Buxoro tumani: “Quyi Kobdun” qishlog‘ida zamonaviy bolalar bog‘chasi foydalanishga topshirildi
2026-07-10 17:50:00 / Yangiliklar
Kuni kecha “Istiqbol” mahalla fuqarolar yig‘ini Quyi Kobdun qishlog‘ida qurib bitkazilgan 15-sonli davlat maktabgacha ta’lim tashkiloti foydalanishga topshirildi. Tadbirda tuman hokimligi, xalq deputatlari tuman Kengashi vakillari, mehnat faxriylari, mahalla faollari va ota-onalar ishtirok etdilar.
Ayni paytda 120 nafar tarbiyalanuvchiga mo‘ljallangan mazkur maktabgacha ta’lim tashkiloti qiymati 4 milliard 200 million so‘m mablag‘ evaziga bunyod etildi. Zamonaviy andozadagi muassasa qurilishida pudratchi “Fast quality building” MChJ ishchi-mutaxassislari alohida jonbozlik ko‘rsatdilar.
Muassasada bolalarning har tomonlama barkamol voyaga yetishi uchun barcha zarur sharoit yaratilgan. Xususan, 4 ta zamonaviy guruh xonasi, musiqa va sport zali, oshxona, yotoqxona, tibbiyot xonasi, bolalar uchun shinam, zamonaviy o‘yin maydonchalari did bilan barpo qilinib, yumshoq va qattiq mebel, o‘quv jihozlari bilan ta’minlangan. Xuddi shunday, maskanni energiya tejamkor isitish-sovitish tizimi va boshqa zarur infratuzilma bilan to‘la-to‘kis ta’minlash choralari ko‘rilmoqda.
Mazkur maktabgacha ta’lim tashkilotini foydalanishga topshirilishi Quyi Kobdun qishlog‘i aholisi uchun ko‘pdan kutilgan yangilik bo‘ldi. Negaki, shu kungacha qishloqdagi ko‘plab yosh oilalar bog‘cha yoshidagi farzandlari bilan uzoq hududdagi bolalar bog‘chalariga qiyinchilikda qatnashga majbur bo‘lishgani ham ayni haqiqat. Endilikda esa ko‘p yillik orzu ushaldi va bolajonlar o‘z yashash hududining o‘zida barcha zamonaviy qulayliklarga ega maktabgacha ta’lim tashkilotida tarbiya olish imkoniyatiga ega bo‘ldilar.
Muassasa ramziy alvon lentasi qirqilgach, yig‘ilganlar unda bolajonlar uchun yaratilgan shart-sharoit bilan yaqindan tanishdilar.
Ertamiz egalarining barvaqt savod chiqarishlari, murg‘ak yoshlaridan ham jismonan chiniqib, ham dunyoqarashini o‘stirib, teran fikrlashlari uchun mazkur maktabgacha ta’lim tashkilotining o‘rni va ahamiyati beqiyos. Bunday bunyodkorlik ishlari yurtimizda ayniqsa, bolalar ta’lim-tarbiyasiga qaratilayotgan yuksak e’tiborning amaliy ifodasidir.
Viloyat hokimligi matbuot xizmati