Shuningdek, Prezidentimizning joriy yil 23-iyul kuni qabul qilingan “Zargarlik buyumlarini ishlab chiqarish sohasini yanada rivojlantirish va uning raqobatbardoshligini ta’minlash chora-tadbirlari to‘g‘risida”gi Farmoniga asosan 2024-2026 yillarda “O‘zmilliybank” AJ ishtirokida Buxoro va Namangan viloyatlarida bittadan hamda Toshkent shahrida ikkita zargarlik markazlarini tashkil etish belgilangan.  

Shunga ko‘ra, rivojlangan, eksportyor zargarlik sanoati korxonalarini Buxoroga jalb etish, investitsion loyihalarni amalga oshirish hamda mahalliy ishlab chiqaruvchilar bilan samarador tajriba almashishni joriy etish bo‘yicha amaliy sa’y-harakatlarga kirishildi. Bu borada Turkiya kompaniyalari bilan faol muloqot olib borilmoqda. 

Xususan, bugun, 22-avgust kuni viloyat hokimi Botir Zaripovning Turkiyaning yetakchi zargarlik ishlab chiqaruvchilaridan biri hisoblangan “Pala Golden” sanoat korxonasi rahbari Ufuk Pala va “O‘zbekzargarsanoati" uyushmasi raisi Shoxrux To‘ychiboyev, shuningdek, tegishli hokim o‘rinbosarlari, boshqarmalar va tijorat banki rahbarlari ishtirokida kechgan uchrashuvda ham ayni shu masalalar muhokamalar markazida bo‘ldi. 

Ufuk Pala o‘zining Buxoroda amalga oshirish istagidagi loyihasi mazmun-mohiyati haqida batafsil to‘xtaldi. Zargarlik markazini tashkil etish uchun ajratilayotgan  binoning aholi va turistik oqim yuqori bo‘lgan hududda joylashganligini e’tirof etdi va bu boradagi ishlarni jadallashtirish taklifini bildirdi.

O‘z navbatida viloyat rahbari Ufuk Palaga loyihaga xayrixohligi uchun minnatdorlik bildirib, zargarlik markazi tashkil etish bilan bog‘liq barcha tashabbuslarni qo‘llab-quvvatlashga tayyorligini alohida ta’kidladi.

Muloqot davomida bu borada istiqbolda amalda oshiriladigan ishlar yuzasidan kelishib olindi. 

Viloyat hokimligi matbuot xizmati