“Samarali marketing strategiyasini amalga oshirish: Yaponiyaning amaliy tajribasi”
2026-08-01 15:10:00 / Yangiliklar
Qarorga muvofiq, “Oʻzbekiston—Yaponiya markazi” loyihasining VI bosqichi Yaponiya Hukumatining dastlabki baholashi asosida ajratiladigan 2,9 million AQSH dollari miqdoridagi texnik koʻmak mablagʻlari hisobiga amalga oshiriladi.
Hujjat bilan “Oʻzbekiston—Yaponiya markazi” faoliyatini yanada rivojlantirish boʻyicha amaliy chora-tadbirlar rejasi (“Yoʻl xaritasi”) tasdiqlandi. Shuningdek, 2026–2027-yillarga moʻljallangan faoliyat rejasi JICA va Yaponiya fondi (JF) ishtirokida ishlab chiqildi.
Rejaga muvofiq, markaz faoliyatini keng ommaga tanitish, davlat organlari va tashkilotlarida korporativ seminarlar hamda oʻquv mashgʻulotlarini tashkil etish, Coursera, edX va Udemy kabi yetakchi xalqaro onlayn taʼlim platformalari orqali oʻquv kurslarini yoʻlga qoʻyish, Buxoro shahridagi filialni modernizatsiya qilish, uning samaradorligini oshirish va yangi yoʻnalishlarni tashkil etish nazarda tutilgan. Shuningdek, 2026-yil davomida Toshkent, Samarqand va Buxoro shaharlarida Yaponiya taʼlim koʻrgazmalarini oʻtkazish ham rejalashtirilgan.
Shu munosabat bilan bugun viloyat hokimligi majlislar zalida “Samarali marketing strategiyasini amalga oshirish: Yaponiyaning amaliy tajribasi” mavzusida amaliy seminar boʻlib oʻtdi.
Seminarda viloyat, shahar va tuman hokimliklarining masʼul xodimlari ishtirok etdi. Tadbirni viloyat hokimligi boshqaruv apparati tashkiliy-kadrlar guruhi rahbari Izzatillo Mahmudov ochib berdi.
Seminar davomida JICA masʼul xodimlari Mazakazu Xirakava va Kiminyo Myong samarali marketing strategiyasining asosiy tamoyillari, brend marketingi, dizayn, maʼlumotlar tahlili, isteʼmol bozori, simulyatsiya usullari, yagona milliy stendlarni shakllantirish, taqdimotlar va marketing tadbirlarini hamkorlikda tashkil etish masalalari yuzasidan batafsil taqdimot oʻtkazdilar.
Yaponiyalik ekspertlar ikki mamlakat oʻrtasidagi savdo-iqtisodiy va gumanitar hamkorlikni yanada mustahkamlash, mahalliy mahsulotlarni xalqaro bozorlarga olib chiqish imkoniyatlarini kengaytirish, konsalting xizmatlari orqali xalqaro standartlar va bozor tendensiyalarini oʻrganish, shuningdek, zamonaviy marketing strategiyalarini samarali qoʻllash boʻyicha oʻz tajriba va tavsiyalari bilan oʻrtoqlashdilar.
Seminar yakunida ishtirokchilar oʻzlarini qiziqtirgan savollarga mutaxassislardan atroflicha javob oldilar.
Viloyat hokimligi matbuot xizmati