Mevasi — mo‘l, mehnati — halol: jondorlik Umida Ergashevaning muvaffaqiyat hikoyasi
2026-08-03 14:30:00 / Yangiliklar
Atigi 4 sotix yer. Kim uchundir oddiy tomorqa bo‘lishi mumkin bo‘lgan bu maydon Umida va uning oilasi uchun baraka, daromad hamda kelajakka ishonch manbaiga aylangan.
— Dastlab biroz ikkilanganmiz, — deydi Umida tabassum bilan. — Yosh bo‘lganim uchun issiqxona yumushlarini uddalay olamanmi, degan xavotir bor edi. Ammo turmush o‘rtog‘im va oila a’zolarimning “Biz birgamiz, albatta uddalaymiz!” degan daldasi menga kuch bag‘ishladi.
Oilaning ahilligi va tinimsiz mehnati tez orada o‘z samarasini berdi. Issiqxonaning 2 sotix maydonida yetishtirilgan pomidor mo‘l hosil berdi va bozorga chiqarilgan mahsulot qisqa fursatda xaridorini topdi.
Bugungi kunda issiqxonaning qolgan qismida bulg‘or qalampiri parvarish qilinmoqda. Shoxlarida shig‘il bo‘lib pishayotgan hosil bosqichma-bosqich yig‘ib olinmoqda. Issiqxonaning yana bir burchagida esa kelajak rejalari timsoli bo‘lgan sitrus daraxtlari parvarishlanmoqda.
Mavsum yakunlari sarhisob qilinganda, pomidor va bulg‘or qalampiridan olingan daromaddan urug‘, o‘g‘it, parvarish hamda boshqa xarajatlar chegirib tashlangach, oila bir mavsumning o‘zida 30 million so‘mdan ortiq sof foyda ko‘rdi.
— Halol mehnatning rohatini his qilishning o‘zi katta baxt, — deydi Umida. — Peshona teri bilan topilgan daromad insonni yanada ko‘proq mehnat qilishga undaydi. Yurtimizda yoshlarga yaratilayotgan imkoniyatlardan foydalanib, tomorqamizni daromad manbaiga aylantirganimiz uchun shukr qilamiz.
Bugun Umida Ergasheva nafaqat hosil yetishtirmoqda, balki oilasining farovon kelajagini bunyod etmoqda. Bulg‘or qalampiri hosili yakunlangach, bo‘shagan maydon navbatdagi mavsum uchun tayyorlanadi.
Umidaning hayot yo‘li yana bir haqiqatni tasdiqlaydi: katta muvaffaqiyat uchun albatta katta yer maydoni kerak emas. Mehnatsevarlik, qat’iyat va oilaviy hamjihatlik bo‘lsa, atigi 4 sotix yer ham baraka va farovonlik manbaiga aylanishi mumkin. Bu esa bugungi yoshlar uchun halol mehnat va intilish orqali muvaffaqiyat sari odimlashning yorqin namunasidir.
Viloyat hokimligi matbuot xizmati