Buxoro viloyati hokimligi

Cho‘l bag‘rida faoliyat boshlaganiga 30 yildan oshgan Qorovulbozor davlat o‘rmon-ovchilik xo‘jaligi tomonidan hozirda 3 ming gektardan oshiq yer maydonida ellikka yaqin ishchi-mutaxassis mehnati va jonbozligi bilan turli-tuman manzarali daraxt va buta ko‘chatlari ko‘paytirilmoqda. 
 

Xo‘jalikda har yili 2 million tupdan ortiq ko‘chat tayyorlanayotgan bo‘lib,  viloyatimiz bo‘ylab buyurtmachi xo‘jaliklariga peshma-pesh yetkazib berilmoqda. Ayniqsa, qayrag‘och, sadaqayrag‘och, kulyon, sasna, katalpa, mejavelnik, tut va yasin ko‘chatlariga talab yuqori bo‘lmoqda. 
 

Qolaversa, davlat o‘rmon-ovchilik xo‘jaligida ko‘chatchilik bilan birga keyingi yillarda chorvachilik, parrandachilik va asalarichilik tarmoqlari ham rivojlantirilmoqda. 
 

Ekohudud va ovchilikni rivojlantirish departamenti davlat muassasasiga qarashli Qorovulbozor davlat o‘rmon-ovchilik xo‘jaligining 3 ming gektar hududida yovvoyi hayvonlarning yashash sharoitini yaxshilash va ularni suv bilan uzluksiz ta’minlash bo‘yicha zarur choralar ko‘rilmoqda. Xususan, hududda maxsus suv idishlari o‘rnatilib, yovvoyi hayvonlar muntazam foydalanadigan suv manbalari qayta suv bilan ta’minlanmoqda. Bu esa jazirama kunlarda hayvonlarning chanqovini qondirish, ular yaxlitligini saqlash, tabiiy yashash muhitini qo‘llab-quvvatlashga xizmat qilmoqda.
 

Mutaxassislarning ta’kidlashicha, bunday biotexnik tadbirlar yozning keskin issiq davrida yovvoyi fauna vakillarini muhofaza qilish, biologik xilma-xillikni asrash hamda tabiatdagi ekologik muvozanatni saqlashda muhim ahamiyat kasb etadi.
 

Tabiatni asrash—har birimizning burchimiz. Zero, yovvoyi hayvonot dunyosini muhofaza qilish kelajak avlod uchun sog‘lom va barqaror ekologik muhitni saqlashning muhim shartidir.