Buxoro viloyati hokimligi

Kogon tumanining “Oʻba-choʻli” mahallasida faoliyat yuritayotgan “Oygul Grand Chevar” xususiy korxonasi ham ana shunday samarali tashabbuslardan biri hisoblanadi.

Korxona rahbari Oygul Choriyeva koʻp yillar davomida yakka tartibda tikuvchilik bilan shugʻullanib kelgan. U oʻz tajribasi va mehnati orqali tikuvchilikni nafaqat shaxsiy daromad manbai, balki boshqa insonlar uchun ham ish oʻrni yaratadigan faoliyatga aylantirishni maqsad qilgan.

2023-yilda “Ayollar daftari” dasturi doirasida ajratilgan imtiyozli kredit asosida mahalladagi boʻsh turgan bino ijaraga olinib, ikkita tikuv mashinasi bilan kichik tikuv sexiga asos solindi. Dastlab toʻrt nafar xotin-qiz ish bilan taʼminlangan boʻlsa, qisqa vaqt ichida korxona faoliyati kengayib, ish oʻrinlari soni ortib bordi.

Ayni paytda korxonada 20 nafar xotin-qiz doimiy ish bilan taʼminlangan. Ularning aksariyati avval ishsiz boʻlgan va “Ayollar daftari” roʻyxatida turgan fuqarolardir. Shuningdek, korxonada yoshlarni kasbga oʻrgatish, ularga tikuvchilik sirlarini oʻrgatishga ham alohida eʼtibor qaratilmoqda. Hozirda besh nafar qiz tajribali ustalardan hunar oʻrganmoqda.

Korxonada ishlab chiqarilayotgan mahsulotlar sifati qisqa vaqt ichida xaridorlar ishonchini qozondi. Bu yerda sochiqlar, oshxona yopinchiqlari, kiyim-kechak, dastroʻmol va boshqa tayyor toʻqimachilik mahsulotlari ishlab chiqarilmoqda. Mahsulotlar ichki bozor bilan bir qatorda xorijiy bozorlarga ham yetkazib berilmoqda. Jumladan, Rossiya Federatsiyasidagi hamkorlar buyurtmasi asosida 80 ming dona dastroʻmol yetkazib berilgani korxonaning ishlab chiqarish salohiyati va mahsulotlarga boʻlgan talab ortib borayotganini koʻrsatadi.

Korxona faoliyati mahalladagi xotin-qizlarning bandligini taʼminlash va ularning daromadini oshirishda muhim ahamiyat kasb etmoqda. Ishchilar oʻz yashash hududidan uzoqlashmagan holda mehnat qilib, oyiga oʻrtacha 2–3 million soʻm daromad olmoqda. Korxonaning oylik sof foydasi esa 15 million soʻmdan ortiqni tashkil etmoqda.

Oygul Choriyevaning mehnati, izlanishi va tadbirkorlik tashabbusi bugun koʻplab ayollar uchun ibrat namunasi boʻlib xizmat qilmoqda. Kichik tikuv sexidan boshlangan faoliyatning qisqa muddatda eksport salohiyatiga ega korxonaga aylanishi yaratilgan imkoniyatlardan samarali foydalanish, fidokorona mehnat va qatʼiyatning yorqin namunasidir.

Eng muhimi, “Oygul Grand Chevar” korxonasi oʻnlab oilalar uchun barqaror daromad manbaiga aylanib, mahallada xotin-qizlar bandligini taʼminlash va ularning tadbirkorlik salohiyatini roʻyobga chiqarishga munosib hissa qoʻshmoqda.

Viloyat hokimligi matbuot xizmati