Buxoro viloyati hokimligi

Shuningdek, 2021-yil 31-maydagi “Ijro.gov.Uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida”gi PQ-5132-sonli qarori hamda 2025-yil 25-iyuldagi “Davlat organlari va tashkilotlarda ijro intizomini yanada mustahkamlashning qoʻshimcha chora-tadbirlari toʻgʻrisida”gi  PF-117-sonli farmonida belgilangan topshiriqlar asosida Buxoro viloyati hokimligida “Ijro.gov.Uz” ijro intizomi idoralararo elektron tizimi orqali Oʻzbekiston Respublikasi Prezidentining Farmon, qaror, farmoyish va topshiriqlari hamda majlis bayonlarida berilgan topshiriqlari ijroga qaratilib, sifatli bajarilishi qatʼiy nazoratga olingan.
 

Haftaning dushanba kunlari viloyat hokimi rahbarligida, haftaning chorshanba va juma kunlari hokimning birinchi oʻrinbosari huzurida ijro intizomi holati tanqidiy muhokama qilib kelinmoqda. Oʻzbekiston Respublikasi Prezidenti, Prezident Administratsiyasi hamda Vazirlar Mahkamasining hujjatlari va topshiriqlari ijrosi kunbay, soatbay qatʼiy nazoratga olingan. 
 

“Ijro.gov.Uz” ijro intizomi idoralararo elektron tizimiga kiritilgan qonunchilik hujjatlari va topshiriqlari Adliya vazirligi, Vazirlar Mahkamasi hamda Hisob palatasi tomonidan ekspertizadan oʻtkazilganidan soʻng nazoratdan yechilishi belgilangan. Shu bois, viloyat hokimligi apparatida ushbu topshiriqlar belgilangan muddatlarda va puxta bajaralishini taʼminlash maqsadida oldindan ogohlantirish tizimi yoʻlga qoʻyilgan. Yaʼni, har hafta 2 marotaba kelgusi oyning yakuniga qadar ijro muddati keladigan topshiriqlar roʻyxati eslatma sifatida hokim oʻrinbosarlari, maslahatchilari, boʻlinma rahbarlariga hamda tuman va shahar hokimliklariga yetkazilmoqda.
 

Viloyat hokimligi apparati masʼul xodimlari tomonidan har oyda bitta tuman va shaharda hamda viloyat boshqarma, korxona va tashkilotlarida qonunchilik hujjatlari va topshiriqlari ijrosi maqsadli oʻrganilmoqda. Jumladan, joriy yilning fevral oyida Jondor tumani hokimligida, mart oyida Buxoro avtomobil yoʻllari hududiy boshqarmasida, aprel oyida Qorakoʻl tumani hokimligida, may oyida viloyat Ekologiya, atrof-muhitni muhofaza qilish va iqlim oʻzgarishi boshqarmasida, iyun oyida Peshku tumani hokimligida qonunchilik hujjatlari va topshiriqlari ijrosi holati oʻrganilib, topshiriqlar ijrosini tashkil etishda amaliy yordam koʻrsatildi.  
 

2026-yilning yanvar-iyul oylari davomida viloyat hokimligi apparatida ijro intizomining holati 59 marotaba muhokama qilingan. 2023-yil 21-noyabr kuni Prezidentimiz rahbarligida kengaytirilgan tarzda oʻtkazilgan videoselektor yigʻilishida ijro intizomini mustahkamlash boʻyicha berilgan topshiriqlardan kelib chiqib, har bir topshiriqqa “temir intizom” bilan jiddiy yondoshish talabi qoʻyildi. Oʻzbekiston Respublikasi Prezidenti va hukumatning topshiriqlarini oʻz vaqtida, samarali hamda toʻliq bajarishda viloyat hokimining oʻrinbosarlari, viloyat korxona tashkilotlar rahbarlari, tuman va shaharlar hokimlarining roli hamda shaxsiy javobgarligini oshirish choralari koʻrilmoqda. 
 

“Ijro.gov.Uz” ijro intizomi idoralararo yagona elektron tizimida 2026-yil yanvar-iyul oylari davomida viloyatga daxldor 2 941 ta topshiriq kelib tushgan boʻlib, ushbu topshiriqlarning 1 682 tasida viloyat hokimligi asosiy ijrochi hamda 1 259 tasida hamijrochi sifatida belgilangan.
 

Ushbu topshiriqlarning 2 930 tasi (99.6 foizi )ning ijrosi taʼminlanib nazoratdan yechilgan. Qolgan 11 ta topshiriqda viloyat hokimligi hamijrochi sifatida belgilangan boʻlib, ayni kunda bu topshiriqlarning ijrosini taʼminlash choralari koʻrilmoqda. 
 

Shuningdek, ijro intizomi idoralararo yagona elektron tizimining Prezident Administratsiyasi modulidagi viloyat hokimligiga daxldor 309 ta va Vazirlar Mahkamasi topshiriqlari modulida 862 ta topshiriq kelib tushgan boʻlib, barchasining ijrosi taʼminlandi. 

Joriy yilning avgust oyidagi topshiriqlarning ijrosini taʼminlash boʻyicha kunbay kalendar grafik ishlab chiqilgan. Har bir hokim oʻrinbosari kesimida “Yoʻl xarita”lari ishlab chiqilib, tasdiqlangan hamda ijroga qaratilgan. Avgust oyida Oʻzbekiston Respublikasi Prezidentining 215 ta topshiriqlaridan 82 tasining ijrosi kechiktirmasdan taʼminlandi. Hozirda  muddati kechiktirilayotgan topshiriqlar ijrosini belgilangan muddatda va sifatli taʼminlash boʻyicha barcha zarur  chora-tadbir koʻrilmoqda.