollar baxti"), sanseveriya, zamiokulkas, xlorofitum, shifobaxsh va bezak gullardan aloe Vera, kalanxoe, begoniya, senpoliya, binafsha, orxideya, anturium hamda inter’er ko‘rki hisoblanmish dratsena, monstera, potos, yepipremnum, tradeskansiya, peperomiya, kaktus va sukkulentlar, aglaonema kabi ko‘plab turdagi navlarni ko‘rish mumkin. Mahalliy iqlim sharoitida baravj o‘sib gullayotgan bu nafis o‘simliklarga ko‘chadosh, mahalladoshlar ham havas bilan qarashadi. Bu anvoyi gullardan o‘zlari uylarida o‘stirib, bahra olayotgan xonadon bekalari ham oz emas.  

Shunday orombaxsh go‘zallikka oshufta ravishda oila sohibi Zulfiqor Hayotov ko‘p yildirki, ota-bobosidan o‘rgangan hunari—tandirsozlik bilan ham shug‘ullanadi. Dasturxonda nonning o‘rni qay darajada bo‘lsa, qishloqda tandirga shu darajada talab bor. Ayni yoz jaziramasida astoydil mehnat qilgan oila a’zolari tandirsozlikni ham “jonlantirib” mo‘may daromadga ega bo‘lishmoqda. Ayni kunda ham hovlida o‘ndan oshiq tandir taxt qilib qo‘yilgan. Ular orasida buyurtmaga tayyorlangani, loyiga nafaqat somon, balki echki, tuya juni qo‘shib tayyorlanayotgan tandirlar bor. 

Ibratli jihati, bir xonadonning tomorqachilik, gulchilik va tandirsozlikdan erishayotgan bir yillik daromadi 100 million so‘mdan kam emas. Halol peshona teridan qo‘lga kiritilayotgan muvaffaqiyat ularning moddiy ta’minotini yaxshilabgina qolmasdan, kundalik mehnati orqali oilasiga mehnat zavqini, rohat va ruhiy tetiklikni olib kirmoqda. 

Viloyat hokimligi matbuot xizmati