Buxoro viloyati hokimligi

O‘zbekiston mahallalari uyushmasi raisi Qahramon Quronboev boshchiligida, Prezidentimiz tomonidan belgilangan ustuvor vazifalar ijrosini viloyatda to‘la-to‘kis ta’minlash hamda yoshlar bilan ishlashning mutlaqo yangi tizimini samarali joriy etish maqsadida tuzilgan Respublika ishchi guruhi bugun Buxoro davlat universitetida yoshlar bilan ochiq muloqotda bo‘ldi. 
 

O‘zbekiston Respublikasi Kambag‘allikni qisqartirish va bandlik vazirligi Buxoro viloyat boshqarmasi, Buxoro viloyat hokimligi, Yoshlar ishlari agentligi Buxoro viloyat boshqarmasi hamkorligida tashkil qilingan tadbirda viloyatimizdagi oliy ta’lim muassasalari talaba yoshlari, ular ota-onalari, pedagogik jamoa, hududdagi davlat tashkilot, idora va muassasalari mas’ul mutasaddilari ishtirok etdilar. 
 

Uchrashuvda so‘zga chiqqan O‘zbekiston mahallalari uyushmasi raisi Qahramon Quronboev, Buxoro viloyati hokimi Botir Zaripovlar  mamlakatimizda yoshlarga oid davlat siyosati doirasida amalga oshirilayotgan islohotlar, davlat hokimiyati boshqaruv hamda huquqni muhofaza qilish idoralari zimmasiga yuklatilgan vazifalar, viloyatdagi 516 ta mahallada yoshlar bilan ishlash masalalarini muvofiqlashtirish, oliy ta’lim dargohlari yosh mutaxassislari bilan birga, joriy yilda 22 ming nafar atrofidagi o‘rta maxsus kasb-hunar ta’limi bitiruvchilari bandligini ta’minlash, shuningdek, yoshlarni har tomonlama qo‘llab-quvvatlash borasida amalga oshirilayotgan ishlar xususida atroflicha so‘z yuritdilar.
 

Samimiy ruhda kechgan muloqot davomida viloyatimizdagi oliy ta’lim muasssalari talaba yoshlari, bitiruvchilari duch kelayotgan tashvish-muammolari bilan mutasaddilarga yuzlandilar. Xalq xo‘jaligi uchun tayyorlab chiqarilayotgan yosh mutaxassislarning murojaatlari, kelgusida tanlamoqchi bo‘lgan kasblari, jumladan, Buxoro davlat universiteti, uning huzuridagi pedagogika instituti, Buxoro davlat texnika universiteti, Buxoro davlat tibbiyot instituti bilan yaqin hamkorlikdagi tashkilot, birlashma, boshqarmalar, korxona va idoralar, chunonchi, xalq ta’limi, sog‘liqni saqlash muassasalarida mavjud vakant ish o‘rinlari, ularga bo‘lgan qiziqish, talab va takliflar o‘rganildi. Yoshlarga kasb-kor tanlashdagi muhim omillar haqida fikr-mulohazalar bildirilib, kelajakda yetuk mutaxassis bo‘lishlari uchun bilim va intilish eng katta kuch ekani ta’kidlandi.
 

Yig‘ilishda yoshlarga oid davlat siyosati doirasida amalga oshirilayotgan islohotlar, ro‘y berayotgan o‘zgarish va yangilanishlar haqida so‘z yuritilib, 50 taga yaqin murojaat, muammo va takliflar tinglandi. Unda tashabbuskor va faol yoshlar o‘zlarining kelajak rejalari, ularni qiynayotgan tashvish-muammolar haqida ochiq-oydin gapirdilar.
 

—Buxoro davlat universitetining xorijiy tillar filologiyasi fakultetini bakalavriat bosqichini tugalladim,—deydi G‘ijduvon tumani, Sarmijon mahallasida yashovchi Maftuna Ro‘zieva.—Ham ishlab, ham tahsilimni magistratura bosqichida davom ettirish niyatidaman. Ammo men amaliyot o‘tagan maktabda ixtisosligim bo‘yicha bo‘sh ish o‘rni mavjud emasligi muammo tug‘dirmoqda. Shu boisdan, muloqotda qatnashib, murojaatimni bayon etdim. Viloyat Xalq ta’limi boshqarmasidan shu masalada menga yaqindan yordam va’da qilishdi.  
 

Tadbirda uyushmagan yoshlar vakillaridan chunonchi, vobkentlik Og‘abek Qurbonov va romitanlik Abdulxay Abdulovlar motokultivator, Buxoro shahridan Jasmina Muzaffarova hamda Kogon shahridan Shuhrat Nabievlar noutbuk bilan taqdirlandilar.           

Uchrashuvda mamlakatimizda yoshlarga qaratilayotgan e’tibor, xususan, ta’lim tizimida yaratilayotgan imkoniyatlar, imtiyozlar, zamonaviy o‘quv muassasalari, xorijda ta’lim olish dasturlari hamda yoshlarni qo‘llab-quvvatlashga qaratilgan davlat dasturlari haqida ham atroflicha so‘z yuritildi.