Vobkent: Mirvoshida qiymati 21 milliard so‘mlik qurilish-ta’mirlash ishlari qizg‘in pallada
2026-07-17 21:50:00 / Yangiliklar
Yurtimiz mustaqilligining qutlug‘ 35 yilligi arafasida Mirvoshi mahallasi ham tom ma’noda, ulkan bunyodkorlik maydoniga aylandi. Bir necha yil avval aholi uchun orzu bo‘lgan ko‘plab infratuzilma loyihalari bugun amalda o‘z ifodasini topmoqda. Mahallada olib borilayotgan keng ko‘lamli bunyodkorlik ishlari tufayli mirvoshiliklar bu yilgi hurriyat ayyomini ayniqsa o‘zgacha ruh va katta umidlar bilan kutib olishmoqda.
Bu ezgu o‘zgarishlarning huquqiy asosi O‘zbekiston Respublikasi Prezidentining 2021-yil 18-sentabrdagi PQ–5246-sonli “Islom taraqqiyot banki va OPEK xalqaro taraqqiyot jamg‘armasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari to‘g‘risida”gi qarori dasturilamal vazifasini o‘tamoqda.
Mazkur qaror asosida amalga oshirilayotgan “Qishloq joylarni barqaror rivojlantirish” loyihasi doirasida Mirvoshi mahallasida umumiy qiymati 21 milliard 216 million so‘mlik yirik qurilish-ta’mirlash ishlari jadal sur’atlarda olib borilmoqda.
Bu qatorda ichimlik suvi ta’minotini yaxshilash maqsadida qiymati 9 milliard 544 million so‘m mablag‘ evaziga “G‘ijduvon Zarangari qurilish” MChJ tomonidan 4 ming metr ichimlik suvi tarmog‘i tortilmoqda.
Elektr ta’minotini yaxshilash uchun 1 milliard 542 million so‘m mablag‘ hisobidan “Shohruhbek Halimbek qurilish” MChJ tomonidan 2 ta transformator punkti o‘rnatilib, 9,2 ming metr masofada elektr uzatish tarmog‘i barpo etilmoqda.
Xuddi shunday, ichki yo‘llarni ta’mirlash maqsadida 4 milliard 335 million so‘m mablag‘ ajratilib, mahalladagi ichki yo‘lning 7,5 ming metr qismiga asfalt qoplamasi bostirilmoqda.
Muhandislik-kommunikasiya tarmoqlari bilan birga, hududdagi ijtimoiy soha inshootlari, jumladan, 35-sonli umumta’lim maktabi binosini mukammal ta’mirlash maqsadida 3 milliard 878 million so‘m mablag‘ yo‘naltirilgan. Bu manzilda so‘nggi ikki oyda pudratchi “Fast quality building” MChJ tomonidan keng ko‘lamdagi qurilish-ta’mirlash ishlari amalga oshirilgan.
Keyingi yangilanish manzili Mirvoshidagi oilaviy shifokorlik punkti bo‘lib, uni moddiy-texnik yangilanishida 1 milliard 917 million so‘m mablag‘ sarflangan. Bunda pudratchi sub’ekt “Shavkat Shokir savdo” MChJ ishchi-mutaxassislarir jonbozlik ko‘rsatmoqdalar.
Xulosa shuki, bugun chekka mahallada bunyodkorlikning har bir qadami, yangilanayotgan infratuzilma va ma’muriy inshootlar, ravon yo‘l, sifatli ichimlik suvi tarmog‘i, barqaror elektr ta’minoti, ta’lim va tibbiyot muassasalaridagi o‘zgarishlar yurt obodligi, turmush farovonligining amaliy namunasi desak, mubolag‘a emas.
Viloyat hokimligi matbuot xizmati