Buxoro viloyati hokimligi

Bu borada Prezidentimiz tomonidan belgilab berilgan ustuvor vazifalar ijrosini ta’minlash maqsadida G‘ijduvon tumanining barcha, 70 ta mahalla fuqarolar yig‘ini va ulardagi qishloqlarda keng ko‘lamli obodonlashtirish, bunyodkorlik va sanitariya-tozalash ishlari jadal boshlangan. Bugun mahalla guzarlari, ko‘cha va xiyobonlar, xonadonlar, hovli-joylar atrofi, savdo shaxobchalari, ijtimoiy soha inshootlari, qabristonlar hamda xalqaro ahamiyatga ega “M-37” avtomobil yo‘li bo‘ylab hududlarni tartibli va orasta ko‘rinishga keltirish ishlari jadal sur’atda olib borilmoqda.

Har bir mahallada "Mahalla yettiligi", davlat va jamoat tashkilotlari, nuroniylar, yoshlar hamda keng jamoatchilik vakillari birlashib, yurt obodligi yo‘lida fidokorona mehnat qilinayotganini ko‘rish mumkin. Ko‘chalar va yo‘laklar tartibga keltirilmoqda, ariq-zovurlar tozalanmoqda, noqonuniy chiqindilar bartaraf etilmoqda, qabristonlar va jamoat maskanlari obod qiyofa kasb etmoqda.

Jumladan, shu kunlarda Abduxoliq G‘ijduvoniy, Buktaroy, Dilkusho, Taxtaxon, Labiro‘t, Sarmijon, G‘ovshun, Pomo‘za, Zarangari, Soktari, Xalqobod kabi mahallalarda obodonlashtirish ishlari jamoatchilik vakillari, faollar, oqsoqolllar, mehnat jamoalari, yoshlar ishtirokida uyushqoqlik bilan olib borilmoqda.   

Obodonlashtirish tadbirlari bilan bir qatorda profilaktik reydlar ham olib borilmoqda. Ichki ishlar organlari xodimlari tomonidan aholi maskanlarida xonadonlarning ichki va tashqi hududlarini ozoda saqlash, sanitariya qoidalariga rioya etish bo‘yicha tushuntirish va ogohlantirish ishlari olib borilmoqda. Berilgan ogohlantirishlarga qaramay, obodonlashtirish talablariga beparvo munosabatda bo‘lgan ayrim fuqarolarga nisbatan O‘zbekiston Respublikasi Ma’muriy javobgarlik to‘g‘risidagi kodeksining 161-moddasi asosida ma’muriy choralar qo‘llanilmoqda. 

Obod mahalla — farovon hayot poydevori, ozoda hudud esa yuksak madaniyat va fuqarolik mas’uliyatining yorqin ifodasidir. Eng aziz va eng ulug‘ bayram—mamlakatimiz mustaqilligining qutlug‘ 35 yilligini munosib kutib olish yo‘lida amalga oshirilayotgan bu xayrli tashabbus va ezgu ishlar Yangi O‘zbekiston bunyodkorlik siyosatining amaliy natijasidir. Zero, bugun mahalla va qishloqlarimiz obodligi, ko‘chamiz ozodaligi va xonadonimiz sarishtaligi yo‘lida barcha g‘ijduvonliklar ham mas’uliyatni o‘z zimmalariga olmoqdalar. 

Viloyat hokimligi matbuot xizmati